Ku khongela enhlomulweni lowukulu.
Eka mufambisi wa vasimi. Hi risimu ra Yedutuni. Pisalema ya Asafa.
1Rito ra mina ri tlhandlukela eka Xikwembu, kutani ndzi huwelela;
Rito ra mina ri tlhandlukela eka Xikwembu, leswaku xi ta ndzi yingisa.
2Hi siku ra nchavo wa mina, ndzi lava Hosi,
Mavoko ya mina ma tshambulutiwa ni vusiku, ndzi nga wisi;
Moya wa mina wu ala ku chaveleriwa.
3Loko ndzi ringeta ku tsundzuka Xikwembu, ndza konya;
Ndzi anakanya, kutani moya wa mina wu karhala.
4U khoma tinxiyi ta mina ti pfulekile;
Ndza karhateka, ndzi kondza ndzi tsandzeka ku vulavula.
5Ndzi tsundzuka masiku ya khale,
Ni malembe lama hundzeke.
6Ndzi anakanya risimu ra mina nivusiku.
Ndzi vulavula hi mbilu ya mina,
Na wona moya wa mina wu anakanya.
7“Xana Hosi yi ta cukumetela makumu xana?
A yi nga ha tweli vusiwana xana?
8Xana rirhandzu ra yona ri herile kunene?
Xana rito ra yona ri hele matimba hi masiku ni masiku?
9Xana Xikwembu xi rivele ku twela vusiwana?
Kumbe evukarini bya xona xi pfarile xihlovo xa tintswalo ta xona xana?”
10Kutani mina ndzi ri:
“Leswi ndzi vavisaka,
Hi leswi voko ra La nge henhlahenhla ri nga ha riki rona.”
11Ndzi ta tsundzuka mitirho ya Yehovha,
Kunene ndzi anakanya mahlori ya wena ya khale.
12Ndzi ta vula mitirho ya wena hinkwayo,
Ndzi ta anakanya mitirho ya wena leyikulu.
13Oho Xikwembu!
Ndlela ya wena ya kwetsima!
Xi kwihi Xikwembu lexi nga lexikulu tani hi Xikwembu xana?
14Hi wena Xikwembu lexi tirhaka mahlori,
U kombisile exikarhi ka matiko matimba ya wena.
15Hi voko ra wena u kutsurile tiko ra wena
Vana va Yakobo ni va Yosefa.
16Mati ma ku vonile, oho Xikwembu!
Mati ma ku vonile, ma rhurhumerile,
Ni swidziva swi tsekatsekile.
17Mapapa ma halake mpfula hi maboboma ku pfuma ku twakele exibakabakeni,
Na yona miseve ya wena yi haha hi matlhelo hinkwawo.
18Ku pfuma ka wena ku twakele exihuhurini,
Tihati ti voningile misava,
Misava yi tsekatseka, yi rhurhumela.
19U tiboxele gondzo exikarhi ka lwandle,
Ni ndlela ya wena exikarhi ka mati lamakulu;
Kutani mitila ya wena a yi tiviwanga.
20U fambisile tiko ra wena tani hi ntlhambi,
Hi voko ra Muxe ni ra Aroni.
