TIPISALEMA 91

₁La tshamaka exihundleni xa Loyi a nga henhlahenhla,

U wisa endzhutini wa La nga ni matimba hinkwawo.

₂Ndzi ku eka Yehovha:

“U xichavelo ni khokholo ra mina,

U Xikwembu xa mina, lexi ndzi xi tshembaka!”

₃Hi yena la ku tshunxaka entlhan'wini wa muhloti,

Ni le ntungwini lowu herisaka.

₄U ta ku funengeta hi tinsiva ta yena.

U ta kuma xisirhelo ehansi ka timpapa ta yena;

Vunene bya yena, i xitlhangu ni nhlungula.

₅U nga ka u nga chavi michavo ya vusiku,

Ni loko yi ri miseve leyi hahaka ninhlekanhi,

₆Hambi wu ri ntungu lowu ngungumelaka emunyameni, Kumbe mavabyi lama dlayaka ninhlekanhi lowukulu.

₇Hambi vanhu va khume ra madzana va nga wa etsheveni ra wena,

Ni dzana ra madzana evokweni ra xinene ra wena,

Wena, rifu ri nga ka ri nga ku tshineleri;

₈U ta languta ntsena hi mahlo ya wena,

U ta vona hakelo ya vanhu va lunya.

₉Hikuva, wena Yehovha, u xichavelo xa mina!

U tihlawulele Muungameri la tlakukeke xi va xichavelo xa wena.

₁₀Khombo ri nga ka ri nga ku fikeri,

Ni mhangu yi nga ka yi nga ku weri.

₁₁Hikuva u ta ku lerisela tintsumi ta yena,

Ti ku hlayisa etindleleni ta wena hinkwato;

₁₂Ti ku khawutela emavokweni ya tona,

Leswaku nenge wa wena wu nga tshuki wu khunguvanyeka hi ribye.

₁₃U ta kandziyela nghala ni mhiri,

U ta phyandlasa xinghalana ni ngwenya.

₁₄Leswi a ndzi rhandzaka ndzi ta n'wi kutsula;

Ndzi ta n'wi tlakusa,

hikuva u tivile vito ra mina,

₁₅U ta vitana eka mina, kutani ndzi ta n'wi hlamula;

Ndzi ta va na yena ekhombyeni,

Ndzi n'wi kutsula ni ku n'wi dzunisa;

₁₆Ndzi ta n'wi xurhisa hi masiku layo tala,

Ni ku n'wi kombisa ku hlayiseka ka mina.