Xikwembu xi ta ba vaavanyisi lavo biha.
Eka mufambisi wa vasimi. “U nga herisi.” Risimu ra Davhida.
1Xana loko mi miyela, mi nga avanyisa hi ku lulama xana?
Xana mi avanyisa hi ku lulama n'wina vana va vanhu-ke?
2E-e, etimbilwini ta n'wina, mi endla leswo homboloka;
Etikweni, mi veka mitirho ya n'wina ya mahlundzu exikalweni.
3Lavo homboloka va hombolokile mpfhuka va tswariwa,
Vahembi va hambukile mpfhuka va hume ekhwirini.
4Va ni vuxungu lebyi fanaka ni bya nyoka,
Va fana ni mamba leyi nga yingisiki, leyi tisivaka tindleve,
5Leyi nga yingisiki rito ra vayimbeleri,
Ni rito ra mungoma la tlhariheke ngopfungopfu.
6Oho Xikwembu! Tshova meno emilon'wini ya vona;
Fayetela tinhlaya ta swinghalana,
oho Yehovha!
7A va nyuke kukotisa mati lama khulukaka!
A va cope miseve leyi tshoviweke ntsena!
8A va kotise holokompfa leyi nyukaka loko yi famba!
A va kotise xiholoti xa wansati lexi nga vonangiki dyambu!
9Loko timbita ta n'wina ti nga si twa swigatlu,
Leswa rihlaza kumbe leswa ku pfurha swi ta vutliwa hi xihuhuri.
10Lowo lulama u ta tsaka hi ku vona ku rihiseriwa;
U ta hlantswa milenge ya yena engatini ya lavo biha.
11Kutani vanhu va ta ku:
“Kunene hakelo yi kona ya la lulameke,
Kunene xi kona Xikwembu lexi avanyisaka emisaveni.”
