TIPISALEMA 25

₁Yehovha! Ndzi tlakusa moya wa mina eka wena.

₂Xikwembu xanga! Ndzi vekile ku tshemba ka mina eka wena;

Ndzi nga tshuki ndzi khomiwa hi tingana.

Lava nga valala eka mina, va nga tshuki va tsaka ha mina!

₃Hinkwavo lava ku tshembaka va nga ka va nga khomiwi hi tingana.

Tingana i ta lava endlaka swo biha ha vomu ntsena.

₄Yehovha! Ndzi kombe tindlela ta wena,

U ndzi dyondzisa mikhuva ya wena.

₅Ndzi fambise entiyisweni wa wena u ri karhi u ndzi dyondzisa;

Hikuva hi wena Xikwembu xa ku hlayiseka ka mina;

Hi masiku, ndzi ku tshembile.

₆Oho Yehovha! Anakanya tintswalo ta wena ni nsovo wa wena,

Hikuva i swa masiku hinkwawo,

₇U nga anakanyi swidyoho swa vuntshwa bya mina, ni ku tlula ka mina;

U ndzi anakanya hi nsovo wa wena,

Hikwalaho ka tintswalo ta wena, oho Yehovha!

₈Yehovha u ni vunene, u lulamile:

Hikwalaho a kombisaka vadyohi ndlela;

₉A fambisa eku lulameni lava olovaka etimbilwini,

A dyondzisa lava titsongahataka ndlela ya yena.

₁₀Tindlela hinkwato ta Yehovha i tintswalo ni ku tshembeka,

Eka hinkwavo lava hlayisaka ntwanano wa yena ni swileriso swa yena.

₁₁Hikwalaho ka vito ra wena, Yehovha,

U ndzi khomele ku homboloka ka mina, hikuva kukulu.

₁₂Xana munhu hi wihi la chavaka Yehovha?

U ta n'wi komba ndlela leyi a fanelaka ku yi hlawula.

₁₃Moya wa yena wu ta tshama endzalweni,

Kutani vatukulu va yena va ta fuma misava.

₁₄Makungu ya Yehovha i ya lava n'wi chavaka,

Ku va dyondzisa ntwanano wa yena.

₁₅Mahlo ya mina ma languta Yehovha hi masiku,

Hikuva u tshunxile milenge ya mina entlhan'wini.

₁₆Rhendzelekela eka mina, u ndzi tsetselela,

Hikuva ndzi ri swanga, ndzi le khombyeni.

₁₇Mahlomulo ya mbilu ya mina ma engetelelekile;

U ndzi humesa emakhombyeni ya mina!

₁₈Languta nhlomulo ni ku vaviseka ka mina,

U va u ndzi khomela ku dyoha hinkwako ka mina.

₁₉Languta valala va mina, hikuva va tele,

Va ndzi venga hi rivengo lero leva.

₂₀Hlayisa moya wa mina, u ndzi kutsula;

Ndzi nga khomiwi hi tingana, hikuva ndzi ku tshembile!

₂₁Ku tenga ni ku lulama a swi ndzi tiyise,

Hikuva ndzi ku langutele.

₂₂Oho Xikwembu!

Ponisa Israele emapfalweni ya yena hinkwawo!