II Tikronika 6

₁Kutani Solomoni a khongela a ku: “We HOSI, u vurile leswaku u ta tshama exihundleni lexikulu. ₂Hikokwalaho mina ndzi ku akerile yindlu leyo chaviseka, leyi u nga ta tshama eka yona hilaha ku nga heriki.”

₃Kutani hosi Solomoni a hundzuluka, a langutana ni nhlengeletano hinkwayo ya Vaisraele lava a va yimile kunene, kutani a va nkhensela eka HOSI Xikwembu, ₄a ku: “A ku nkhensiwe HOSI, Xikwembu xa Israele, hikuva xi endlile hinkwaswo leswi xi swi tshembiseke Davhida tata wa mina, loko xi te: ₅‘Ku sukela siku leri ndzi humeseke vanhu va mina va Israele etikweni ra Egipta, a ndzi nga si hlawula muti ni wun'we exikarhi ka tinyimba hinkwato ta Vaisraele, laha ku nga ta akiwa yindlu leyi vito ra mina ri nga ta dzunisiwa eka yona. Naswona a ndzi nga si hlawula munhu loyi a nga ta va murhangeri wa vanhu va mina va Israele. ₆Kambe sweswi ndzi hlawurile muti wa Yerusalema, leswaku vito ra mina ri dzunisiwa eka wona, naswona ndzi hlawurile Davhida, leswaku a va hosi ya vanhu va mina va Israele.’ ”

₇Solomoni a ya emahlweni a ku: “Tata wa mina Davhida a a bohile makungu ya ku aka yindlu leyi vito ra HOSI, Xikwembu xa Israele, ri nga ta dzunisiwa eka yona. ₈Kambe HOSI Xikwembu xi te ka Davhida: ‘Makungu lawa u ma boheke, yo aka yindlu leyi vito ra mina ri nga ta dzunisiwa eka yona, i manene ngopfu. ₉Hambiswiritano, a hi wena la nga ta aka yindlu leyi, kambe n'wana wa wena loyi u nga ta n'wi veleka, hi yena loyi a nga ta aka yindlu leyi vito ra mina ri nga ta dzunisiwa eka yona.’ ” ₁₀Solomoni a engeta a ku: “Namuntlha HOSI Xikwembu xi endlile hilaha xi tshembiseke hakona, hikuva ndzi vekiwile ku va hosi ematshan'wini ya Davhida tata wa mina, ndzi nyikiwa vuhosi bya Vaisraele, hilaha HOSI Xikwembu xi tshembiseke hakona; kutani ndzi akile yindlu leyi vito ra HOSI, Xikwembu xa Israele, ri nga ta dzunisiwa eka yona. ₁₁Kutani eka yona, ndzi vekile Areka, laha ku nga ni milawu ya Ntwanano lowu HOSI Xikwembu xi wu boheke ni Vaisraele.”

₁₂Kutani Solomoni a yima emahlweni ka nhlengeletano hinkwayo ya Vaisraele, a khongela a langutile alitari, a tlakuserile mavoko ya yena ehenhla. ₁₃A a endlile xikhandziyo xa koporo lexi anameke 3,50 m, xi lehile 1,50 m ku ya henhla, kutani a xi veka exivaveni xa Tempele. Solomoni a rhanga a ya yima ehenhla ka xikhandziyo xexo, kutani a nkhinsama hi matsolo, ntshungu hinkwawo wa Vaisraele wu ri karhi wu n'wi vona, kutani a tlakusela mavoko ya yena ehenhla, ₁₄a ku: “Wena HOSI, Xikwembu xa Israele, a ku na Xikwembu ni xin'we lexi fanaka na wena, ematilweni ni laha misaveni; u hlayisa ntwanano wa wena, u komba ni rirhandzu ra wena lero tshembeka eka malandza ya wena lama tinyiketaka hi mbilu ku hanya etindleleni ta wena. ₁₅U hlayisile leswi u swi tshembiseke tata wa mina Davhida, nandza wa wena; u n'wi tshembisile, kutani namuntlha u endlile hilaha u vuleke hakona. ₁₆Sweswi we HOSI, Xikwembu xa Israele, hlayisa leswi u swi tshembiseke tata wa mina Davhida, nandza wa wena; u te ka yena: ‘Emutini wa wena, a ku nga pfumaleki munhu ni siku na rin'we, loyi a nga ta fuma Vaisraele hi vito ra mina, loko vatukulu va wena va tivonela ku hanya emahlweni ka mina ku fana na wena, va hlayisa nawu wa mina!’ ₁₇Hikokwalaho ke, wena HOSI, Xikwembu xa Israele, hetisa xitshembiso lexi u xi tshembiseke tata wa mina Davhida, nandza wa wena!

