TIPISALEMA 19

₁Matilo ma vula ku kwetsima ka Xikwembu,

Ni mpfhuka wu tivisa ntirho wa mavoko ya xona.

₂Siku ri vulavula ni siku rin'wana,

Ni vusiku byi dyondzisa byin'wana.

₃A hi mhaka, a hi marito

Lawa mpfumawulo wa wona wu nga twakariki;

₄Ku twakala ka swona ku hangalakile emisaveni hinkwayo,

Marito ya swona ma yile emakun'wini ya misava.

Xi akele dyambu ntsonga wa rona kona.

₅Rona ri huma kukotisa muteki endlwini ya yena;

Ri tsaka kukota nhenha leyi tsutsumaka eku siyisaneni;

₆Ri suka emakun'wini ya matilo,

Kutani riendzo ra rona ri helela emakun'wini man'wana;

A ku na nchumu lowu fihlekaka eku hiseni ka rona.

₇Nawu wa Yehovha wu hetisekile, wu wisisa moya;

Vumbhoni bya Yehovha bya tshembeka, byi tlharihisa xihunguki.

₈Ku letela ka Yehovha ku lulamile ku tsakisa mbilu;

Ku lerisa ka Yehovha ku basile, ku hanyanyisa mahlo;

₉Xichavo xa Yehovha xi tengile, xi kona hi masiku;

Ku avanyisa ka Yehovha ku nene, ku lulamile hinkwako.

₁₀Swi naveriwa ngopfu ku tlula nsuku ku tlula nsuku lowu tengeke wa ku tala.

Swi tlula ni vulombe hi ku nandziha, ni leswi tshonaka eswihlengeni swa byona.

₁₁Hikwalaho nandza wa wena u dyondzisiwa ha swona;

La hlayisaka swona u ni hakelo leyikulu.

₁₂I mani la tivaka ku hoxa ka yena xana?

U ndzi khomela milandzu leyi ndzi yi rivaleke.

₁₃Kambe u hlayisa nandza wa wena eka lava tikurisaka;

Va nga tshuki va ndzi fuma!

Hi laha ndzi nga ta tenga, ndzi va ndzi pfumala milandzu leyikulu.

₁₄Wa nga amukela marito ya nomu wa mina,

Ni ku anakanya ka mbilu ya mina,

Wena Yehovha, ribye ra mina ni mulweri wa mina!