Ku biwa ka matiko.
1Hi byebyo vuprofeta lebyi vuriweke hi Yehovha ehenhla ka tiko ra Hadiraka, byi ta tshama ehenhla ka Damaska; hikuva Yehovha u languta vanhu kukota loko a languta tinxaka hinkwato ta Israele. 2Byi tshama ni le henhla ka Hamata la nga vandzakana na yena, ni le henhla ka Tiri na Sidoni, hikuva Tiri u tlharihile ngopfu. 3Tiri u tiakele khokholo, u hlengeletile silivhere kukota ntshuri, ni nsuku, kukota ndzhope wa ndlela. 4Vonani, Hosi yi ta n'wi teka, yi ta hoxela matimba ya wona elwandle, kutani u ta hisiwa hi ndzilo.
5Axikeloni u ta swi vona a tshuka; na Gaza, a rhurhumela ngopfu, na yena Ekroni, hikuva u ta va ni tingana hikwalaho ka ku langutela ka yena. Gaza u ta lahlekelwa hi hosi ya yena, na Axikeloni a a nga ha akiwi. 6Vana va timbuya va ta aka Axidodo, kutani ndzi ta herisa ku tidzunisa ka Mufilista. 7Ndzi ta susa ngati ya yena enon'wini wa yena, ni manyala ya yena exikarhi ka meno ya yena; na yena, u ta salela Xikwembu xa hina, u ta kotisa hosi exikarhi ka Yuda, Ekroni a kota Muyebusi. 8Ndzi ta yima emahlweni ka yindlu ya mina, ndzi yi sirhelela eka mavandla, ni ka loyi a yaka ni loyi a tlhelaka, muxanisi a nga ha fambi eka vona, hikuva sweswi, ndzi vonile hi mahlo ya mina.
Ku pona ka Yerusalema.
9Tsaka ngopfu, mbhuri ya Siyoni; u ba mikulungwana, n'wana wa Yerusalema! Vona, hosi ya wena hi leyi; yi ta eka wena, hi la lulameke la nga ni ku hlayiseka, i xisiwana; la khandziyeke mbhongolo, xi nga ximbhongolwana xa xisati. 10Ndzi ta susa tigolonyi exikarhi ka Efrayimi, ni tihanci eka Yerusalema, kutani vurha bya nyimpi byi ta herisiwa. U ta vula ku rhula eka matiko, u ta fuma ku sukela elwandle rin'wana ku yisa elwandle rin'wana, ni ku suka enambyeni ku yisa makumu ya misava.
11Loko u ri wena, hikwalaho ka ngati ya ntwanano wa wena, ndzi ta tshunxa vakhomiwa va wena ekheleni leri nga riki na mati. 12Tlhelelani ekhokholweni, n'wina vakhomiwa lava nga ni ku tshemba! Namuntlha ndza vulavula, ndzi ri: Ndzi ta ku tlherisela kambirhi.
13Hikuva ndzi ta konga Yuda kukota vurha, ndzi byi rhiya hi Efrayimi; ndzi ta pfuxa vana va wena, Siyoni, va pfukela vana va wena, Yavhani; ndzi ta ku endla u va ku kota fumu ra nhenha. 14Yehovha u ta humelela a tlakuka ehenhla ka vona, nseve wa yena wu ta copiwa kukota rihati. Hosi Yehovha u ta yimba nanga, u ta famba a ri exidzedzeni lexi humaka edzongeni. 15Yehovha wa tinyimpi u ta va sirhelela, va ta dya [valala va vona], va kandziya maribye ya swipelupelu; va ta nwa, va huvela kukotisa loko ku nga hi vhinyo; va ta tala kukotisa nkambana wa magandzelo, kukota tinhla ta alitari. 16Yehovha, Xikwembu xa vona, xi ta va ponisa hi siku rero, kukota ntlhambi lowu nga tiko ra yena; hikuva va ta kota maribye lama vangamaka ya harhi ya vuhosi etikweni ra yena. 17Hikuva ku saseka ka vona ku ta va lokukulu! Koro yi ta kurisa varisanyana, ni vhinyo leyintshwa vanhwanyana.
