Ku kombela ku lamuleriwa eka lavo biha.
Eka mufambisi wa vasimi. Pisalema ya Davhida.
1Yehovha ndzi lamulele eka vanhu lavo biha!
Ndzi lwele ka vanhu va tihanyi.
2Lava kanelaka swo biha etimbilwini ta vona,
Va pfuxaka madzolonga hi masiku!
3Va karihisa tindzimi ta vona ku fana ni ta tinyoka,
Vuxungu bya timhiri byi le hansi ka milomu ya vona.
4Yehovha, ndzi sirhelele emavokweni ya lavo biha!
U ndzi lwela eka vanhu va tihanyi,
Lava kanelaka ku wisa milenge ya mina!
5Vatikurisi va ndzi fihlele ntlhamu ni tingoti,
Va rhiya vurimba ematlhelweni ya ndlela,
Va ndzi rhiyile hi marindzi.
6Ndzi te eka Yehovha: “U Xikwembu xanga!”
U yingisa rito ra mikhongelo ya mina!
7Yehovha, Hosi, u matimba ya ku hlayiseka ka mina!
U lwela nhloko ya mina hi siku ra nyimpi.
8Yehovha, u nga nyiki lowo biha leswi a swi navelaka,
U nga katekisi makungu ya yena, leswaku a nga tshuki a tikurisa.
9Lava ndzi rhendzelaka xikarhi
A va weriwe etinhlokweni hi lunya ra milomu ya vona!
10Makala lama vavamelaka ma hlahlekele ehenhla ka vona!
A va hoxiwe endzilweni ni le makheleni, leswaku va nga tlheli va pfuka!
11Munhu wa mavunwa a nga ka a nga tiyi emisaveni;
Kutani munhu wa tihanyi u ta kokelwa emakhombyeni, a lahleka.
12Ndza tiva leswaku Yehovha u lamulela vaxaniseki,
U lulamisela vapfumari.
13Ina, lava lulameke va ta dzunisa vito ra wena,
Vanhu vo lulama va ta tshama emahlweni ka wena.
