II Tihosi 21

₁Manase a a ri ni malembe ya 12 loko a sungula ku fuma, kutani a fuma malembe ya 55 a ri eYerusalema. Mana wa yena a a ri Hefesiba. ₂Manase a endla leswo biha emahlweni ka HOSI Xikwembu, hi ku landza swa manyala ya vamatiko lava hlongoriweke hi HOSI Xikwembu, loko Vaisraele va nghena etikweni. ₃Ú tlherile a pfuxa vukhongeri bya le switsungeni leswo hlawuleka, lebyi tata wa yena Hezekiya a a byi herisile; a akela Baali tialitari, a vatla ni mhandze ya Axera xikwembukazi, ku fana ni leswi Akabu hosi ya Israele a swi endleke; naswona a nkhinsamela dyambu ni n'weti ni tinyeleti, a swi tirhela. ₄A aka tialitari endlwini ya HOSI Xikwembu, emutini wa Yerusalema lowu HOSI Xikwembu xi vulavuleke ha wona, siku xi nga te: “Hi kona laha ndzi nga ta gandzeleriwa kona.” ₅Eswivaveni swimbirhi swa yindlu ya HOSI Xikwembu, a aka tialitari to gandzelela ka tona edyambu ni n'weti ni tinyeleti. ₆Naswona a hisa n'wana wa yena a endla gandzelo ha yena; a vhumbha ni ku hlahluva, a tirhisana ni vangoma, ni lava fembaka. A endla leswo biha ngopfu emahlweni ka HOSI Xikwembu, a kondza a xi hlundzukisa swinene. ₇Manase a yimisa eTempeleni mhandze leyi a yi vatleke ya Axera xikwembukazi; kasi HOSI Xikwembu a xi byerile Davhida na Solomoni n'wana wa yena xi ku: “ETempeleni leyi ni le mutini lowu wa Yerusalema, lowu ndzi wu hlawuleke exikarhi ka miti ya tinyimba hinkwato ta Israele, hi kona laha ndzi nga ta gandzeleriwa kona. ₈Naswona, loko Vaisraele va ndzi yingisa hi xichavo, ni loko va hanya hi swileriso swa mina hinkwaswo, va hlayisa Nawu hinkwawo lowu nandza wa mina Muxe a va leriseke wona, ndzi nga ka ndzi nga ha va tsendzelekisi, va ya kule ni tiko leri ndzi ri nyikeke vatata wa vona.”

₉Kambe vanhu va Yuda a va swi twanga sweswo. Kutani Manase a va dyohisa, va kondza va endla leswo biha ku tlula vamatiko lava herisiweke hi HOSI Xikwembu, loko Vaisraele va nghena etikweni.

₁₀Kavaloko HOSI Xikwembu xi vulavula hi nomo wa vaprofeta malandza ya xona xi ku: ₁₁“Manase hosi ya Yuda ú endlile manyala lama nyenyetsaka ni swilo swo biha leswi tlulaka hinkwaswo leswi Vaamori va swi endleke khale; naswona, ú dyohisile vanhu va Yuda hi swikwembu swa yena swa hava. ₁₂Hikokwalaho, mina HOSI Xikwembu xa Israele, ndzi vurisa sweswo ndzi ri: ‘Ndzi ta vangela muti wa Yerusalema ni vaaki va Yuda ekhombo leri ri nga ta chavisa vanhu hinkwavo ngopfu, loko va ri twa. ₁₃Ndzi ta avanyisa muti wa Yerusalema ndzi wu herisa, hilaha ndzi avanyiseke ni ku herisa muti wa Samariya hakona, swin'we ni ndyangu wa Akabu. Ndzi ta sula Yerusalema, kukotisa loko munhu a sula nkambana, kutani loko a hetile, a wu khubumeta. ₁₄Ndzi ta fularhela vanhu va mina lava nga ta va va ha sele, ndzi va nyiketa emavokweni ya valala va vona hinkwavo, leswaku valala lava va va hlula ni ku va endla mahlonga. ₁₅Hikuva va endlile leswo biha emahlweni ka mina; va ndzi hlundzukisile ngopfu, ku sukela loko vatata wa vona va humile etikweni ra Egipta, ku fikela namuntlha.’ ”

₁₆Manase ú dlayile vanhu lavo tala ngopfu, lava a va nga ri na nandzu, muti wa Yerusalema wu ko wu tala hi ngati ya vona, matlhelo hinkwawo. Xidyoho lexi, ú xi engeterile eka swidyoho swin'wana leswi a nga dyohisa vanhu va Yuda ha swona, loko a va kucetela ku endla leswo biha emahlweni ka HOSI Xikwembu.

₁₇Kutani ke, mintirho leyin'wana ya Manase, ni hinkwaswo leswi a swi endleke, ni ta ku dyoha ka yena, swi tsariwile eka “Buku ya Matimu” ya tihosi ta Yuda. ₁₈Manase a tietlelela, a lahliwa emutini wa yena entangeni wa Uza, kutani n'wana wa yena Amoni a sala a fuma.

₁₉Amoni a a ri ni malembe ya 22 loko a sungula ku fuma, kutani a fuma malembe mambirhi a ri eYerusalema. Mana wa yena a a ri Mexulemete, N'wa-Harusi wa le Yotiba. ₂₀A endla leswo biha emahlweni ka HOSI Xikwembu, ku fana ni tata wa yena Manase. ₂₁A hanya hi tindlela hinkwato ta tata wa yena, a tirhela swifaniso swa swikwembu swa hava leswi tata wa yena a swi tirheleke ni ku swi nkhinsamela. ₂₂A fularhela HOSI Xikwembu xa vatata wa yena, a nga hanyi hi tindlela ta xona. ₂₃Siku rin'wana, malandza ya hosi Amoni ma endla makungu ya ku n'wi pfukela, kutani ma ya n'wi dlaya emutini wa yena. ₂₄Kambe vaaki va tiko va dlaya vanhu hinkwavo lava a va endlile makungu yo pfukela hosi Amoni, kutani va veka Yosiyasi n'wana Amoni evuhosini bya tata wa yena. ₂₅Mintirho leyin'wana ya Amoni, ni leswi a swi endleke, swi tsariwile eka “Buku ya Matimu” ya tihosi ta Yuda. ₂₆Va n'wi lahla esirheni ra yena ra le ntangeni wa Uza, kutani Yosiyasi n'wana wa yena a sala a fuma.