TIPISALEMA 48

₁Yehovha u nkulukumba,

U faneriwe hi ku vongiwa hinkwako,

Emutini wa Xikwembu xa hina, entshaveni ya xona ya ku kwetsima.

₂Yi sasekile swonghasi ntshava ya Siyoni, yi tsakisa misava hinkwayo.

Etlhelweni ra n'walungu, i muti wa hosi leyikulu;

₃Etindlwini ta wona ta vuhosi

Xikwembu xi tiviwa xi ri xichavelo lexi tlakukeke.

₄Hikuva, vonani, tihosi ti hlanganile, ti hundzile swin'we;

₅Ti wu vona, kutani ti hlamala,

Ti tshuka, ti tsutsuma hi ku hatlisa.

₆Ku rhurhumela ku ti khomile,

Kukotisa ku vaviseka loku khomaka wansati loko a veleka.

₇Hi mheho ya vuxa u tshovile tingalava ta Tarxixi.

₈Leswi hi swi yingiseke, hi swi vonile

Emutini wa Yehovha wa tinyimpi.

Emutini wa Xikwembu xa hina:

Xikwembu xi ta wu tiyisa hi laha ku nga heriki.

₉Oho Xikwembu, hi anakanya tintswalo ta wena!

Exikarhi ka tempele ya wena.

₁₀Hi laha vito ra wena ri vongiwaka, oho Xikwembu!

Swi tano ni ku dzuna ka wena ku yisa emakun'wini ya misava;

Voko ra wena ra xinene ri tele ku lulama.

₁₁A yi tsake ntshava ya Siyoni!

A va tsake vanhwanyana va Siyoni

Hikwalaho ka ku avanyisa ka wena.

₁₂Tsemakanyani exikarhi ka Siyoni, n'wi rhendzelekeni,

Hlayani makhokholo ya wona,

₁₃Langutisisani rirhangu ra wona,

Mi kambisisa tindlu ta wona ta vuhosi,

Mi ta ambela rixaka leri nga ta ta.

₁₄Hikuva Xikwembu lexi, i Xikwembu xa hina hi laha ku nga heriki;

Xi ta hi fambisa ku ya fika eku feni.