₁₈“Xana hakunene, wena Xikwembu, u nga tshama na vanhu laha misaveni xana? Leswi matilo ya matilo ma nga ku eneriki, Tempele leyi ndzi yi akeke yi nga ku enerisa ku yini? ₁₉Hambiswiritano we HOSI Xikwembu xanga, amukela ku khongela ka mina nandza wa wena ni ku kombela ka mina, u yingisa ku rila ka mina ni xikhongelo lexi ndzi xi vulaka emahlweni ka wena, mina nandza wa wena. ₂₀Vusiku ni nhlekanhi, mahlo ya wena a ma langute Tempele leyi, xi nga xivandla lexi u vuleke leswaku u ta gandzeriwa eka xona, kutani u yingisa xikhongelo lexi mina nandza wa wena ndzi xi humesaka ndzi ri karhi ndzi languta xivandla lexi. ₂₁Yingisa xikombelo xa mina nandza wa wena, ni xa Vaisraele vanhu va wena, loko va khongela va ri karhi va languta xivandla lexi. Hi yingise u ri evutshan'wini bya wena ematilweni, hi yingise u hi rivalela!

₂₂“Nkarhi wun'wana, munhu a nga dyohela un'wana, kutani a boheka ku vula ntiyiso hi ku hlambanya emhakeni ya yena. Loko a ta ku ta hlambanya emahlweni ka alitari ya wena kwala Tempeleni leyi, ₂₃yingisa u ri ematilweni; tirha, u avanyisa mhaka ya malandza ya wena: La nga ni nandzu, n'wi vone nandzu, u n'wi rihisa ku dyoha ka yena; kasi la nga riki na nandzu, n'wi khanise emhakeni ya kona, a riheriwa hilaha swi n'wi fanelaka hakona.

₂₄“Nkarhi wun'wana, Vaisraele vanhu va wena va nga hluriwa hi valala va vona, hi mhaka ya leswi va ku dyoheleke. Kutani ke, loko va tlhelela ka wena ni loko va ku dzunisa, va ri karhi va ku khongela ni ku kombela eka wena va ri eTempeleni leyi, ₂₅va yingise u ri ematilweni, u va rivalela ku dyoha ka vona, va nga Vaisraele vanhu va wena, u va tlherisela etikweni leri u ri nyikeke vona ni vatata wa vona.

₂₆“Nkarhi wun'wana, matilo ma nga pfaleka, mpfula yi nga ha ni, hi mhaka ya leswi va ku dyoheleke. Kutani ke, loko va khongela va ri karhi va languta xivandla lexi, ni loko va ku dzunisa, va tshika ku dyoha ka vona siku u va tshinyaka, ₂₇va yingise u ri ematilweni, u va rivalela ku dyoha ka vona, vona malandza ya wena va nga Vaisraele vanhu va wena. Naswona u va dyondzisa ndlela leyinene leyi va nga ta hanya ha yona, kutani u nisa mpfula etikweni leri u ri nyikeke vanhu va wena leswaku ri va ndzhaka ya vona.

