TIPISALEMA 17

₁Yehovha! Yingisa ku lulama, u yingisela ku huwelela ka mina;

U ndzi twa loko ndzi khongela hi nomu lowu nga riki na ku xisa!

₂Ku lulama ka mina a ku humelele emahlweni ka wena,

Mahlo ya wena a ma langute vunene bya mina!

₃U kambile mbilu ya mina, u yi lavisise nivusiku;

U ndzi ringile, kambe a ku kumanga nchumu:

Ku anakanya ka mina a ku tluli rito ra mina.

₄Loko ndzi anakanya mitirho ya vanhu hi rito ra wena,

Ndzi ku, ndzi ta chava tindlela ta lava pfukelaka matimba.

₅Milenge ya mina yi tiyile emitileni ya wena,

Mikondzo ya mina a yi tsekatseki.

₆Oho Xikwembu! Ndzi vitana ka wena, hikuva wa ndzi hlamula!

Ndzi yingise hi tindleve ta wena, u yingisa rito ra mina!

₇Kombisa tintswalo ta wena, wena la hlayisaka lava chavelaka ka wena;

Hi voko ra xinene ra wena, u va lwela eka valala va vona.

₈Ndzi hlayise kukota xanga ya tihlo,

U ndzi fihla ehansi ka timpapa ta wena,

₉Hikwalaho ka lavo biha lava ndzi pfukelaka matimba,

Ni ka valala va mina lava ndzi rhendzelaka exikarhi hi ku wonga.

₁₀Va tipfalela timbilu ta vona leti noneke,

Hi milomu ya vona va vulavula hi ku tikurisa.

₁₁Va rhendzele ku famba ka hina exikarhi;

Mahlo ya vona ma hiteka ku hi wisela ehansi.

₁₂Va kotisa nghala leyi rhandzaka ku handzula,

Ni xinghalana lexi etlelaka enceleni wa xona.

₁₃Pfuka, Yehovha, u va rhangela emahlweni, u va wisa!

U ponisa moya wa mina hi tlhari ra wena eka lavo homboloka;

₁₄Hi voko ra wena, Oho Yehovha!

U ndzi ponisa eka vanhu va misava leyi,

Va ni ku averiwa ka vona evutomini lebyi;

U tatile swifuva swa vona hi rifuwo ra wena;

Vana va vona va xurhile,

Kambe va siyela vatukulu va vona leswi salaka.

₁₅Loko ndzi ri mina eku lulameni ka mina, ndzi ta hlalela mombo wa wena;

Loko ndzi pfuka evurhongweni, ndzi ta xurha xivumbeko xa wena.