I Tihosi 15

₁Hi lembe ra vu-18 ra ku fuma ka hosi Yerobuwamu n'wana Nebati, Abiyama a sungula ku fuma tiko ra Yuda, ₂a fuma malembe manharhu, a ri eYerusalema. Mana wa yena a a ri Maaka, N'wa-Abixalomu. ₃Evuton'wini bya yena, Abiyama a endla swidyoho hinkwaswo leswi tata wa yena Rhobuwamu a swi endleke. A nga tshembanga HOSI Xikwembu xa yena hi ku hetiseka, tanihileswi Davhida kokwa wa yena a a xi tshembisile swona. ₄Hambiswiritano, hikwalaho ka Davhida, HOSI Xikwembu xa yena xi mirisela Abiyama exihluke emutini wa Yerusalema, leswaku hi n'wana loyi wa yena rixaka ra yena ri nga tshuki ri nyamalala, ni leswaku muti wa Yerusalema wu tshama wu ri ntsindza. ₅Swi ve tano, hikuva Davhida a a endlile leswi lulameke emahlweni ka HOSI Xikwembu; evutomini bya yena hinkwabyo a nga langa hambuka eka hinkwaswo leswi xi n'wi leriseke swona, loko ku nga ri emhakeni ya Uriya lowa Muhiti.

₆[Rhobuwamu na Yerobuwamu a vo tshamela ku hlaselana.]

₇Mintirho leyin'wana ya Abiyama, ni hinkwaswo leswi a swi endleke, swi tsariwile eka “Buku ya Matimu” ya tihosi ta Yuda. Na vona Abiyama na Yerobuwamu a va tshamela ku hlaselana. ₈Abiyama a tietlelela; va n'wi lahla ni vakokwa wa yena emutini wa Davhida, kutani Asa n'wana wa yena a sala a fuma.

₉Hi lembe ra 20 ra ku fuma ka hosi Yerobuwamu etikweni ra Israele, hosi Asa a sungula ku fuma etikweni ra Yuda, ₁₀a fuma malembe ya 41 a ri eYerusalema. Kokwa wa yena wa xisati a a ri Maaka, N'wa-Abixalomu. ₁₁Asa a endla leswi lulameke emahlweni ka HOSI Xikwembu, tanihi Davhida kokwa wa yena. ₁₂A herisa vunghwavava bya le magandzelweni ya swa hava etikweni, a susa ni swifaniso hinkwaswo swa vugandzeri bya kona, leswi vumbiweke hi vakokwa wa yena. ₁₃Tlhandlakambirhi, a hlongola kokwa wa yena Maaka etifanelweni ta vunkosikazi bya tiko, hikuva a a ri ni xifaniso xa manyala lexi a xi vumberiwile Axera xikwembukazi. Asa a susa xifaniso lexi, a ya xi hisa exinkobyaneni xa Kedroni. ₁₄Hambileswi a nga kotangiki ku herisa magandzelo hinkwawo ya le switsungeni leswo hlawuleka, Asa ú tikombile a ri munhu wo tshembeka eka HOSI Xikwembu, evutomini bya yena hinkwabyo. ₁₅Ú tisile eTempeleni swilo hinkwaswo leswi tata wa yena a a swi nyiketile eka Xikwembu, kun'we ni swa yena n'winyi, swi nga swibya swa silivhere ni nsuku.

₁₆Asa na Baaxa hosi ya tiko ra Israele a vo tshamela ku hlaselana. ₁₇Siku rin'wana, Baaxa hosi ya tiko ra Israele a hloma matlhari ku ya lwa ni tiko ra Yuda. A ya biya muti wa Rhama hi rirhangu leswaku wu pfala tindlela, vanhu va nga ha koti ku huma kumbe ku nghena eYerusalema eka Asa hosi ya Yuda.

