NHLAVUTELO 14

₁Kutani ndzi languta, ndzi vona Xinyimpfana xi yimile entshaveni ya Siyoni, xi ri ni lava tsariweke vito ra xona emimombyeni ya vona, va ri 144 000. ₂Kutani ndzi twa rito leri humaka etilweni leri fanaka ni mpfumawulo wa mati layo tala, ni mpfumawulo wa ku pfuma lokukulu ka tilo; kutani rito rero ndzi ri tweke ri fana ni rito ra lava yimbelelaka hi tiharipa loko va ba tiharipa ta vona. ₃A va yimbelela risimu lerintshwa emahlweni ka xiluvelo, ni le mahlweni ka swivumbiwa leswi hanyaka swa mune, ni le mahlweni ka vakulukumba, kutani a ku nga ri na munhu la swi kotaka du dyondza risimu lero, loko va nga ri lava 144 000 lava kutsuriweke emisaveni. ₄Hi lava nga tinyamisangiki hi vavasati, hikuva va tengile; hi lava landzaka Xinyimpfana hinkwako laha xi yaka kona; va kutsuriwile exikarhi ka vanhu leswaku swi va swirhangana eka Xikwembu ni ka Xinyimpfana. ₅Mavunwa a ma kumiwangi emilon'wini ya vona, hikuva va pfumale xivati.

₆Kutani ndzi vona ntsumi yin'wana leyi hahaka exikarhi ka tilo, yi tamele Evhangeli leyi nga riki na ku hela, ku yi dyondzisa lava akeke emisaveni, va ri va matiko hinkwawo, ni tinxaka hinkwato, ni swivongo hinkwaswo, ₇yi vula hi rito leri tlakukeke yi ku: “Chavani Xikwembu mi xi dzunisa, hikuva nkarhi wa ku avanyisa ka xona wu fikile; khinsamelani la endleke tilo ni misava, ni lwandle, ni swihlovo swa mati.”

₈Kutani ntsumi yin'wana ya vumbirhi yi ku: “U wile, u wile, Babilona, muti lowukulu, hikuva u nwisile matiko hinkwawo vhinyo ya vukari bya vuoswi bya yena.”

₉Kambe ntsumi ya vunharhu yi ti landzela, yi vula hi rito leri tlakukeke yi ku: “Kungakuloko munhu a khongela xivandza ni xifaniso xa xona, a teka ni mfungho emombyeni wa yena, kumbe evokweni ra yena, ₁₀na yena u ta nwa vhinyo ya vukari bya Xikwembu, leyi cheriweke yi nga hlanganisiwanga exinwelweni xa ku kariha ka xona; kutani u ta xanisiwa endzilweni ni le xivavuleni, emahlweni ka tintsumi leto kwetsima, ni le mahlweni ka Xinyimpfana. ₁₁Musi wa ku xaniseka ka vona wu mbuluka hi masiku ni masiku, kutani lava gandzelaka xivandza ni xifaniso xa swona, va nga ka va nga kumi ku wisa vusiku ni nhlekanhi, hambi va ri lava amukeleke mfungho wa vito ra xona.” ₁₂Hilaha ku nga kona ku tiyisela ka vakwetsimi, va nga lava hlayisaka ku lerisa ka Xikwembu, ni ku pfumela eka Yesu.

₁₃Kutani ndzi twa rito leri humaka etilweni, ri ku: “Tsala: Ku katekile vafi lava felaka eHosini, ku sungula sweswi!” Moya wu ri: “Ina, leswaku va phyuphya emitirhweni ya vona, hikuva mitirho ya vona ya va landzela.”

₁₄Kavaloko ndzi languta, kutani vonani, a ku ri ni papa lero basa epapeni, ku tshamile un'wana la fanaka ni N'wana wa Munhu, a rhwele enhlokweni harhi ya nsuku, a tamele rihwevo lero kariha evokweni ra yena. ₁₅Kutani ntsumi yin'wana yi huma etempeleni, yi huwelela hi rito leri tlakukeke eka la tshameke epapeni, yi ku: “Hoxa rihwevo ra wena u tshovela, hikuva nkarhi wa ku tshovela wu fikile, hikuva mavele ya misava ma vupfile.” ₁₆Kutani la tshameke epapeni a hoxa rihwevo ra yena emisaveni, kutani misava yi tshoveriwa.

₁₇Ntsumi yin'wana yi huma etempeleni ya le tilweni, yi tamele, na yona, rihwevo lero kariha. ₁₈Kutani ntsumi yin'wana yi huma ealitarini, yi ri ni matimba henhla ka ndzilo; kutani yi huwelela hi rito lerikulu eka loyi a tameleke rihwevo lero kariha, yi ku: “Hoxa rihwevo ra wena ro kariha, u kha mihandzu ya vhinya ya misava hikuva mihandzu ya yona yi vupfile.” ₁₉Kavaloko ntsumi yi hoxa rihwevo ra yona emisaveni, yi tshovela vhinya ya misava, kutani yi hoxa mihandzu leyi tshoveriweke exikhuvutweni lexikulu xa vukari bya Xikwembu. ₂₀Kutani xikhuvuto xi khuvuteriwa ehandle ka muti; ku huma ngati exikhuvutweni ku fikela ematon'weni ya tihanci, hi mpfhuka wa tistadiya ta 1 600.