II Tihosi 9

₁Endzhaku ka sweswo, muprofeta Elixa a vitana un'wana wa vadyondzisiwa va vaprofeta, a ku ka yena: “Khoma ndlela, u kongoma eRamoto-Giliyadi, u ri ni rimhondzo leri ra mafurha. ₂Loko u fika kona, lava Yehu n'wana Yoxafati wa Nimxi; u nghena laha a nga kona exikarhi ka vanakulobye, u n'wi vitanela etlhelo, u nghena na yena endlwini ya le xikarhi. ₃Kutani u teka rimhondzo leri ra mafurha, u n'wi chela enhlokweni, u ri karhi u n'wi tivisa rito ra HOSI Xikwembu leri nge: ‘Hi mafurha lawa, ndzi ku veka ku va hosi ya tiko ra Israele.’ Kutani, pfula rivanti, u huma u tsutsuma, u nga hlweli.”

₄Jaha leri ra muprofeta ri kongoma eRamoto-Giliyadi. ₅Loko ri fika kona, ri kuma leswaku vafambisi va mavuthu va hlengeletanile. Kutani ri ku: “Ndzi rhumiwile eka wena, wee mufambisi.” Yehu a ku: “U rhumiwile eka mani exikarhi ka hina hinkwerhu xana?” Jaha ri ku: “Eka wena mufambisi.” ₆Kutani va suka, va ya nghena endlwini ya le xikarhi. Hiloko jaha ri chela Yehu hi mafurha enhlokweni, ri ku ka yena: “HOSI Xikwembu xa Israele xi vurisa sweswo, xi ri: ‘Hi mafurha lawa, ndzi ku veka ku va hosi ya vanhu va mina, va nga Vaisraele. ₇U ta herisa ndyangu wa Akabu n'wini wa wena, leswaku ndzi rihisela ngati ya vaprofeta malandza ya mina, ni ngati ya malandza man'wana hinkwawo ya mina, hi ku lovisa Yezabele. ₈Ndyangu hinkwawo wa Akabu, wu ta lovisiwa; naswona, ndzi ta herisa vavanuna hinkwavo lava tirhelaka Akabu, lava nga mahlonga ni lava ntshunxekeke etikweni ra Israele. ₉Ndzi ta herisa ndyangu wa Akabu tanihi ndyangu wa Yerobuwamu n'wana Nebati, kumbe tanihi ndyangu wa Baaxa n'wana Ahiya. ₁₀Loko a ri yena Yezabele, timbyana ti ta n'wi dya emasin'wini ya le Yizriele. A nga ka a nga lahliwi hi munhu.’ ” Kavaloko jaha ri pfula rivanti ri tsutsuma.

₁₁Loko Yehu a tlhelerile eka vanakulobye malandza ya hosi, ma n'wi vutisa ma ku: “Ku ni xo karhata xana? Xana munhu loyi wo hlanya a a tele yini eka wena xana?” Yehu a hlamula a ku: “Munhu wa kona ma n'wi tiva, mi tiva ni ku jamuka ka yena!” ₁₂Vona va kaneta, va ku: “Hayi! A hi swi tivi. Hi byele!” Kutani Yehu a va rungulela leswi muprofeta a n'wi byeleke swona, ri nga rito ra HOSI Xikwembu leri nge: “Hi mafurha lawa, ndzi ku veka ku va hosi ya Israele.” ₁₃Kavaloko hinkwavo va teka swiambalo swa vona hi ku hatlisa, va funengeta swikhandziyo ha swona, va andlalela Yehu, kutani va ba mhalamhala, va huwelela, va ku: “Yehu i hosi!”

₁₄Yehu n'wana Yoxafati wa Nimxi a endla makungu yo vanga vuhosi bya Yoramu. (Enkarhini wolowo, Yoramu ni vavanuna hinkwavo va Israele a va ri eku rindzeni ka muti wa Ramoto-Giliyadi, va wu sirhelela hi ku chava Hazaele hosi ya le Siriya.) ₁₅Hambiswiritano, hosi Yoramu a a tlhelele eYizriele, a ya tshunguriwa timbanga leti Vasiriya a va n'wi boxile tona, siku a nga lwa na Hazaele hosi ya le Siriya. Yehu a ku ka vanakulobye: “Loko mi yima na mina, vonani leswaku ku nga vi na munhu la balekaka emutini lowu, a ya boxa timhaka leti eYizriele.” ₁₆Kutani Yehu a khandziya ekalichini ya yena, a kongoma eYizriele, lomu Yoramu a a vabya a ri kona. Naswona Ahaziya hosi ya Yuda a a n'wi endzerile ku ya n'wi pfuxela.

₁₇Murindzi la yimaka exihondzweni xa khokholo ra Yizriele, a vona ntlawa wa Yehu wu ri karhi wu ta; kutani a huwelela a ku: “Ndzi vona ntlawa wa vanhu.” Yoramu a ku: “Vitana mugadi, u n'wi rhuma, a ya hlanganisa vanhu lava, a va vutisa loko va ta hi moya wa ku rhula.” ₁₈Hiloko mugadi wa hanci a huma, a ya hlanganisa Yehu, a fika a ku: “Hosi Yoramu ú vutisa leswaku xana u ta hi moya wa ku rhula xana?” Yehu a hlamula a ku: “U tiva yini hi ta ku rhula xana? Hundzuluka, u ndzi landza!” Murindzi wa le xihondzweni a tivisa vanhu hi ku huwelela, a ku: “Murhumiwa ú hlanganile na vona, kambe a nga vuyi.” ₁₉Kutani Yoramu a engeta a rhuma mugadi wa vumbirhi, a ya hlangana na Yehu ni vanhu va yena, a ku ka vona: “Hosi Yoramu ú vutisa leswaku xana mi ta hi moya wa ku rhula xana?” Yehu a hlamula a ku: “U tiva yini hi ta ku rhula xana? Hundzuluka, u ndzi landza!” ₂₀Murindzi wa le xihondzweni a engeta a tivisa vanhu hi ku huwelela, a ku: “Murhumiwa ú hlanganile na vona, kambe a nga vuyi. Naswona, machayelele ya makalichi, wonge i ya Yehu ntukulu wa Nimxi; tsutsumele ra kona i ra munhu wa rihuhe.”

