Ku tsaka ka munhu la akeke endlwini ya Xikwembu.
Eka mufambisi wa vasimi. Ha Gati. Pisalema ya vana va Kore.
1A hi ku nandziha ku tshama endlwini ya wena,
Yehovha wa tinyimpi!
2Moya wa mina wu hisekela ni ku navela rikupakupa ra yindlu ya Yehovha,
Mbilu ni nyama ya mina swi huwelela eka Xikwembu lexi hanyaka.
3Swi tsandza ni xindzingiri xi ni xisaka,
Ni mbewulana yi ni yindlu, laha yi vekaka mavondlo ya yona kona.
Oho Yehovha wa tinyimpi, tialitari ta wena!
Hosi ya mina ni Xikwembu xanga!
4Ku katekile lava akeke endlwini ya wena!
Va ku dzunisa hi mikarhi.
5Ku katekile lava u nga matimba ya vona!
Etimbilwini ta vona va kuma tindlela leti pfulekeke.
6Loko va hundza enkoveni wa Baka,
Wu hundzuka xihlovo;
Ni mpfula ya hlovo yi va funengeta hi ndzalo.
7Loko va famba, va engeteriwa matimba,
Va kondza va ya humelela emahlweni ka Xikwembu le Siyoni.
8Oho Yehovha, Xikwembu xa tinyimpi, yingisa ku khongela ka mina!
Rhiya ndleve, oho Xikwembu xa Yakobo!
9Oho Xikwembu!
Wena xitlhangu xa hina, languta,
U vona mombo wa muhlawuriwa wa wena!
10Hikuva ku tshama siku rin'we endlwini ya wena,
Swi tlula khume ra madzana kun'wana.
Ndzi rhandza ku tshama erikupakupeni ra yindlu ya Xikwembu xanga,
Ku tlula ku tshama emitsongeni ya lavo biha.
11Hikuva Yehovha Xikwembu i dyambu ni xitlhangu,
Yehovha u nyika tintswalo ni ku kwetsima,
A nga aleri nchumu eka lava fambaka eku lulameni.
12Oho Yehovha wa tinyimpi, ku katekile la ku tshembaka!
