Yehovha i vuchavelo bya ku tiya.
Ya Davhida, siku a nga tihundzula wa rihlanyi emahlweni ka Abimeleke, a hlongoriwa hi yena, a baleka.
1Ndzi ta twarisa Yehovha hi masiku hinkwawo;
Ku dzunisa ka yena ku ta va enon'wini wa mina hi masiku.
2Moya wanga wu ta tidzunisa ha Yehovha;
Lava nga ni khombo va ta swi yingisa, va tsaka.
3Dzunisani Yehovha kun'we na mina!
A hi kuriseni swin'we vito ra yena!
4Ndzi lavile Yehovha, kutani u ndzi hlamurile;
A ndzi kutsula eku chaveni hinkwako ka mina.
5La langutaka eka yena wa voningiwa,
Kutani tingana ti nga ka ti nga vi kona emombyeni wa yena.
6Munhu loyi wa nhlomulo u khongerile, kutani Yehovha u n'wi yingisile,
A va a n'wi ponisa enhlomulweni wa yena hinkwawo.
7Ntsumi ya Yehovha yi rhendzela lava n'wi chavaka,
Kutani yi va kutsula.
8Nantswani, mi va mi vona leswaku Yehovha hi lonene swonghasi!
Ku katekile munhu la chavelaka eka yena.
9Chavani Yehovha, n'wina vahlawuriwa va yena!
Hikuva lava n'wi chavaka a va pfumari nchumu.
10Swinghalana swi nga pfumala, swi nga va ni ndlala,
Kambe lava lavaka Yehovha a va nga kiyeriwi hi leswinene.
11Tanani vana, mi ndzi yingisela,
Ndzi ta mi dyondzisa xichavo xa Yehovha.
12I mani la rhandzaka ku hanya,
La navelaka ku vona masiku ya ku kateka?
13Chavisa ririmi ra wena eka leswo biha,
Ni milomu ya wena eka marito ya ku kanganyisa.
14Fularhela leswo biha, u endla leswinene;
Lava ku rhula, u ku landzelela.
15Mahlo ya Yehovha ma languta lava lulameke,
Ni tindleve ta yena ti pfulekela ku huwelela ka vona.
16Mombo wa Yehovha wu honolela lava endlaka swo biha
Ku susa ku tsundzuka ka vona emisaveni.
17Lava lulameke va huwelela, kutani Yehovha a va yingisa,
U va wisisa emapfalweni hinkwawo ya vona.
18Yehovha u kusuhi ni lava nga ni timbilu leti tshovekeke,
U ponisa va mimoya leyi khinyekeke.
19Makhombo ya la lulameke ma tele ngopfu,
Kambe Yehovha u n'wi humesa eka wona hinkwawo.
20U hlayisa marhambu ya yena hinkwawo,
A ku na rin'we leri tshovekaka.
21Khombo ri ta dlaya lowo biha,
Kutani lava nga valala eka la lulameke va ta avanyisiwa.
22Yehovha u kutsula mimoya ya malandza ya yena,
Kutani hinkwavo lava chavelaka eka yena, va nga ka va nga avanyisiwi.
