I Tihosi 7

₁Solomoni a aka ni ntsindza wa yena. Ú hetile malembe ya 13 a ri karhi a wu aka, tindlu hinkwato ti kondza ti hela.

₂A aka yindlu leyi vuriwaka “Xihlahla xa Lebanoni”; yindlu leyi a yi lehile 50 m ku ya endzeni, yi anamile 25 m, ku ya ehenhla a yi ri 15 m. Yi akiwa yi ri ni tinxaxa ta mune ta tiphuphu ta murhi wa kedari, kutani tiphuphu leti ti rhwala timhandze ta lwangu, ta murhi wa kedari na tona. ₃A pfala lwangu hi mapulangi ya kedari, a ma belela eka timhandze ta 45 leti hlanganisaka tiphuphu. (A ku ri ni tinxaxa tinharhu ta timhandze; rixaxa rin'we a ri ri ni timhandze ta 15.) ₄Hi matlhelo mambirhi ya yindlu, a boxa mafasitere, a ma xaxameta leswaku ma langutana, hi tinxaxa tinharhu, rixaxa rin'wana ehenhla ka lerin'wana. ₅Tinyangwa hinkwato ni mafasitere a swi ri ni marimba ya matlhelo ya mune yo ringana; mafasitere a ma langutana, hi tinxaxa tinharhu, rixaxa rin'wana ehenhla ka lerin'wana.

₆Solomoni a dzima ni “Vuako bya Tiphuphu”; a byi lehile 25 m ku ya endzeni, byi anamile 15 m, byi rhangeriwa hi rikupakupa ra tiphuphu, ni xilwangwana emahlweni ka vuako.

₇A aka ni “Vuako bya Xiluvelo”, yi nga “Yindlu ya Huvo” yo avanyisela kona timhaka, a pfala makhumbi hi le ndzeni hi mapulangi ya murhi wa kedari, ku sukela ehansi ku ya fika etimhandzeni ta lwangu.

₈Na leyi a nga ta tshama eka yona, a yi akela exivandleni xa le tlhelweni, emahosi ya “Vuako bya Xiluvelo”, hi maakelo man'we ni ya tindlu tin'wana. Solomoni a engeta a akela N'wa-Faro nsati wa yena yindlu yo fana ni “Vuako bya Xiluvelo”.

₉Tindlu leti hinkwato ti akiwa hi maribye ya nkoka lama vatliweke hi mpimo lowu lavekaka, ma nkulutsweriwile hala ni hala hi switsema-maribye; maribye lawa ma tirhisiwa ku aka makhumbi ya tindlu ku sukela ehansi emasungulweni ku ya fika elwangwini, ma aka ni khumbi leri hlanganisaka xivava xa Tempele ni vuako bya Huvo Leyikulu. ₁₀Emasungulweni ku vekiwa maribye walawo lamakulu ya nkoka, lama leheke 4 m kumbe 5 m ku ya henhla. ₁₁Ehenhla ka masungulo, ku tlhandlekiwa maribye ya nkoka lama vatliweke hi mpimo lowu lavekaka, swin'we ni mitsandza ya murhi wa kedari. ₁₂Makhumbi ya vuako bya Huvo leyikulu ma akiwa hi tinxaxa tinharhu ta maribye lama vatliweke, ma tlhandlekiwa timhandze ta kedari. Xivava xa Tempele xa le ndzeni xi akiwa hi ndlela yoleyo, swin'we ni rikupakupa ra kona.

₁₃Hosi Solomoni a rhumela vanhu eTiri ku ya vitana wanuna loyi a va ku i Hiramu, kutani va vuya na yena. ₁₄Sirha tata wa Hiramu a a ri munhu wa le Tiri, loyi a a tiva ku fula koporo. Mana wa Hiramu a a ri wa ka Neftali. Hiramu a a ri munhu wo tlhariha ngopfu, wo hatla ku twisisa, la tivaka swinene ku fula xihi ni xihi hi koporo. Kuteloko a fikile eka hosi Solomoni, a tirha hinkwaswo leswi hosi yi n'wi kombeleke swona.