₂₁Yoramu a lerisa malandza a ku: “Hatlisani mi pana!” Kutani va pana kalichi ya yena. Kavaloko Yoramu hosi ya Israele na Ahaziya hosi ya Yuda va huma, un'wana ni un'wana ekalichini ya yena, va ya hlanganisa Yehu. Va n'wi kuma emasin'wini ya Naboto wa le Yizriele. ₂₂Loko Yoramu a vona Yehu, a ku ka yena: “Xana u ta hi moya wa ku rhula ke, wee Yehu?” Yehu a hlamula a ku: “Ku rhula ku nga va kona ke, loko timhaka ta ku khongela swikwembu swa hava ni ta vungoma bya mana wa wena Yezabele ta ha ya emahlweni ti andza, xana?” ₂₃Kavaloko Yoramu a hundzuluxa kalichi, a tsutsuma a ri karhi a tlhava mukhosi, a ku ka Ahaziya: “Hi xengiwile, wee Ahaziya!” ₂₄Kambe Yehu a konga vurha bya yena hi matimba, a copa Yoramu enhlaneni, nseve wu n'wi tlhava mbilu, wu ya huma hi le xifuveni. Yoramu a wela ekalichini, a fa. ₂₅Kutani Yehu a lerisa nandza wa yena Bidikara, a ku: “N'wi tlakule u n'wi cukumeta kwala masin'wini ya Naboto wa le Yizriele. Xana wa ha tsundzuka siku hi khandziyeke swin'we kalichi, mina na wena, hi ri karhi hi landza tata wa yena Akabu xana? Wa ha tsundzuka ni rito leri HOSI Xikwembu xi n'wi avanyiseke ha rona xana? ₂₆Xi te: ‘Hakunene, ndza ha ku yi vona ngati ya Naboto ni ngati ya vana va yena, ku vula mina HOSI Xikwembu. Hikokwalaho ndzi ta endla leswaku u yi riha emasin'wini walawo, ku vula mina HOSI Xikwembu.’ Sweswi ke, tlakula Yoramu, u n'wi cukumeta kwala masin'wini, hilaha HOSI Xikwembu xi leriseke hakona.”

₂₇Loko Ahaziya hosi ya Yuda a vona leswi humeleleke, a tsutsuma hi ndlela leyi kongomaka Beta-Hagani. Kambe Yehu a n'wi hlongorisa, kutani a lerisa malandza a ku: “Na yena yoloyi, n'wi copeni!” Va n'wi copa ekalichini ya yena, endleleni leyi tlhandlukelaka emutini wa Guri kusuhi na Yibileyamu. Kutani a tsutsumela eMegido, a ya fela kona. ₂₈Malandza ya yena ma n'wi rhwala hi kalichi, ma ya n'wi lahla na vakokwa wa yena eYerusalema, esirheni ra yena ra le mutini wa Davhida. ₂₉Ahaziya a a sungurile ku fuma etikweni ra Yuda hi lembe ra vu-11 ra ku fuma ka Yoramu n'wana Akabu.

₃₀Loko Yehu a ri kusuhi ni ku nghena eYizriele, Yezabele a swi twa, kutani a tikhavisa mahlo, a hlovisa ni nhloko, a hlometela hansi hi le fasitereni. ₃₁Yehu a fika enyangweni ya muti, kutani Yezabele a n'wi huwelela a ku: “Xana u ta hi moya wa ku rhula, wee Zimri mudlayi wa n'wini wa wena, xana?” ₃₂Yehu a languta henhla efasitereni, a huwelela a ku: “Xana i mani la yimaka na mina, i mani xana?” Valanguteri va nga ri vangani va le ntsindza va n'wi hlometela hi le fasitereni. ₃₃Yehu a va lerisa a ku: “N'wi cukumeteni ehansi!” Va n'wi cukumeta ehansi, kutani ngati ya yena yi tlhambukela ekhumbini ni le milengeni ya tihanci, tona ti n'wi kandziyela. ₃₄Kavaloko Yehu a nghena endlwini, a dya, a nwa, kutani a lerisa a ku: “Fambani, mi ya vona ta wansati loyi wa ndzhukano, mi n'wi lahla, hikuva i n'wana wa tihosi.” ₃₅Kambe loko va ya ku n'wi lahleni, va kuma leswaku a ku nga sali nchumu xa ntsumbu wa yena, loku ku nga ri nhloko, ni minkondzo, ni swandla swa yena ntsena. ₃₆Kutani va tlhela va ya tivisa hosi. Yona yi ku: “Hi rona rito leri HOSI Xikwembu xi ri vuleke hi nomo wa Elixa wa le Tixibe, loko xi te: ‘Emasin'wini ya le Yizriele, timbyana ti ta dya nyama ya Yezabele; ₃₇ntsumbu wa yena wu ta fana ni vulongo, ensin'wini ya muti wa Yizriele; kutani vanhu a va nga n'wi tivi leswaku hi yena Yezabele.’ ”