Xikhongelo xa munhu la ongiwaka hi va nakulobye.
Eka mufambisi wa vasimi. Hi magubu. Risimu ra Davhida.
1Oho Xikwembu!
Rhiyela xikhongelo xa mina ndleve,
U nga fularheli ku kombela ka mina!
Ndzi yingise, u ndzi hlamula.
2Ndza yingayinga eku vavisekeni ka mina, ndza tikarhata,
3Hikwalaho ka rito ra nala ni ku xanisa ka lowo biha;
Hikuva va ndzi vangela khombo, va ndzi hlongorisa hi ku leva.
4Mbilu ya mina yi rhurhumela endzeni ka mina,
Nchavo wa rifu wu ndzi khomile;
5Ku chava ni ku rhurhumela swi ndzi wele ehenhla,
Ku tsekatseka ku ndzi khomile hinkwako.
6Hi laha-ke ndzi nge:
“Aa! Ingi loko ndzi ri ni timpapa ta tuva,
A ndzi ta haha ndzi ya wisa kun'wana;
7Ndzi ta tsutsumela ekule,
Ndzi ya chavela emananga.
8A ndzi ta phonyoka hi ku hatlisa.
Ndzi rhangela matsamba ya mheho leyi hungaka, ni ya xidzedze.”
9U va mita, wee Hosi, hambanyisa tindzimi ta vona!
Hikuva ndzi vone ku pfukelana ni ku hlundzukelana emutini.
10Nhlekanhi ni vusiku swi tshama swi hiteka emakhokholweni ya wona;
Ku homboloka ni ku xaniseka swi tshama exikarhi ka wona.
11Vumbabva byi le ndzeni ka wona,
Ku xanisa ni ku kanganyisa a swi sukeli tihuvo ta wona.
12Hikuva a hi nala la ndzi solaka,
a ndzi ta n'wi byarha,
A hi loyi a ndzi vengaka la ndzi pfukeleke matimba,
A ndzi ta ya tumbela ekule na yena.
13Kambe hi wena, wanuna la ringanaka na mina,
La nga nakulorhi ni murhandziwa wa mina!
14Hina lava ngi hi hlamulana hi timhaka leto nandziha,
Lava ngi hi ya endlwini ya Xikwembu kun'we ni vunyingi!
15Rifu a ri va khome hi xipuku,
A va ngirimele exivandleni xa vafi va ha hanya!
Hikuva ku homboloka ku le tindlwini ta vona, ni le xikarhi ka vona.
16Loko ndzi ri mina, ndzi tshama ndzi huwelela eka Xikwembu,
Kutani Yehovha u ta ndzi ponisa.
17Nimadyambu, nimixo, ninhlekanhi, ndza konya, ndzi ni mahika;
Kambe u ta yingisa rito ra mina.
18U ta kutsula moya wa mina hi ku rhula enyimpini leyi va yi lwaka na mina;
Hikuva va tele lava lwaka na mina.
19Xikwembu xi ta yingisa,
Xi va hlamula,
Xona lexi tshamaka exiluvelweni xa xona hi masiku.
Hikuva a ku na ku hundzuka eka vona,
A va chavi Xikwembu.
20[Lowo biha] u tshambuluta voko, a khoma lava hanyeke hi ku rhula na yena,
A onha xinakulobye xa yena.
21Nomu wa yena wu tlula phehlwa hi ku nandziha;
Kambe ku lwa ku kona embilwini ya yena;
Marito ya yena ma tlula mafurha hi ku olova,
Kambe i mabanga lama hlomuriweke.
22Nyiketa Yehovha timhaka ta wena, u ta ku seketela;
A nga ka a nga pfumeli ni siku ni rin'we leswaku la lulameke a tsekatsekisiwa.
23Wena Xikwembu u ta va xikisa ekheleni ra ku lova;
Vanhu lava va nga va ngati ni va ku xisa,
Va nga ka va nga fiki exikarhi ka masiku ya vona;
Kambe mina ndzi tshembile wena.