₁₅Hiramu a n'okisa koporo, kutani a vumba ha yona tiphuphu timbirhi; hi vumbirhi bya tona, a ti lehile 9 m ku ya ehenhla, ti bumburile 6 m. ₁₆Kutani Hiramu a vumba leswi fanaka ni swidlodlo swimbirhi leswikulu swa koporo leyi n'okisiweke, a swi tlhandleka ehenhla ka tiphuphu letimbirhi; xidlodlo xin'wana ni xin'wana a xi ri 2,50 m ku ya ehenhla. ₁₇A vumba leswi fanaka ni matavala ya koporo ni tiharhi to lukiwa hi tinketani letitsongo, a swi endla swi ri 7 hi xidlodlo, a endlela ku khavisa swidlodlo leswimbirhi etinhlokweni ta tiphuphu. ₁₈A fula tinxaxa timbirhi ta swikhaviso swo fana ni swihenge, swi tsondzela ritavala ra koporo leri khavisaka xidlodlo enhlokweni ya phuphu leyo sungula; a endlisa sweswo ni le ka leya vumbirhi. ₁₉Swidlodlo swa le tinhlokweni ta tiphuphu letimbirhi, emahlweni ka rikupakupa ra Tempele, a swi ri ni xivumbeko xa swiluva swa makhon'wa, swi lehile 2 m ku ya ehenhla. ₂₀Swidlodlo swa le tinhlokweni ta tiphuphu letimbirhi, a swi ungamela xikhaviso xin'wana xo tsindziyela hi le tlhelo ka xifaniso xa matavala; na swona swidlodlo a swi rhendzeriwa hi tinxaxa timbirhi ta swihenge swa 200; xidlodlo xa vumbirhi a xi fana ni lexo sungula. ₂₁Hiramu a dzima tiphuphu emahlweni ka rikupakupa ra Tempele. A yimisa phuphu leyo sungula hi tlhelo ra dzonga, a yi thya vito ra “Yakini”. Leya vumbirhi, a yi yimisa hi tlhelo ra n'walungu, a yi thya vito ra “Bowazi”. ₂₂Swidlodlo swa le tinhlokweni ta tiphuphu a swi ri ni xivumbeko xa swiluva swa makhon'wa.

Hi ndlela leyi, Hiramu a hetisisa ntirho wo dzima tiphuphu. ₂₃Kutani Hiramu a n'okisa koporo, a vumba ha yona nhlambeto leyikulu ya xirhendzevutana, leyi a va ku i “Lwandle”. Mpandzo wa yona a wu ri 5 m; ku ya ehenhla a yi ri 2,50 m; ni xirhendzevutana xa yona a xi ringana mpimo wa ngoti ya 15 m. ₂₄Nhlambeto leyi a yi rhendzeriwile hi swifaniso swa marhanga hi le hansi ka nomo wa yona; a ku ri ni marhanga ya 20 eka mitara yin'wana ni yin'wana, ma rhendzela nhlambeto, hi tinxaxa timbirhi; marhanga a ma n'okisiwile swin'we ni nhlambeto. ₂₅Nhlambeto a yi tlhandlekiwile ehenhla ka swifaniso swa tihavi ta 12; tinharhu a ti languta en'walungwini, tinharhu evupeladyambu, tinharhu edzongeni, ni tinharhu evuxeni; nhlambeto a yi ri ehenhla ka tona, kutani ti hlangana hi tinyonga ehansi ka yona. ₂₆Nhlambeto a yi tsindziyerile 7 cm kumbe 8 cm, nomo wa yona a wu vumbiwile tanihi xibya xa nomo wo voyamela ehandle, kumbe tanihi makamba ya swiluva swa makhon'wa. Nhlambeto a yi hlayisa mati yo ringana tinkho ta 80.

₂₇Kutani Hiramu a n'okisa koporo, a vumba ha yona swigolonyana swa khume, xigolonyana xin'wana ni xin'wana xi lehile 2 m, xi anamile 2 m, ku ya ehenhla xi ri 1,50 m. ₂₈Swigolonyana a swi ri ni xivumbeko lexi: A swi ri ni matlhelo, kutani matlhelo lawa a ma lumeriwile emarimbeni. ₂₉Matlhelo lawa yo lumeriwa emarimbeni a ma khavisiwile hi swifaniso swa tinghala ni swa tihavi ni swa tikerubu. Na wona marimba ya le henhla ni ya le hansi ka swifaniso swa tinghala ni tihavi, a ma khavisiwile hi swifaniso swa tiharhi leti nembelelaka ta swiluva. ₃₀Tlhandlakambirhi, xigolonyana xin'wana ni xin'wana a xi nghenisiwile mavhilwa ya mune ya koporo ni tiansi ta koporo. Etinhleni ta xona ta mune a ku tlhomiwile swiphandze swo vekela xihlambelo; swiphandze leswi swa koporo leyi n'okisiweke a swi khavisiwile hi le matlhelo hi tiharhi ta swiluva. ₃₁A ku ri ni harhi yo rhwala xihlambelo, yo fana ni xidlodlo endzeni ka xigolonyana, yi humela henhla hi 50 cm. Harhi leyi a yi fana ni xirhundzu, vundzeni bya yona a byi ri 75 cm, na yona yi khavisiwile hi swifaniso. Matlhelo ya swigolonyana wona a ma ri ni tinhla ta mune, a ma nga endli swirhendzevutana. ₃₂Mavhilwa ya mune a ma ri hi le hansi ka matlhelo ya swigolonyana, kutani tiansi ta wona a ti vumbiwile swin'we ni milenge ya swona. Vhilwa rin'we a ri ri 75 cm ku ya ehenhla. ₃₃Mavhilwa lawa a ma fana ni mavhilwa ya kalichi; tiansi ta wona ni makumu ya wona ni swipoko swa wona ni le xikarhi ka wona, hinkwaswo a swi ri swa koporo leyi n'okisiweke. ₃₄Etinhleni ta mune ta xigolonyana a ku ri ni milenge ya mune yo endla swiphandze, swi vumbiwile swin'we ni marimba ya xigolonyana. ₃₅Hi le henhla ka swigolonyana a ku ri ni banti ra xirhendzevutana leri anameke 25 cm. Matlhelo ya xigolonyana ni swiphandze swa le tinhleni ta xona a swi vumbiwile swin'we na xona. ₃₆Eka swiphandze swa le tinhleni ni le matlhelweni ya swigolonyana a ku kovotliwile swifaniso swa tikerubu ni swa tinghala ni swa mincindzu, xin'wana ni xin'wana hi ku ya hi ndhawu leyi ringanaka xona, swi rhendzeriwa hi tiharhi ta swiluva. ₃₇Swigolonyana swa khume a swi endliwile hi ndlela yoleyo. Hinkwaswo ka swona a swi vumbiwile ku fana hi koporo leyi n'okisiweke, hi mpimo wun'we ni xivumbeko xin'we.

