Xinyimpfana xi lemula ku tiyisa kantlhanu na kambirhi.
1Kuteloko xi lemule ku tiyisa kantlhanu na kambirhi, ku va ni ku rhula etilweni hi nkarhi wa hafu ya xikhati. 2Kavaloko ndzi vona tintsumi ta ntlhanu na timbirhi leti yimeke emahlweni ka Xikwembu, ti nyikiwa tinanga ta ntlhanu na timbirhi. 3Kutani ku ta ntsumi yin'wana yi yima ealitarini, yi tamele ximbitana xa nsuku, yi nyikiwa mirhi ya risuna leyo tala ku yi humesa ni swikhongelo swa vakwetsimi hinkwavo ealitarini ya nsuku leyi nga emahlweni ka xiluvelo. 4Kutani musi wa mirhi ya risuna, lowu humaka evokweni ra ntsumi, wu tlhandlukela eka Xikwembu, wu ri ni mikhongelo ya vakwetsimi. 5Kutani ntsumi yi teka ximbitana, yi xi tata hi ndzilo wa alitari, yi xi hoxa emisaveni; kutani ku humelela marito, ni ku pfuma, ni ku hatima, ni ku tsekatseka ka misava.
Tinanga ta mune leto sungula.
6Kavaloko tintsumi ta ntlhanu na timbirhi leti ngi ti ri ni tinanga ta ntlhanu na timbirhi, ti tilunghisela ku yimba tinanga.
7Ntsumi leyo rhanga yi yimba nanga ya yona, kutani ku va ni xihangu ni ndzilo, swi hlangane ni ngati, swi hoxiwa emisaveni; kwalaho tlhelo ra vunharhu ra misava ri tshwa, ni ku avanyisa ka vunharhu ka mirhi yi tshwa, ni byanyi hinkwabyo bya rilambyana byi tshwa.
8Ntsumi ya vumbirhi yi yimba nanga ya yona, kutani ku vonaka xilo lexo nge i ntshava leyikulu leyi pfurhaka, yi hoxiwa elwandle; kutani ku avanyisa ka vunharhu ka mati ya lwandle ku hundzuka ngati. 9Kutani ku avanyisa ka vunharhu ka swivumbiwa leswi hanyaka leswi ngi swi ri elwandle, swi fa, ni ku avanyisa ka vunharhu ka mabyatso ma lova.
10Ntsumi ya vunharhu yi yimba nanga, kutani nyeleti leyikulu yi wa hi le tilweni, yi pfurha kukota rivoningo; kutani yi wela ehenhla ka ku avanyisa ka vunharhu ka milambu ni ka swihlovo swa mati. 11Vito ra nyeleti leyi, a ri ri Absinta; kutani ku avanyisa ka vunharhu ka mati ku hundzuka Absinta; kutani vanhu lavo tala va fa hi mati lawa, hikuva ma hundzukile lama bavaka.
12Ntsumi ya vumune yi yimba nanga, kutani ku biwa ku avanyisa ka vunharhu ka dyambu, ni ku avanyisa ka vunharhu ka n'weti, ni ku avanyisa ka vunharhu ka tinyeleti, leswaku ku avanyisa ka vunharhu kuloku ku endliwa munyama; kutani ku avanyisa ka vunharhu ka siku ku nga vi na ku vonakala, ni vusiku byi va tano.
13Kavaloko ndzi languta, kutani ndzi twa ntsumi leyi hahaka empfhukeni wa le tilweni, yi ku hi rito leri tlakukeke: “Ku ni khombo, ku ni khombo, ku ni khombo eka lava akeke emisaveni hikwalaho ka marito lama seleke ya tinanga ta tintsumi letinharhu leti nga ta ti yimba.”
