II Tihosi 15

₁Hi lembe ra 27 ra ku fuma ka Yerobuwamu hosi ya Israele, Azariya n'wana Amasiya hosi ya Yuda a sungula ku fuma. ₂A a ri ni malembe ya 16 loko a sungula ku fuma, kutani a fuma malembe ya 52 a ri eYerusalema. Mana wa yena a a ri Yekoliya wa le Yerusalema. ₃Azariya a endla leswo lulama emahlweni ka HOSI Xikwembu. Mintirho ya yena hinkwayo a yi fana ni ya Amasiya tata wa yena. ₄Hambiswiritano, swa le switsungeni leswo hlawuleka a swi tshikiwanga, hikuva vanhu a va ya emahlweni va humesa magandzelo ni ku hisa mirhi ya risuna eswitsungeni leswi. ₅Kutani HOSI Xikwembu xi ba hosi Azariya, a khomiwa hi vuvabyi bya nhlokonho lebyi n'wi karhateke a kondza a fa, a dzumba a lo tshama endlwini ya le tlhelo a nga ha tirhi nchumu. Hikokwalaho Yotamu, n'wana wa hosi, a khomela tata wa yena entsindza ni le ku fambiseni ka timhaka ka tiko. ₆Kutani ke, mintirho leyin'wana ya Azariya, ni hinkwaswo leswi a swi endleke, swi tsariwile eka “Buku ya Matimu” ya tihosi ta Yuda. ₇Azariya a tietlelela, a lahliwa emasirheni ya vakokwa wa yena emutini wa Davhida. Kutani Yotamu n'wana wa yena a sala a fuma.

₈Hi lembe ra 38 ra ku fuma ka Azariya hosi ya Yuda, Zakariya n'wana Yerobuwamu a fuma tiko ra Israele tin'hweti ta 6, a ri eSamariya. ₉A endla leswo biha emahlweni ka HOSI Xikwembu, ku fana ni vatata wa yena. A nga fularhelanga swidyoho leswi Yerobuwamu n'wana Nebati a a dyohisile ni Vaisraele ha swona. ₁₀Siku rin'wana, Xalumi n'wana Yabexe a endla makungu yo tekela Zakariya vuhosi; a n'wi juma le Yibileyamu, a n'wi dlaya, kutani a sala a fuma. ₁₁Kutani ke, ta mintirho leyin'wana ya Zakariya ti tsariwile eka “Buku ya Matimu” ya tihosi ta Israele. ₁₂Hi tona timhaka leti HOSI Xikwembu a xi vulavurile na Yehu ha tona, siku leri xi nga te: “Vatukulu va wena ni vatukulu xinguwe va wena va ha ta fuma tiko ra Israele.” Hakunene, swi ve tano.

₁₃Xalumi n'wana Yabexe a sungula ku fuma hi lembe ra 39 ra ku fuma ka Azariya hosi ya Yuda, kutani a fuma n'hweti yin'we ntsena a ri eSamariya. ₁₄Kavaloko Menahema n'wana Gadi a tlhandluka a ta hi le Tirisa, a fika eSamariya, kutani a juma Xalumi n'wana Yabexe kwala eSamariya, a n'wi dlaya, a sala a fuma.

₁₅Kutani ke, mintirho leyin'wana ya Xalumi, ni hilaha a endleke makungu hakona yo teka vuhosi, swi tsariwile eka “Buku ya Matimu” ya tihosi ta Israele. ₁₆Eminkarhini yoleyo, Menahema a hlasela muti wa Tifisaka ni vaaki hinkwavo va wona, a hlasela ni xitikwana xa kona ku sukela eTirisa, hikuva a va arile ku n'wi pfulela tinyangwa ta muti; naswona, a dlaya vavasati hinkwavo lava tikeke hi ku va handzula makhwiri.

₁₇Hi lembe ra 39 ra ku fuma ka Azariya hosi ya Yuda, Menahema n'wana Gadi a sungula ku fuma tiko ra Israele, a fuma malembe ya khume a ri eSamariya. ₁₈A endla leswo biha emahlweni ka HOSI Xikwembu. Emasikwini hinkwawo ya ku hanya ka yena, a nga fularhelanga swidyoho hinkwaswo leswi Yerobuwamu n'wana Nebati a a dyohisile ni Vaisraele ha swona. ₁₉Enkarhini wolowo, Tiglata-Pilezere hosi ya le Asiriya a hlasela tiko hinkwaro ra Israele, kutani Menahema a luva Tiglata-Pilezere hi silivhere yo tika ku tlula tithani ta 40. Menahema a a lava leswaku Tiglata-Pilezere a n'wi pfuna ku tiyisa vuhosi bya yena. ₂₀Mali yo luva hosi ya Asiriya ha yona, Menahema ú yi kumile eka Vaisraele hi ku sindzisa swifumi ku humesa tisilivhere ta 50 hi munhu. Kavaloko Tiglata-Pilezere a tlhela, a nga tshamanga nkarhi wo leha etikweni ra Israele. ₂₁Kutani ke, mintirho leyin'wana ya Menahema, ni hinkwaswo leswi a swi endleke, swi tsariwile eka “Buku ya Matimu” ya tihosi ta Israele. ₂₂Menahema a tietlelela, kutani Pekahiya n'wana wa yena a sala a fuma.

