TIPISALEMA 51

₁Oho Xikwembu!

Ndzi twele vusiwana hi tintswalo ta wena;

Hi musa lowukulu wa wena, hlangula swidyoho swa mina.

₂Ndzi hlantswe kunene, u susa ku homboloka ka mina,

U ndzi basisa hi ku susa swivi swa mina,

₃Hikuva ndzi tivisisa xidyoho xa mina,

Ni xivi xa mina xi le mahlweni ka mina hi masiku hinkwawo.

₄Ndzi dyohele wena, wena ntsena;

Ndzi endlile leswo biha emahlweni ka wena,

Hi laha u nga ta va la lulameke loko u vulavula,

Ni loyi a tengeke loko u avanyisa.

₅Waswivo, ndzi tswariwile eku dyoheni,

Mana wa mina u ndzi velekile eswivini.

₆Kambe, u rhandza leswinene embilwini ya munhu,

Ndzi dyondzise vutlhari exihundleni xa moya wa mina!

₇Ndzi basise hi hisopa, hi kona ndzi nga ta tenga;

Ndzi hlantswe kutani ndzi ta basa ku tlula gamboko.

₈Ndzi byele ku khana ni ku tsaka,

Kutani marhambu lawa u ma tshoveke ma ta pfuka hi ku tsaka.

₉Tshika ku languta swidyoho swa mina,

U hlangula ku homboloka ka mina hinkwako.

₁₀Oho Xikwembu!

Vumba endzeni ka mina mbilu leyo tenga.

U tlhela u pfuxa endzeni ka mina moya lowo tiya.

₁₁U nga ndzi cukumeti ekule ni mombo wa wena,

U nga ndzi tekeli moya wa wena lowo kwetsima.

₁₂Ndzi tlherisele ku tsaka ka ku hlayiseka ka wena,

Ndzi va ndzi seketeriwa hi moya lowu lulameke!

₁₃Ndzi ta dyondzisa vadyohi tindlela ta wena,

Kutani vendlaswivi va ta vuyela eka wena.

₁₄Oho Xikwembu, Xikwembu xa ku hlayiseka ka mina!

Ndzi kutsule ka ngati leyi halatiweke,

Kutani ririmi ra mina ri ta twarisa ku lulama ka wena.

₁₅Hosi, pfula milomu ya mina,

Kutani nomu wa mina wu ta vula xidzumo xa wena.

₁₆Hikuva a ku tsakeli magandzelo, ingi ndzi ku humesele wona;

Kambe a ku tsakeri tiholokosta.

₁₇Magandzelo ya Xikwembu i moya lowu tshovekeke;

Oho Xikwembu! A ku soli mbilu leyi tshovekeke, leyi nga enhlomulweni.

₁₈Katekisa Siyoni hi nsovo wa wena,

Akisa rirhangu ra Yerusalema!

₁₉Hi kona u nga ta tsakela magandzelo ya ku lulama,

Ni tiholokosta, ni timhamba leti u humeseriwaka swirho hinkwaswo swa tona;

Hi kona va nga ta humesa tinkunzi ealitarini ya wena.