TIPISALEMA 22

₁Xikwembu xanga! Xikwembu xanga!

U ndzi tshikele yini?

U yimela yini hitlhelo leswaku u nga ti ndzi hlayisa,

U nga ti ndzi yingisa loko ndzi huwelela?

₂Xikwembu xanga, ndzi vitana ninhlekanhi, kambe a ku hlamari;

Nivusiku, kambe a ndzi voni ku wisa.

₃Hambiswiritano, u Mukwetsimi,

U tshama exikarhi ka ku dzunisa ka Israele.

₄Vatata wa hina va vekile eka wena ku tshemba ka vona;

Va ku tshembile kutani u va tshunxile.

₅Va huwelele eka wena, kutani va ponisiwile;

Va titshembele wena, kutani a va khomiwanga hi tingana.

₆Kambe mina ndzi xivungu, a ndzi munhu;

Ndzi xisolo eka vanhu, ni la cukumetiweke hi tiko.

₇Ndzi xisandzu eka hinkwavo lava ndzi vonaka;

Va ahlamisa milomu, va ndzi ninginisela tinhloko,

₈Va ku: “U titshembele Yehovha!

A a n'wi tshunxe-ke!

A a n'wi ponise loko a n'wi tsakela.”

₉Kunene u ndzi humesile ekhwirini ra manana,

U ndzi wisisile hi ku rhula emaveleni ya yena.

₁₀A ndzi ri emavokweni ya wena mpfhuka ndzi tswariwa;

Loko ndza ha ri ekhwirini ra manana, u ri Xikwembu xa mina.

₁₁U nga tshuki u va ekule na mina loko mahlomulo ma ri ekusuhi,

Loko ndzi nga ri na loyi a ndzi pfunaka!

₁₂Ndzi rhendzeriwe exikarhi hi tinkunzi to tala;

Tinkunzi ta Baxani, leta matimba, ti ndzi rhendzele;

₁₃Ti ahlamisa milomu ya tona eka mina,

Kukotisa nghala leyi handzulaka leyi mpfandzaka.

₁₄Ndzi khuluka kukotisa mati,

Marhambu ya mina hinkwawo ma sulekile;

Mbilu ya mina yi fana ni xihlenge xa tinyoxi,

Yi nyukile emarhumbyini ya mina.

₁₅Matimba ya mina ma omile tani hi mbita ya vumba,

Ririmi ra mina ri namarherile emalakeni ya mina;

Kutani u ndzi latile entshurini wa rifu.

₁₆Hikuva timbyana ti ndzi rhendzele;

Vandla ra lavo biha ri ndzi rhendzele;

Va tlhavile swandla swa mina ni mikondzo ya mina.

₁₇Ndzi nga hlaya marhambu ya mina hinkwawo.

Vona va ndzi langutisa va khorwisa mahlo ya vona ha mina;

₁₈Va avelana tinguvu ta mina,

Va hlahluva nguvu ya mina.

₁₉Kambe wena Yehovha, u nga yimi ekule na mina!

Wena u nga matimba ya mina, hatlisa ku ta ndzi pfuna.

₂₀U lwela vutomi bya mina etlharini,

Ni moya wa mina emin'waleni ya timbyana.

₂₁U ndzi ponisa enon'wini wa nghala,

Kambe u ndzi lwela etimhondzweni ta tinyarhi!

₂₂Ndzi ta vula vito ra wena eka vamakwerhu;

Ndzi ta ku twarisa exikarhi ka nhlengeletano.

₂₃“N'wina lava chavaka Yehovha, n'wi vongeni!

N'wina hinkwenu rixaka ra Yakobo, n'wi twariseni!

Rhurhumelani emahlweni ka yena n'wina rixaka hinkwaro ra Israele!

₂₄Hikuva a nga solanga ni ku nyenya la nga enhlomulweni,

A nga n'wi fihlelangi mombo wa yena;

Kambe u n'wi yingisile loko a huwelele eka yena.”

₂₅U ta khensiwa hi mina enhlengeletanweni leyikulu:

Ndzi ta ku rihela ku hlambanya ka mina emahlweni ka lava ku chavaka.

₂₆Lava nga ekhombyeni va ta dya va xurha;

Lava lavaka Yehovha va ta yimbelela tinsimu ta yena;

Timbilu ta n'wina ti ta hanya hi laha ku nga heriki.

₂₇Matlhelo hinkwawo ya misava ma ta tsundzuka Yehovha, ma hundzulukela ka yena.

Ni tinxaka hinkwato ta matiko ti ta khinsama emahlweni ka yena.

₂₈Hikuva ku fuma i ka Yehovha;

Kambe hi yena la fumaka matiko.

₂₉Hinkwavo vafuwi va misava va ta dya, va khinsama,

Hinkwavo lava xikelaka entshurini va ta korhama emahlweni ka yena,

Lava hlulekaka ku hlayisa vutomi bya vona.

₃₀Vatukulu, va ta n'wi tirhela,

Rixaka leri nga ta ta ri ta byeriwa ku kwetsima ka Hosi.

₃₁Loko ri ta, ri ta vula ku lulama ka yena;

Ri ta tivisa tiko leri nga ta tswariwa mitirho ya yena.