₁₈Kavaloko Asa a ya teka swilo hinkwaswo swa silivhere ni nsuku, leswi a swi sele evuhlayiselweni bya xuma xa yindlu ya HOSI Xikwembu, ni le vuhlayiselweni bya xuma xa le ntsindza, a swi tamerisa malandza ya yena. Kutani hosi Asa a rhuma vanhu lava ku ya swi fikisa eka Bene-Hadada n'wana Tabrimona, n'wana Heziyoni hosi ya le Siriya, loyi a a tshama eDamaska. A va rhuma ni rito leri nge: ₁₉“A ku ve ni xinakulobye exikarhi ka mina na wena, tanihi lexi a xi ri kona exikarhi ka vatata wa hina. Languta, ndzi ku rhumela nyiko ya swilo swa silivhere ni nsuku. Ha swona ndzi ri, dlaya xinakulobye xa wena na Baaxa hosi ya tiko ra Israele, leswaku a tshika ku ndzi hlasela.” ₂₀Bene-Hadada a amukela xikombelo xa hosi Asa, kutani a rhumela tindhuna ta yena ni mavuthu ya tona ku ya hlasela miti ya Israele. Vona va ya teka miti ya Iyoni, na Dani, na Avele-Beta-Maaka, ni tiko hinkwaro ra Kinereta, ku katsa ni tiko hinkwaro ra Neftali. ₂₁Loko Baaxa a twa mhaka leyi, a tshika ku biyela muti wa Rhama hi rirhangu, a ya tshama eTirisa. ₂₂Hiloko hosi Asa a rhamba vanhu hinkwavo va Yuda, a nga siyi munhu, kutani va ya tleketla maribye ya le Rhama ni timhandze ta kona, swi nga leswi Baaxa a a pfuxa muti ha swona, kutani hosi Asa a swi tirhisa ku aka hi vuntshwa muti wa Geba wa le Benjamini ni muti wa Mispa.

₂₃Mintirho leyin'wana ya Asa, ni timhaka hinkwato ta vunhenha bya yena, ni hinkwaswo leswi a swi endleke, ni miti leyi a yi biyeleke, swi tsariwile eka “Buku ya Matimu” ya tihosi ta Yuda. Kambe eku dyuhaleni ka yena, Asa a a karhatiwa hi vuvabyi bya xirhumbe-rhumbe byo pfimbisa milenge. ₂₄Asa a tietlelela, a lahliwa emasirheni ya vakokwa wa yena emutini wa Davhida, kutani Yoxafati n'wana wa yena a sala a fuma.

₂₅Nadabu n'wana Yerobuwamu a sungula ku fuma tiko ra Israele hi lembe ra vumbirhi ra ku fuma ka Asa hosi ya tiko ra Yuda, a fuma tiko ra Israele malembe mambirhi. ₂₆Ú endlile leswo biha emahlweni ka HOSI Xikwembu. A hanya hi tindlela ta tata wa yena: A dyoha ku fana na yena, a dyohisa ni Vaisraele.

₂₇Baaxa n'wana Ahiya, wa nyimba ya Isakara, a luka mano yo vanga vuhosi bya Nadabu. Kutani Baaxa a juma Nadabu, a n'wi dlaya emutini wa Vafilista lowu vuriwaka Gibitoni, lowu Nadabu ni vanhu hinkwavo va Israele a va wu rhendzerile. ₂₈Lembe leri Baaxa a dlayeke Nadabu ha rona a ri ri ra vunharhu ra ku fuma ka Asa hosi ya tiko ra Yuda, kutani Baaxa a sala a fuma. ₂₉Ú lo na sungula ku fuma, o dlayetela va ndyangu wa Yerobuwamu hinkwavo. A va herisa hinkwavo va ku bì, a nga siyi na un'we la hanyaka endyangwini wa Yerobuwamu. Leswi, a ku ri ku hetisa marito ya HOSI Xikwembu, lawa a xi ma vurile hi nomo wa nandza wa xona Ahiya wa le Xilo. ₃₀Swi vangiwile hi swidyoho leswi Yerobuwamu a swi endleke, ni leswi a dyohiseke Vaisraele ha swona, hikuva ha swona a a hlundzukisile ngopfu HOSI Xikwembu xa Israele.

₃₁Mintirho leyin'wana ya Nadabu, ni hinkwaswo leswi a swi endleke, swi tsariwile eka “Buku ya Matimu” ya tihosi ta Israele. ₃₂Kutani Asa na Baaxa hosi ya tiko ra Israele a vo tshamela ku hlaselana.

₃₃Hi lembe ra vunharhu ra ku fuma ka hosi Asa le Yuda, Baaxa n'wana Ahiya a sungula ku fuma tiko ra Israele, a ri eTirisa, a fuma kona malembe ya 24. ₃₄Baaxa a endla leswo biha emahlweni ka HOSI Xikwembu, a hanya hi tindlela ta Yerobuwamu, a dyoha ku fana na yena, a dyohisa ni Vaisraele.