TIPISALEMA 101

₁Ndzi ta yimbelela tintswalo ni ku lulama;

Ndzi ta yimbelela wena, Yehovha!

₂Ndzi ta famba endleleni leyo hlawuleka,

U ta ta rini eka mina xana?

Ndzi ta famba hi mbilu leyi lulameke endlwini ya mina.

₃Ndzi nga ka ndzi nga veki leswo biha emahlweni ka mina;

Ndza venga mitirho ya vadyohi;

Yi nga ka yi nga ndzi namarheli,

₄Mbilu leyo homboloka a yi ve ekule na mina!

A ndzi swi rhandzi ku tivana ni lavo biha.

₅Ndzi ta herisa la lumbetaka nakulobye exihundleni;

Ndzi nga ka ndzi nga yingiseri wa mahlo lama tlakukeke ni wa mbilu leyi tidzunisaka.

₆Mahlo ya mina ma languta vatshembeki va tiko,

Va ta aka na mina.

La fambaka endleleni ya ku tshembeka, u ta va nandza wa mina.

₇La xisaka a nga ka a nga tshami endlwini ya mina;

La vulaka mavunwa a nga ka a nga yimi emahlweni ka mina.

₈Nimpundzu wun'wana ni wun'wana ndzi ta herisa vadyohi hinkwavo va tiko,

Leswaku emutini wa Yehovha ku ta suseteriwa

Hinkwavo vatirhi va ku homboloka.