₂₃Hi lembe ra 50 ra ku fuma ka Azariya hosi ya Yuda, Pekahiya n'wana Menahema a sungula ku fuma tiko ra Israele, a fuma malembe mambirhi a ri eSamariya. ₂₄A endla leswo biha emahlweni ka HOSI Xikwembu. A nga fularhelanga swidyoho leswi Yerobuwamu n'wana Nebati, a a dyohisile ni Vaisraele ha swona. ₂₅Siku rin'wana, Peka n'wana Remaliya, xandla xa hosi, a endla makungu yo tekela Pekahiya evuhosi; a n'wi juma, [a juma na Arigobi na Ariye] a va dlaya endlwini yin'wana ya le ntsindza eSamariya, a ri ni ntlawa wa Vagiliyadi va 50; kutani loko a n'wi dlayile, a sala a fuma. ₂₆Kutani ke, mintirho leyin'wana ya Pekahiya, ni hinkwaswo leswi a swi endleke, swi tsariwile eka “Buku ya Matimu” ya tihosi ta Israele.

₂₇Hi lembe ra 52 ra ku fuma ka Azariya hosi ya Yuda, Peka n'wana Remaliya a sungula ku fuma tiko ra Israele, a fuma malembe ya 20 a ri eSamariya. ₂₈A endla leswo biha emahlweni ka HOSI Xikwembu. A nga fularhelanga swidyoho leswi Yerobuwamu n'wana Nebati a a dyohisile ni Vaisraele ha swona.

₂₉Enkarhini wa Peka hosi ya Israele, Tiglata-Pilezere hosi ya le Asiriya a fika, a hlasela miti ya Iyoni, na Avele-Beta-Maaka, na Yonawaka, na Kedexe, na Hasoro, ni miganga ya Giliyadi, na Galeliya, ri nga tiko hinkwaro ra Neftali, a khoma vanhu a va yisa etikweni ra Asiriya va ri mahlonga. ₃₀Kutani Hoxeya n'wana Ela a endla makungu yo teka vuhosi bya Peka n'wana Remaliya; a n'wi juma, kutani loko a n'wi dlele, a sala a fuma. Lembe ra kona a ri ri ra 20 ra ku fuma ka Yotamu n'wana Uziya. ₃₁Kutani ke, mintirho leyin'wana ya Peka, ni hinkwaswo leswi a swi endleke, swi tsariwile eka “Buku ya Matimu” ya tihosi ta Israele.

₃₂Hi lembe ra vumbirhi ra ku fuma ka Peka n'wana Remaliya hosi ya Israele, Yotamu n'wana Uziya hosi ya Yuda a sungula ku fuma. ₃₃A a ri ni malembe ya 25 loko a sungula ku fuma, kutani a fuma malembe ya 16 a ri eYerusalema. Mana wa yena a a ri Yeruxa N'wa-Sadoki. ₃₄Yotamu a endla leswo lulama emahlweni ka HOSI Xikwembu, ku fana ni hinkwaswo leswi Uziya tata wa yena a swi endleke. ₃₅Hambiswiritano, swa le switsungeni leswo hlawuleka a swi tshikiwanga, hikuva vanhu a va ya emahlweni va humesa magandzelo ni ku hisa mirhi ya risuna eswitsungeni swa kona. Hi yena la akeke nyangwa ya le n'walungwini, endlwini ya HOSI Xikwembu.

₃₆Kutani ke, mintirho leyin'wana ya Yotamu, ni hinkwaswo leswi a swi endleke, swi tsariwile eka “Buku ya Matimu” ya tihosi ta Yuda. ₃₇Eminkarhini yoleyo, HOSI Xikwembu xi sungula ku rhuma Resini hosi ya le Siriya na Peka n'wana Remaliya, va ya hlasela tiko ra Yuda. ₃₈Yotamu a tietlelela, a lahliwa emasirheni ya vakokwa wa yena emutini wa Davhida kokwa wa yena. Kutani Akazi n'wana wa yena a sala a fuma.