NHLAVUTELO 5

₁Kutani ndzi vona evokweni ra xinene ra la tshameke exiluvelweni buku leyi tsariweke endzeni ni le handle, yi tiyisiwe hi mifungho ya ntlhanu na mimbirhi.

₂Kutani ndzi vona ntsumi ya matimba leyi huwelelaka hi rito lerikulu, yi ku: “I mani la fanelaka ku pfula buku ni ku lemula ku tiyisa ka yona?” ₃Kutani a ku vanga na munhu etilweni, ni la emisaveni, ni le hansi ka misava la swi koteke ku pfula buku ni ku yi languta. ₄Kutani mina ndzi rila ngopfu, hikuva a ku kumiwanga loyi a fanelaka ku pfula buku ni ku yi languta. ₅Kutani un'wana wa vakulukumba a ku eka mina: “U nga rili, vona, nghala ya rixaka ra Yuda, rimitsu ra Davhida yi hlurile leswaku yi ta pfula buku ni ku lemula ku tiyisa kantlhanu na kambirhi ka yona.”

₆Kutani ndzi vona exikarhi ka xiluvelo ni swivumbiwa leswi hanyaka leswa mune, ni le xikarhi ka vakulukumba, xinyimpfana lexi ngi xi ri kona, lexi ngi xi tlhaviwile, xi ri ni timhondzo ta ntlhanu na timbirhi, ni mahlo ya ntlhanu na mambirhi, leyi nga mimoya ya ntlhanu na mimbirhi va Xikwembu, leyi rhumiweke hinkwako la emisaveni. ₇Kutani xi ta, xi teka buku evokweni ra xinene ra loyi a tshameke exiluvelweni. ₈Kuteloko xi tekile buku, swivumbiwa leswi hanyaka leswa mune, ni vakulukumba va makume mambirhi na mune va khinsama emahlweni ka xinyimpfana, un'wana ni un'wana a tamele haripa, ni ximbitana xa nsuku lexi teleke mirhi ya risuna, swi nga swikhongelo swa vakwetsimi. ₉Kutani va yimbelela risimu lerintshwa, va ku: “U lulameriwe ku teka buku ni ku lemula ku tiyisa ka yona; hikuva u tlhaviwile, kutani u kutsulele Xikwembu hi ngati ya wena vanhu va tinxaka hinkwato, ni va tindzimi hinkwato, ni va swivongo hinkwaswo, ni va matiko hinkwawo; ₁₀kambe u va vekile tihosi ni vaprista eka Xikwembu xa hina, kutani va ta fuma emisaveni.”

₁₁Kuteloko ndzi langutile, ndzi twa rito ra tintsumi leto tala leti rhendzeleke xiluvelo, ni swivumbiwa leswi hanyaka leswa mune, ni vakulukumba; ntsengo wa vona a wu ri wa makume ya magidigidi ya magidigidi, ni magidigidi ya magidigidi; va ku hi rito lerikulu: ₁₂“Xinyimpfana lexi tlhaviweke xi lulameriwe ku teka vuhosi, ni vukosi ni vutlhari, ni matimba, ni xichavo ni ku kwetsima, ni ku khensiwa.” ₁₃Kutani ndzi twa swivumbiwa hinkwaswo swa le tilweni, ni swa la emisaveni, ni leswi nga ehansi ka misava, ni leswi nga elwandle, ni hinkwaswo leswi nga eka swona, swi ku: “Eka loyi a tshameke exiluvelweni, ni ka Xinyimpfana, a ku ve ku khensiwa, ni xichavo, ni ku kwetsima, ni matimba hilaha ku nga heriki!” ₁₄Kutani swivumbiwa leswi hanyaka leswa mune swi ku: “Amen!” Kutani vakulukumba va makume mambirhi na mune va khinsama, va gandzela.