I Tikronika 26

₁Varindzi va le tinyangweni a va avanyisiwile hi mintlawa. Endyangwini wa va ka Kora, a ku ri na Mexelemiya n'wana Kore, ntukulu wa Abiyasafa. _2-3Mexelemiya loyi a a ri ni vana va 7; mavito ya vona hi ku tlhandlamana ka vona, hi lawa: Zakariya, na Yediyaele, na Zebadiya, na Yatiniele, na Elamu, na Yohanani, na Eli-Howenayi.

_4-5Obede-Edomu a a ri ni vana va 8 hikuva Xikwembu a xi n'wi katekisile; mavito ya vona hi ku tlhandlamana ka vona, hi lawa: Xemaya, na Yozabadi, na Yowa, na Sakara, na Netanele, na Amiele, na Isakara, na Pewuletayi. ₆Xemaya n'wana Obede-Edomu na yena ú kumile vana va xinuna lava nga hundzuka varhangeri endyangwini wa ka vona, hikuva a va ri tinhenha. ₇Vana va kona hi lava: Otini, na Refaele, na Obede, na Elizabada, na Elihu, na Semakiya; lavambirhi vo hetelela a va tlula vamakwavo hi vunhenha. ₈Vavanuna hinkwavo va ndyangu wa ka Obede-Edomu a va ri 62; hinkwavo a va ri tinhenha, va tiva ntirho wa vona.

₉Ndyangu wa va ka Mexelemiya wona a wu ri ni vavanuna va 18 lava a va ri tinhenha.

_10-11Hosa, wa ndyangu wa ka Merari, yena a a ri ni vana va mune va xinuna, va nga lava: Ximri, na Hilkiya, na Tebaliya, na Zakariya. Ximri a a nga ri mativula, kambe tata wa yena Hosa a a n'wi vekile ku va murhangeri exikarhi ka vamakwavo. Va ka Hosa hinkwavo a va ri 13.

₁₂Varindzi lava va le tinyangweni, swin'we ni varhangeri va mindyangu ya ka vona, a va rhwexiwile mintirho eTempeleni, ku fana ni Valevhi lavan'wana. ₁₃Mintirho leyi ya ku rindza etinyangweni ta Tempele, Valevhi lava a va phakelana yona hi ku hoxa vuhlolotwana, byi hoxiwa hi lavakulu ni lavatsongo hi ku ya hi mindyangu ya ka vona. ₁₄Vuhlolotwana byi kombile Xelemiya ku rindza nyangwa ya le vuxeni; nyangwa ya le n'walungwini yi nyikiwa Zakariya n'wana Xelemiya, munhu wo tlhariha la xiximekaka. ₁₅Obede-Edomu a nyikiwa nyangwa ya le dzongeni ku yi rindza, kutani vanhu va yena va nyikiwa ku rindza yindlu yo hlayisela swakudya eka yona. ₁₆Kutani vuhlolotwana byi komba Xupimi na Hosa ku va varindzi va nyangwa ya le vupeladyambu ni va nyangwa leyi vuriwaka Xalekete, laha gondzo ri sungulaka kona ku tlhandluka.

Varindzi a va nghena entirhweni wa vona hi ku landzelelana: ₁₇Enyangweni ya le vuxeni, a ku rindza Valevhi va 6 hi siku, hi ku landzelelana ka vona; kasi enyangweni ya le n'walungwini ni ya le dzongeni, a ku rindza vanhu va mune hi siku; yindlu leyi swakudya a swi hlayisiwa eka yona a yi rindziwa hi mintlawa mimbirhi hi siku, ntlawa wun'we wu ri ni varindzi vambirhi. ₁₈Xivava xa le vupeladyambu bya Tempele a xi rindziwa hi vanhu va mune hi tlhelo ra gondzo ehandle, kasi endzeni a xi rindziwa hi vanhu vambirhi. ₁₉Leyi hi yona mintlawa ya va ka Kora ni va ka Merari lava a va rindza tinyangwa ta Tempele.

₂₀Van'wana va ka Levhi a va rhwexiwile ntirho wa ku hlayisa xuma xa Tempele, ni wa ku tamela tinyiko leti humeseriwaka HOSI Xikwembu. ₂₁Ladani, un'wana wa va ka Gerixoni, ú vile ni vana lava nga hundzuka varhangeri va mindyangu ya ka vona; exikarhi ka vona a ku ri na Yehieli. ₂₂Vana va Yehieli i Zetamu, na Yuwele; a va rhwexiwile ntirho wa ku hlayisa xuma xa Tempele. ₂₃Exikarhi ka va ka Amirama, ni va ka Yisihara, ni va ka Hebroni, ni va ka Uziele, ₂₄Xebuwele n'wana Gerixomu ntukulu wa Muxe a a ri murhangeri wa lava rindzaka vuhlayiselo bya xuma xa Tempele. ₂₅Endyangwini wa ka vona, a ku ri na Xelomoto n'wana Zikri, wa Yoramu, wa Yexaya, wa Rehabiya, wa Eliezere. ₂₆Xelomoto loyi ni vamakwavo a va rhwexiwile ntirho wo hlayisa hinkwaswo leswi nyiketiweke eka Xikwembu, swi huma eka hosi Davhida, ni ka varhangeri va mindyangu, ni ka vafambisi va masocha ya 1 000 ni ya 100, ni le ka tindhuna letin'wana. ₂₇Swilo leswi va swi phangheke enyimpini, a va swi humesile leswaku swi ta fambisa mintirho ya Tempele. ₂₈Xelomoto ni vamakwavo a va hlayisa ni tinyiko hinkwato leti humeseriweke Xikwembu hi Samiele mavonakule, na Sawulo n'wana Kixi, na Abinere n'wana Nere, na Yowabu n'wana Seruya.

₂₉Eka va ka Yisihara, ku hlawuriwile Kenaniya ni va ndyangu wa ka vona, leswaku va tsala kumbe ku avanyisa timhaka ta Vaisraele leti humelelaka ehandle ka Tempele. ₃₀Exikarhi ka va ka Hebroni, ku hlawuriwile Haxabiya ni tinhenha ta ka vona to ringana 1 700, leswaku va sirhelela Vaisraele lava nga vupeladyambu bya Yordani, va tirhela HOSI Xikwembu ni hosi ya tiko. ₃₁Murhangeri wa va ka Hebroni hinkwavo hi mindyangu ya vona, a a ri Yeriya. Hi lembe ra vu-40 ra ku fuma ka hosi Davhida, ku lavisisiwile timhaka, kutani ku kumiwa tinhenha le Yazere etikweni ra Giliyadi. ₃₂Hiloko hosi Davhida a hlawula Yeriya ni tinhenha ta ka vona ta 2 700; vanhu lava a va ri varhangeri va mindyangu, kutani va vekiwa ku sirhelela va ka Rhuveni, ni va ka Gadi, ni va ka Manase lava nga vuxeni bya Yordani, va va fambisa etimhakeni hinkwato leti khumbaka Xikwembu, ni leti khumbaka hosi ya tiko.