II Tihosi 8

₁Nkarhi wun'wana, Elixa a tsundzuxa wansati loyi n'wana wa yena a a pfuxiwile eku feni, a ku ka yena: “Suka u famba swin'we ni va ndyangu wa wena, u ya tshama lomu swi kotekaka, hikuva HOSI Xikwembu xi lerisile leswaku ku ta va ni dyandza etikweni leri, naswona ri ta va etikweni ku ringana malembe ya 7.” ₂Wansati a endla hilaha munhu wa Xikwembu a n'wi byeleke hakona: A suka a famba, yena ni va ndyangu wa yena, va ya tshama malembe ya 7 etikweni ra Vafilista va ri valuveri. ₃Kuteloko malembe lawa ya 7 ma hundzile, wansati a vuya hi le tikweni ra Vafilista, kutani a ya vonana na hosi, a kombela ku tlhelela emarhumbini ya yena, ni ku tlheriseriwa masimu ya yena.

₄Siku ra kona, hosi a yi vulavula na Gehazi nandza wa munhu wa Xikwembu, yi kombela ku runguleriwa leswo hlamarisa hinkwaswo leswi Elixa a swi endleke. ₅Gehazi a a ri karhi a rungulela hosi ta n'wana loyi a pfuxiweke eku feni hi Elixa, kutani mana wa n'wana wa kona o tshuka a humelela entsindza, a ta kombela ku tlhelela emarhumbini ya yena ni ku tlheriseriwa masimu ya yena. Gehazi a ku ka hosi: “We hosi n'wini wanga, wansati loyi Elixa a nga pfuxa n'wana wa yena eku feni hi yena loyi, ni n'wana wakwe hi yaloyi!” ₆Kuteloko hosi yi vutisisile loyi wansati, yena a yi rungulela hinkwaswo. Kavaloko hosi yi vitana un'wana wa valanguteri, yi n'wi lerisa yi ku: “Manana loyi, ú fanele ku tlheriseriwa swa yena hinkwaswo, a nyikiwa ni hinkwaswo leswi nga tshoveriwa emasin'wini ya yena, ku sukela loko a rhurhile etikweni leri, ku fikela namuntlha.”

₇Siku rin'wana, Elixa a endzela Damaska. Enkarhini wolowo, Bene-Hadada, hosi ya le Siriya, a a vabya. Loko va n'wi tivisa leswaku munhu wa Xikwembu ú fikile, ₈Bene-Hadada a lerisa Hazaele, a ku: “Teka nyiko, u ya hlanganisa munhu wa Xikwembu, kutani u n'wi vutisa makungu ya HOSI Xikwembu, ku twa leswaku xana ndzi ta hola evuvabyini lebyi bya mina xana ke?” ₉Hazaele a teka tinyiko ta swilo hinkwaswo swa risima swa le Damaska, a rhwexa tikamela ta 40, a famba na swona a ya hlanganisa Elixa. Loko a hlanganile na Elixa, a vulavula a yimile emahlweni ka yena, a ku: “Nandza wa wena Bene-Hadada hosi ya Vasiriya ú ndzi rhumile ka wena ku ta vutisa leswaku xana ú ta hola evuvabyini bya yena xana?” ₁₀Elixa a n'wi hlamula a ku: “Famba u ya n'wi byela leswaku loko ku ri ku hanya, ú ta hanya; kambe mina ndzi kombisiwile hi HOSI Xikwembu leswaku ú ta fa hakunene.” ₁₁Kavaloko munhu xa Xikwembu a khanyanisa mombo, a honokela Hazaele a ko a n'wi khomisa tingana; kutani munhu wa Xikwembu a sungula ku rila. ₁₂Hazaele a vutisa a ku: “Xana u rilela yini, wee n'wini wanga?” Elixa a hlamula a ku “Ndza rila, hikuva ndzi tiva leswo biha leswi u nga ta swi endla eka Vaisraele: U ta herisa makhokholo ya vona hi ndzilo; u ta tlhava majaha ya vona hi fumu, u phyandlasa swihlangi swa vona, u handzula makhwiri ya vavasati va vona lava tikeke.” ₁₃Hazaele a hlamala, a ku: “Xana ndzi mani mina nandza wa wena ku endla leswo chavisa swonghasi; mina a ndzi munhu wa nchumu!” Kambe Elixa a hlamula a ku: “HOSI Xikwembu xi ndzi kombisile leswaku u ta va hosi ya Vasiriya.” ₁₄Kavaloko Hazaele a hambana na Elixa, a tlhelela eka n'wini wa yena. Loko a fikile, Bene-Hadada a n'wi vutisa a ku: “Xana Elixa ú te yini eka wena?” Hazaele a hlamula a ku: “Ú ndzi byele leswaku, ku hanya u ta hanya.” ₁₅Kambe, hi siku leri tlhandlamaka, Hazaele a teka xinkumbana, a xi peta ematini, a khubumeta nhloko ya hosi, a yi pfala moya yi kondza yi fa.