₃₈Hiramu a vumba ni swihlambelo swa koporo swa khume. Xihlambelo xin'wana ni xin'wana a xi ri ni mpandzo wa 2 m, xi tatiwa hi mati yo ringana kwalomu ka tinkho timbirhi. Xigolonyana xin'wana ni xin'wana a xi ri ni xihlambelo xa xona. ₃₉Kutani Hiramu a veka swigolonyana swa ntlhanu hi tlhelo ra dzonga ra Tempele, ni leswa ntlhanu swin'wana hi tlhelo ra n'walungu ra Tempele. Hiramu a tikirheta nhlambeto leyikulu leyi vuriwaka “Lwandle” kusuhi ni yinhla ya Tempele ya le dzonga-vuxa. ₄₀Hiramu a endla ni timbita, ni minkombe, ni minkambana. Hi ndlela leyi, a hetisisa ntirho hinkwawo wa yindlu ya HOSI Xikwembu, lowu lerisiweke hi hosi Solomoni.

₄₁Hiramu ú vumbile leswi: Tiphuphu timbirhi; ni swidlodlo swimbirhi leswi fanaka ni nhlambeto, etinhlokweni ta tiphuphu letimbirhi; ni swikhaviso swimbirhi swa matavala leswi rhendzelaka swidlodlo swimbirhi swo fana ni nhlambeto, etinhlokweni ta tiphuphu; ₄₂ni swifaniso swa 400 swa swihenge leswi khavisaka matavala lamambirhi (tinxaxa timbirhi ta swihenge hi ritavala rin'we), swi rhendzela swidlodlo leswimbirhi leswi fanaka ni nhlambeto, ehenhla ka tiphuphu; ₄₃ni swigolonyana swa khume; ni swihlambelo swa khume leswi seketeriwaka hi swiphandze; ₄₄ni nhlambeto leyikulu leyi vuriwaka “Lwandle”; ni tihavi ta 12 leti rhwalaka nhlambeto; ₄₅ni timbita, ni minkombe, ni minkambana.

Swingolongondzwana leswi hinkwaswo swa yindlu ya HOSI Xikwembu, leswi Hiramu a swi vumbeke hi ku lerisiwa hi hosi Solomoni, a swi ri swa koporo leyi vangamisiweke. ₄₆Ú n'okisile koporo ya swona hi ku tirhisa misava ya vumba leyi kumekaka exikarhi ka Sukoti na Saretani, enkoveni wa Yordani. ₄₇Solomoni a nga pimanga ku tika ka swingolongondzwana leswi hinkwaswo, hikuva a swi tele ngopfu. Ku tika ka koporo ya swona a ku tiviwi hi munhu.

₄₈Kutani Solomoni a lavela yindlu ya Hosi eswingolongondzwana hinkwaswo swa yona, swi nga leswi: Alitari ya nsuku; tafula ra nsuku ra swinkwa leswi humeseriwaka Xikwembu; ₄₉switlhoma-timboni swa nsuku wo tenga, ntlhanu hi tlhelo ra dzonga ni ntlhanu hi tlhelo ra n'walungu emahlweni ka xivandla xo hlawuleka ngopfu; swiluva, ni timboni, ni tintlama, swa nsuku hinkwaswo; ₅₀swinwelo, ni swikero swo tsemeta tingoti ta timboni, ni minkambana, ni swimbitana swo hisela mirhi ya risuna, ni timbita to oka ndzilo, hinkwaswo swa nsuku lowo tenga; ni swihayeko swa timbanti ta xivandla xa le ndzeni ka Tempele, xi nga lexo hlawuleka ngopfu, ni swihayeko swa timbanti ta xivandla xo rhanga lexo hlawuleka; swihayeko leswi a swi ri swa nsuku na swona.

₅₁Hiloko ntirho hinkwawo lowu hosi Solomoni a wu tirheke endlwini ya HOSI Xikwembu, wu hela. Kutani Solomoni a nghenisa swingolongondzwana hinkwaswo emakamarini ya vuhlayiselo bya xuma xa Tempele, swi nga leswi: Silivhere, ni nsuku, ni swibya swin'wana, leswi tata wa yena Davhida a a swi nyiketile eka Xikwembu.