₂₈“Nkarhi wun'wana, tiko ri nga wela hi dyandza, kumbe ntungu, swimila swi tshwa hi mumu, kumbe swi dyiwa hi mati, kumbe swi hlaseriwa hi tinjiya ni mbhindzula; nkarhi wun'wana, Vaisraele va ta karhatiwa hi valala emindzilekaneni ya tiko ra vona, kumbe va ta wela hi mintungu ni mavabyi ya tinxaka-xaka. ₂₉Eminkarhi leyo tano, xikhongelo xihi ni xihi, kumbe xikombelo xihi ni xihi xa munhu a ri un'we kumbe xa Vaisraele hinkwavo vanhu va wena, xi yingise we HOSI! Loko vakhongeri lava va vona khombo ra vona ni nhlomulo wa vona, kutani va tlakusela mavoko ya vona ehenhla, va khongela va ri karhi va languta Tempele leyi, ₃₀va yingise, wena HOSI, u ri evutshan'wini bya wena ematilweni, u va rivalela, u tlherisela un'wana ni un'wana wa vona hi ku ya hi mahanyelo ya yena ni makungu ya mbilu ya yena, hikuva hi wena ntsena u tivaka timbilu ta vanhu. ₃₁Hi ndlela leyi, va ta ku chava, va hlayisa milawu ya wena, masiku hinkwawo ya ku hanya ka vona etikweni leri u ri nyikeke vatata wa hina.

₃₂“Siku rin'wana, hambi a ri muluveri, la nga riki munhu wa tiko ra wena ra Israele, a nga ta a huma etikweni ra le kule, a tela vito ra wena leri dumeke ngopfu, ni mintirho ya wena ya matimba yo lwela vanhu va wena. Loko muluveri wo tano a ta ku ta khongela a ri karhi a languta Tempele leyi, ₃₃n'wi yingise we HOSI, u ri evutshan'wini bya wena ematilweni, u n'wi endlela hinkwaswo leswi swi n'wi susumeteke ku kombela eka wena. Hi ndlela leyi, vanhu hinkwavo va misava va ta tiva vito ra wena va ku chava, tanihi leswi Vaisraele vanhu va wena va ku chavaka; naswona vamatiko va ta tiva leswaku yindlu leyi ndzi yi akeke, i Tempele ya wena hakunene.

₃₄“Nkarhi wun'wana, vanhu va wena va nga hloma matlhari ku ya lwa ni valala va vona, va ri karhi va famba hi tindlela leti u va leriseke tona. Kutani loko va ku khongela wena HOSI, va ri karhi va languta muti lowu u wu hlawuleke ni yindlu leyi ndzi ku akeleke yona leswaku u gandzeleriwa eka yona, ₃₅enkarhini wolowo, yingisa ku khongela ka vona ni ku kombela ka vona, u ri ematilweni, u va lamulela.

₃₆“Nkarhi wun'wana, va nga ku dyohela, hikuva a ku na munhu na un'we la nga dyohiki; kutani u ta va hlundzukela hi ku va nyiketa emavokweni ya valala va vona, va yisiwa etikweni ra le kule kumbe ra laha kusuhani, va ri mahlonga. ₃₇Kumbexana va ta tikamba, etikweni leri va yisiweke eka rona va ri mahlonga, kutani va hundzuka, va khongela hi matimba eka wena va ri evukhumbini, va tivula va ku: ‘Hi dyohile, hi onhile, hi endlile leswo biha!’ ₃₈Loko va hundzukisa sweswo, hi timbilu ta vona hinkwato ni miehleketo ya vona hinkwayo, etikweni leri valala va vona va va yiseke eka rona va ri mahlonga, ni loko va khongela va ri karhi va languta tiko ra vona leri u ri nyikeke vatata wa vona, ni loko va languta muti lowu u wu hlawuleke, ni yindlu leyi ndzi yi akeke leswaku u gandzeleriwa eka yona, ₃₉va yingise we HOSI, u ri evutshan'wini bya wena ematilweni, u yingisa ku khongela ka vona ni ku kombela ka vona, u va lamulela, u rivalela vanhu va wena lava va ku dyoheleke.

₄₀“Kutani wena Xikwembu xa hina, hi langute u yingisa swikhongelo leswi hi swi endlaka exivandleni xexi.