₁₆Hi lembe ra vuntlhanu ra ku fuma ka Yoramu n'wana Akabu etikweni ra Israele, Yehoramu n'wana Yoxafati a vekiwa hosi etikweni ra Yuda. ₁₇Yehoramu a a ri ni malembe ya 32 loko a sungula ku fuma, kutani a fuma malembe ya 8 a ri eYerusalema. ₁₈Yehoramu a hanya hi tindlela ta tihosi ta Israele ku fana ni va ndyangu wa Akabu, hikuva nsati wa yena a a ri N'wa-Akabu. Kutani Yehoramu a endla leswo biha emahlweni ka HOSI Xikwembu. ₁₉Hambiswiritano, hikwalaho ka Davhida nandza wa xona, HOSI Xikwembu a xi lavanga ku herisa Yuda; xi tshembisile leswaku rixaka ra Davhida ri nga ka ri nga tekeriwi vuhosi ni siku ni rin'we.

₂₀Enkarhini wa Yehoramu, vanhu va tiko ra Edomu va hundzukela mfumo wa tiko ra Yuda, va tihlawulela hosi ya vona. ₂₁Hiloko Yehoramu a ya hlasela muti wa Seyira, a ri ni makalichi ya yena hinkwawo. Vaedomu van'wana va va rhendzela, kutani Yehoramu a pfuka nivusiku a dlaya Vaedomu lava, a dlaya ni vafambisi va makalichi ya vona; kambe mavuthu ya yena ma tsutsumela emakaya. ₂₂Ku sukela siku rero, Vaedomu a va ha fumiwanga hi tiko ra Yuda, ku fikela namuntlha. Enkarhini wolowo, muti wa Libina na wona wu hundzukela tiko ra Yuda. ₂₃Mintirho leyin'wana ya Yehoramu, ni hinkwaswo leswi a swi endleke, swi tsariwile eka “Buku ya Matimu” ya tihosi ta Yuda. ₂₄Yehoramu a tietlelela, a lahliwa ni vakokwa wa yena emutini wa Davhida, kutani Ahaziya n'wana wa yena a sala a fuma.

₂₅Hi lembe ra vu-12 ra ku fuma ka Yoramu n'wana Akabu hosi ya tiko ra Israele, Ahaziya n'wana Yehoramu a sungula ku fuma etikweni ra Yuda. ₂₆Ahaziya a a ri ni malembe ya 22 loko a sungula ku fuma, a fuma lembe rin'we ntsena a ri eYerusalema. Mana wa yena a a ri Ataliya, ntukulu wa Omri hosi ya Israele. ₂₇Ahaziya na yena a hanya hi tindlela ta va ndyangu wa Akabu: A endla leswo biha emahlweni ka HOSI Xikwembu ku fana ni ndyangu wa Akabu, hikuva a a ri mukon'wana wa vona.

₂₈Ahaziya a famba swin'we na Yoramu n'wana Akabu, va ya hlasela Hazaele hosi ya le Siriya eRamoto-Giliyadi, kambe Vasiriya va n'wi boxa timbanga enyimpini. ₂₉Kutani Yoramu a tlhelela eYizriele, a ya tshunguriwa timbanga leti a nga tlhaveteriwa tona hi Vasiriya eRhama, siku leri a nga lwa na Hazaele hosi ya le Siriya. Ahaziya n'wana Yehoramu hosi ya Yuda a ya endzela Yoramu n'wana Akabu eYizriele, a ya n'wi pfuxela eku vabyeni ka yena.