VARHOMA 9

₁Ndzi vula ndzi tiyisa emahlweni ka Kriste, a ndzi hembi, ripfalo ra mina ri ndzi yimela hi Moya lowo Kwetsima, loko ndzi ku: ₂Ndzi ni gome lerikulu, ni swirilo leswi nga heriki swi kona embilwini ya mina; ₃hikuva, loko ndzi ri mina, ndzi nga rhandza ku va anathema, ndzi hambanyisiwa na Kriste, hikwalaho ka vamakwerhu lava nga rixaka rin'we na mina hi nyama, ₄va nga Vaisraele, volavo, ku hlayiwa vana ku nga ka vona, ni ku kwetsima, ni ntwanano, ni nawu, ni ku gandzela, ni ku tshembisiwa; ₅hi vona lava humaka eka vatatana, lava Kriste a humeke eka vona hitlhelo ra nyama, yena la nga ehenhla ka swilo hinkwaswo, Xikwembu lexi vongiwaka hilaha ku nga heriki. Amen!

₆Hambiswiritano, a hileswaku rito ra Xikwembu ri wile; hikuva a hi hinkwavo lava humeke eka Israele lava nga Vaisraele; ₇kambe na vona lava nga va rixaka ra Abrahama, a hi hinkwavo va nga vana va yena; kambe ku vuriwile leswaku: “Lava nga ta vuriwa va rixaka ra wena, va ta huma eka Isaka.” ₈Hi leswaku lava nga vana hi nyama, a hi vona lava nga vana va Xikwembu, kambe vana va ku tshembisiwa, hi vona lava vuriwaka vana. ₉Hikuva rito ra ku tshembisa, hi rona leri nge: “Ndzi ta ta hi nkarhi wolowo, kutani Sara u ta va ni n'wana wa wanuna.” ₁₀A hi mhaka yoleyo ntsena, kambe a swi ri tano ni ka Rhaveka, loyi a nga tika nyimba hi Isaka, tata wa hina; ₁₁hikuva, kuteloko mahahla ma nga si velekiwa, ma nga si endla swo saseka ni swo biha, leswaku ku ta vonaka leswaku makungu ya Xikwembu ma tiyile, loko xi hlawurile munhu ku nga ri hi mitirho, kambe ku ri hi ku rhandza ka la vitanaka, ₁₂Rhaveka u byeriwile leswaku: “Lonkulu u ta tirhela lontsongo,” ₁₃kukota leswi tsariweke leswaku: “Ndzi rhandzile Yakobo, kambe ndzi vengile Esawu.”

₁₄Kutani hi ta ku yini? Xana ku homboloka ku kona eka Xikwembu xana? Niswitsanana! ₁₅Hikuva xi te eka Muxe: “Ndzi ta tsetselela loyi ndzi n'wi tsetselelaka, ndzi ta twela vusiwana loyi ndzi n'wi twelaka vusiwana.” ₁₆Hikwalaho a hi mhaka ya loyi a rhandzaka, ni ya la tsutsumaka; kambe i ya Xikwembu lexi tsetselelaka. ₁₇Hikuva Tsalwa ri te eka Faro: “Leswi ndzi ku pfuxeleke swona, hileswaku ndzi kombisa matimba ya mina ha wena, ni leswaku vito ra mina ri twakala emisaveni hinkwayo.” ₁₈Loko swi ri tano xi tsetselela loyi xi rhandzaka ku n'wi tsetselela; kambe xi nonon'hwisa loyi xi rhandzaka ku n'wi nonon'hwisa.

₁₉Kutani u ta ku eka mina: “Xana xa ha vilela ha yini-ke? Hikuva i mani la nga alaka ku rhandza ka xona xana?” ₂₀Kambe wena munhu, u mani loko u tengisa Xikwembu? Xana mbita yi nga ku eka loyi a yi vumbeke: “U ndzi endlisele yini xileswi xana?” ₂₁Kumbexana muvumbi a nga na matimba ya ku endla hi nkanyanga wun'we wa vumba mbita yin'we leyi dzunisiwaka, ni yin'wana leyi nga dzunisiwiki xana? ₂₂Kambe loko Xikwembu xi rhandzile ku kombisa vukari bya xona ni ku twarisa matimba ya xona, xi honisile hi mbilu leyo leha ngopfu timbita ta vukari leti lunghiseriweke ku lahleka, ₂₃leswaku xi twarisa hi vukulu bya ku kwetsima ka xona etimbiteni ta ku tsetseleriwa, leto ingi xi ti lunghisele ku kwetsima, ka ha ri eku sunguleni; ₂₄hikwalaho xi hi vitaneke, ku nga ri exikarhi ka Vayuda ntsena, kambe ni le xikarhi ka vamatiko. ₂₅Kukota leswi xi nga vula eka Hosiya, xi te: “Tiko leri nga riki ra mina, ndzi ta ri vula tiko ra mina; ni loyi a a nga rhandziwiki, ndzi ta n'wi vula murhandziwa.” ₂₆“Kutani exivandleni xolexo ingi va byeriwile eka xona leswaku: ‘N'wina a mi tiko ra mina!’ Hi kona va nga ta vuriwa ‘vana va Xikwembu lexi hanyaka.’ ” ₂₇Kambe, na yena Esaya u huwelele ehenhla ka Israele, a ku: “Hambi ntsengo wa vana va Israele wu nga kotisa sava ra lwandle, ku ta hlayiseka ntlawanyana ntsena; ₂₈hikuva Hosi yi ta hetisa mhaka, yi yi tsema xikan'we hi ku lulama; yi ta komisa mhaka emisaveni.” ₂₉Kukota leswi Esaya a nga vula eku sunguleni a ku: “Loko Hosi ya mavandla a yi nga hi siyelanga vatukulu, a hi ta endliwa kokota Sodoma, a hi ta fana na Gomora.”

₃₀Xana hi ta ku yini-ke? Hi ta ku: “Vamatiko lava ngi va nga lavi ku lulama, va ku kumile, ku nga ku lulama loku humaka eku pfumeleni; ₃₁kasi Vaisraele lava nga lava nawu wa ku lulama, a va kumanga nawu wa ku lulama.” ₃₂Hikwalaho ka yini-ke? Hikuva a va ku lavanga hi ku pfumela, kambe va ku lavile hi mitirho ya nawu, hikuva va khunguvanyekile eribyeni ra ku khunguvanyisa, ₃₃hilaha ku tsariweke leswaku: “Vonani, ndzi veka eSiyoni ribye ra ku khunguvanyisa, ni ribye leri wisaka; kutani: La pfumelaka eka yena, a nga ka a nga vi na tingana.”