Ku biwa ka valala va tiko ra Xikwembu.
Eka mufambisi wa vasimi. Risimu ra Davhida.
1Oho Xikwembu lexi ndzi xi dzunisaka, u nga tshuki u miyela,
2Hikuva nomu wa lowo biha, ni nomu wa muxisi
Wu ndzi ahlamele ku lwa na mina,
Va vulavula na mina hi ririmi ra vunwa,
3Va ndzi rhendzele hi marito ya rivengo,
Va ndzi hlasela ntsena.
4Ematshan'weni ya rirhandzu ra mina,
va tivekile valala va mina;
Mina, a ndzi tshiki ku khongela.
5Va ndzi rihisele vunene hi ku biha,
Ni rirhandzu hi rivengo.
6Nyiketa munhu lowo tano emavokweni ya lowo biha,
Kambe nala a a yime etlhelweni ra yena ra xinene!
7Eku avanyisiweni a a kumiwe a ri ni nandzu!
Ku khongela ka yena a ku n'wi hundzukele xidyoho!
8Masiku ya yena a ma komisiwe,
Un'wanyana a a titekele vutshamo bya yena!
9Vana va yena a va hundzuke swisiwana,
Nsati wa yena a a ve noni!
10Vana va yena a va tsendzeleke va va vakomberi,
Va singila ekule ni yindlu ya vona leyi onhakeke!
11La nga lomba eka yena a a dye hinkwaswo leswi a nga na swona,
Mihandzu ya ntirho wa yena a yi phangiwe hi vamatiko!
12Ku nga vi na munhu la n'wi endlelaka hi tintswalo;
Ku nga tshuki ku va na la tsetselelaka swisiwana swa yena!
13Vatukulu va yena a va lovisiwe, vito ra vona a ri love erixakeni leri tlhandlamaka!
14Ku dyoha ka vatata wa yena a ku vuyele emahlweni ka Yehovha,
Ku dyoha ka mana wa yena ku nga hlanguriwi,
15A ku va emahlweni ka Yehovha hi masiku hinkwawo;
Kutani a herisa ku tsundzukiwa ka vona emisaveni!
16Hikuva a nga anakanyanga ku endla hi tintswalo,
Kambe u xanisile munhu wa khombo ni mupfumari,
Ni wa mahlomulo, u suse vutomi bya yena.
17U rhandzile ndzhukano: wu n'wi wele ehenhla!
A nga tsakelanga nkateko: a wu ve kule na yena!
18A a tiambexe ndzhukano kukotisa loko ngi yi ri nguvu,
A wu n'wi nghenele endzeni kukotisa mati,
Kukotisa mafurha emarhambyini ya yena.
19A wu ve eka yena kukotisa nguvu ku tifunengeta ha yona,
Kukotisa vamba leri munhu a tibohaka ha rona hi masiku!
20Yi va hakelo leyi Yehovha a yi hakelaka valala va mina,
Ni lava vulaka swo biha ehenhla ka mina.
21Kambe, wena Hosi, Yehovha!
U ndzi pfuna hikwalaho ka vito ra wena,
Hikuva nsovo wa wena wu nene: Ndzi hanyise!
22Hikuva ndzi wa khombo ni mupfumari,
Mbilu ya mina yi tlhavekile endzeni ka mina.
23Ndzi tifambela kukotisa ndzhuti lowu ololokaka,
Ndzi hungiwa kukotisa njiya,
24Matsolo ya mina ma rhurhumela hi ku titsona swakudya,
Nyama ya mina yi herile emirini wa mina hi ku ondza.
25Ndzi nyiketiwile ku va xisandzu xa vona;
Loko va ndzi languta, va ninginisa tinhloko ta vona.
26Ndzi pfune, Yehovha, Xikwembu xa mina!
Ndzi ponise hi tintswalo ta wena!
27Va ta twa leswaku i voko ra wena.
Hi wena, Yehovha, u nga swi endla!
28Vona va nga rhukana, wena u katekisa,
Va nga tlakuka, kambe va ta khomiwa hi tingana,
Kambe nandza wa wena u ta titsakela.
29Vakaneti va mina va ta funengetiwa hi tingana,
Kutani ku tsohoka ka vona ku ta va funengeta kukotisa nguvu.
30Ndzi ta dzunisa Yehovha hi nomu wa mina hi rito leri tlakukeke,
Ndzi ta n'wi dzunisa exikarhi ka vunyingi;
31Hikuva u yime etlhelweni ra xinene ra xisiwana,
Kutani a n'wi kutsula eka lava n'wi avanyisaka.
