TIPISALEMA 73

₁Kunene Xikwembu xi ni tintswalo eka Israele,

Eka lava nga ni timbilu to basa.

₂Hambiswiritano, milenge ya mina a yi lava ku ndzi wisa;

Mikondzo ya mina a yi lava ku rhetemuka;

₃Hikuva a ndzi navela lava tidzunisaka,

Loko ndzi vona ku tsaka ka lavo biha.

₄Kunene a va na ku xaniseka, ku fika eku feni ka vona,

Va hanya, miri wa vona wu kulukile,

₅A va tivi ku karhateka ka van'wana vanhu,

A va biwi swin'we ni van'wana vanhu,

₆Hikwalaho-ke, ku tikurisa ka vona i sindza eka vona.

Ku vutla ku va rhendzele tani hi nguvu;

₇Lunya ri huma etimbilwini ta vona leti noneke;

Va tshika mihahamo ya timbilu ta vona yi halaka,

₈Va sandza, va vulavula hi lunya ku xanisa;

Marito ya vona hi lama tlakukeke,

₉Va yisa milomu ya vona ku fika etilweni,

Kutani tindzimi ta vona ti fambafamba emisaveni.

₁₀Hikwalaho tiko ra vona ri languta tlhelo ra vona,

Kutani mati ya ku tala ma nwiwa ngopfu eka vona;

₁₁Va ri: “Xikwembu xi nga tivisa ku yini?

La nge henhlahenhla a nga swi tiva xana?”

₁₂Vonani, lavo biha va tano

Va tsakile hi masiku, va hlengeleta xuma.

₁₃Kunene mbilu ya mina ndzi yi basisele swahava,

Hambi ku ri ku hlamba mandla ya mina eku baseni,

₁₄Ndzi biwa hi masiku hinkwawo,

Hi siku rin'wana ni rin'wana ku layiwa ka mina ku kona nimixo.

₁₅Loko a ndzi ku: “Ndzi ta vulavula tani hi vona,”

Waswivo a swi ta va ku xenga rixaka ra vana va wena.

₁₆Kambe loko ndzi anakanyile timhaka leti, ku ti twisisa,

A swi nonon'hwa ngopfu emahlweni ka mina,

₁₇Ndzi kondza ndzi nghena evukwetsimelweni bya Xikwembu,

Kutani ndzi ehleketa ku hela ka vona.

₁₈Kunene u va veka etindleleni to rhetemuka,

U va wisa ehansi eku onhakeni.

₁₉Aha! Va herise ku yini kan'wekan'we,

Va susiwa, va herisiwa hi ku chava?

₂₀Swange i norho, loko va pfukile,

Wee Hosi, loko u pfuka, u ta sola xivumbeko xa vona.

₂₁Loko mbilu ya mina yi ri karhi yi dyiwa hi mbitsi,

Loko ndzi tlhaviwa exisutini,

₂₂A ndzi ri xiphukuphuku,

a ndzi nga twisisi nchumu;

Emahlweni ka wena a ndzi fana ni xiharhi.

₂₃Hambiswiritano, ndzi na wena hi masiku,

U ndzi khomile hi voko ra xinene;

₂₄U ta ndzi fambisa hi ku tsundzuxa ka wena,

Kutani u ta ndzi amukela eku kwetsimeni.

₂₅Ndzi na mani etilweni, loko a nga ri wena?

Ni la emisaveni ndzi tsakela wena ntsena.

₂₆Nyama ya mina, ni mbilu ya mina swi nga hela,

Kambe Xikwembu i ribye ra mbilu yanga,

I ndzhaka ya mina hi laha ku nga heriki.

₂₇Hikuva, waswivo lava tshinelaka ekule na wena va ta fa.

U herisa hinkwavo lava ku fularhelaka.

₂₈Loko ndzi ri mina, ku tshinelela Xikwembu, i rifuwo ra mina.

Ndzi vekile vuchavelo bya mina eka Hosi Yehovha,

Leswaku ndzi ta amba mitirho ya wena hinkwayo.