Ku ni ku wisa ka vana va Xikwembu.
Pisalema. Risimu ra siku ra Savata.
1Ku dzunisa Yehovha, i mhaka leyo saseka,
Ni ku twarisa vito ra wena, La nge henhlahenhla,
2Ku tivisa vunene bya wena nimpundzu,
Ni ku tshembeka ka wena nivusiku,
3Hi xitendze xa tingoti ta khume, ni psalteri,
Ni mimpfumawulo leyi nandzikaka ya haripa.
4Hikuva wa ndzi tsakisa hi mitirho ya wena, Yehovha!
Ndzi va ndzi huvela hi ku tsaka mitirho ya mavoko ya wena.
5A hi ku kula ka mitirho ya wena, Yehovha!
Ni miehleketo ya wena yi entile swonghasi!
6Xihunguki xi nge yi tivi,
Ni wa rihlanyi a nge yi twisisi.
7Hambi vadyohi va mila tanihi byanyi,
Ni vahomboloki loko va andza,
Va ta herisiwa ni makumu.
8Kambe wena Yehovha, u tlakukile hi laha ku nga heriki!
9Hikuva vona, valala va wena,
Yehovha Valala va wena va ta fa.
Hinkwavo lava endlaka swo biha va ta hangalasiwa.
10U tlakusa rimhondzo ra mina kukota ra nyarhi;
Ndzi totiwile hi mafurha lamantshwa ya munyatsi.
11Mahlo ya mina ma ta tsakela ku vona valala va mina,
Ni tindleve ta mina ku yingisa lava ndzi pfukelaka.
12Lava lulameke va mila kukota murhi wa ncindzu,
Va kula kukota murhi wa kedari ya Lebanoni.
13Loko va simekiwa endlwini ya Yehovha,
Va hluka erikupakupeni ra Xikwembu xa hina,
14Va ha veleka vana eku dyuhaleni ka vona,
Va ta tala hi mongo va va lavantshwa,
15Va ta twarisa ku lulama ka Yehovha.
Hi yena ribye ra mina, a ku na ku homboloka eka yena.
