Khale ni sweswi.
Eka mufambisi wa vasimi. Ya vana va Kore. Risimu.
1Oho Xikwembu, hi swi twile hi tindleve ta hina,
Vatata wa hina va hi byerile
Mitirho leyi u yi endleke emasikwini ya vona,
Emasikwini ya khale.
2Hi voko ra wena u hlongorise vamatiko ku va akisa,
U herise vamatiko ku va anamisa.
3Hikuva a va tekangi tiko hi tlhari ra vona,
A hi voko ra vona leri nga va ponisa;
Kambe i voko ra wena ra xinene, i voko ra wena ni ku vonakala ka wena,
Hikuva u va rhandzile.
4Oho Xikwembu! U hosi ya mina:
Lerisa ku ponisa ka Yakobo!
5Ha wena hi ta himetela lava nga valala va hina;
Hi vito ra wena, hi ta kandziyela lava hi pfukaka.
6Hikuva a ndzi tshembi vurha bya mina,
Ni tlhari ra mina ri nga ka ri nga ndzi ponisi;
7Hikuva hi wena la hi ponisaka eka valala va hina,
La khomisaka lava hi vengaka tingana,
8Hi ta dzunisa Xikwembu hi masiku hinkwawo,
Hi twarisa vito ra wena hi laha ku nga heriki.
9Hambiswiritano u hi cukumetile, u hi funengete hi tingana,
U tshikile ku huma ni tinyimpi ta hina;
10U hi tlherisele ndzhaku emahlweni ka valala va hina,
Kutani lava hi vengaka va hi phanga.
11U hi nyiketile kukotisa tinyimpfu leti dyiwaka,
U hi hangalasile xikarhi ka vamatiko.
12U xavisele swahava tiko ra wena,
U ri xavisele lexi nga riki xa nkoka.
13U endle ha hina xilo xa ku soriwa eka lava akeke na hina,
Hi vungunyiwa ni ku hlekiwa hi lava hi rhendzelaka exikarhi;
14U hi endle xivuriso xa ku hleka exikarhi ka vamatiko;
Ni vanhu va hi nikinisela tinhloko.
15Tingana ta mina ti le mahlweni ka mina hi masiku,
Ni ku kanakana ku funengete mombo wa mina,
16Loko ndzi twa rito ra la ndzi rhukanaka a va a ndzi sandza,
Loko ndzi vona nala ni loyi a tirihiselaka.
17Leswi hinkwaswo swi hi humelele hambi hi nga ku rivalanga,
Hambi hi nga tshikanga ntwanano wa wena,
18Timbilu ta hina a ti ku fularhelanga,
Ni mikondzo ya hina a yi hambukanga ndlela ya wena.
19Leswaku u hi phyandlasa endhawini ya timhisi,
U va u hi funengeta hi ndzhuti wa rifu.
20Loko ngi hi rivele vito ra Xikwembu xa hina,
Hi tshambulutele swikwembu swimbe mavoko ya hina,
21Xana Xikwembu ingi xi nga swi tivanga,
Leswi xi tivaka leswi fihliweke etimbilwini xana?
22Kambe hi dlayiwa hi masiku hinkwawo hikwalaho ka wena,
Hi ringanisiwa ni tinyimpfu leti yisiwaka eku tlhaviweni.
23Pfuka! U etlelela yini, Hosi?
Pfuka! U nga hi cukumeteli makumu!
24U hi fihlela yini mombo wa wena?
U rivele ha yini khombo ra hina ni maxangu ya hina?
25Hikuva mimoya ya hina yi khunarhele entshurini,
Miri ya hina yi namarhele misava.
26Pfuka, u ta hi pfuna!
Hi kutsule hikwalaho ka vunene bya wena!
