Ku onheka ka nsimu ya vhinya ya Yehovha.
Eka mufambisi wa vasimi. Hi risimu ra Xoxanim-Eduti. Pisalema ya Asafa.
1Rhiya ndleve, murisi wa Israele,
Wena la fambisaka Yosefa, tani hi ntlhambi,
Wena la tshamaka exikarhi ka tikerubu,
Humelela eku vonakaleni ka wena!
2Pfuxa vunhenha bya wena emahlweni ka Efrayimi, na Benjamini, na Manase. Kutani u ta hi pfuna.
3Oho Xikwembu, u tlhela u hi akisa,
U vonakisa mombo wa wena kutani hi ta ponisiwa!
4Yehovha, Xikwembu xa tinyimpi!
U ta karihela ku khongela ka tiko ra wena ku yisa kwihi?
5U ri phamela vuswa bya mihloti,
Kutani u va nwisa mihloti hi mpimo lowukulu.
6U hi endlile lava tengiwaka hi lava akisaneke na hina,
Kutani valala va hina va hi endlile xisandzu.
7Oho! Xikwembu xa tinyimpi, u tlhela u hi akisa,
U vonakisa mombo wa wena, kutani hi ta ponisiwa.
8U tsuvule vhinya etikweni ra Egipta,
U hlongorile matiko, kutani u yi simeka.
9U yi lunghisela misava,
Kutani yi nava timitsu, yi tata tiko,
10Tintshava ti khubumetiwa hi ndzhuti wa yona,
Kutani marhavi ya yona ma ve tani hi tikedari ta Xikwembu.
11Marhavi ya yona ma nava ku yisa elwandle,
Ni mahluke ya yona ku yisa enambyeni.
12Xana u hahlulele yini rihlampfu ra yona,
Leswaku yi ta tshoveriwa hi vahundzi hinkwavo,
13Yi tshoveleriwa hi tinguluve ta xihlahla,
Kutani swiharhi swa nhova swi tele ku ta dya kona?
14Oho vuya, Xikwembu xa tinyimpi!
Languta, u ri etilweni, kutani u vona!
U xiya vhinya leyi, u yi hlayisa!
15U sirheleta lexi voko ra wena ra xinene ri xi simekeke,
Ni n'wana loyi u tikuriseleke yena!
16Yi tshwile hi ndzilo, yi tsemiwile
Va hela hi ku tshinya ka mombo wa wena.
17Sirheleta munhu, wu nga ntirho wa voko ra wena ra xinene,
Ni n'wana wa munhu loyi u tihlawuleleke yena!
18Hi laha hi nga taka hi nga ha ku tshiki;
U engeta u hi hanyisa, kutani hi ta khongela vito ra wena!
19Yehovha, Xikwembu xa tinyimpi, hi pfuxe!
U vonakisa mombo wa wena, kutani hi ta ponisiwa!
