SWIVURISO 4

₁Vana, yingisani dyondzo ya tatana,

Mi yi anakanya, mi ta kuma ku twisisa;

₂Hikuva ndzi mi dyondzisa dyondzo leyinene:

Mi nga tshiki tidyondzo ta mina.

₃Hikuva na mina a ndzi ri n'wana wa xiviri eka tatana,

N'wana la nga yexe la rhandziwaka hi manana,

₄Tatana a ndzi dyondzisa, a ku eka mina:

“Mbilu ya wena a yi hlayise marito ya mina;

U yingisa ku lerisa ka mina, u ta hanya.

₅Fuwa vutlhari, fuwa ku twisisa;

U nga rivali marito ya nomu wa mina, u nga ma tshiki.

₆U nga fularheli vutlhari, byi ta ku hlayisa;

U byi rhandza byi ta ku hanyisa.

₇Ku sungula ka vutlhari, i ku lava byona;

U xava ku anakanya hi hinkwaswo leswi u nga na swona,

₈Kurisa vutlhari, byi ta ku kurisa;

Loko u byi namarhela, byi ta ku dzunisa,

₉Byi ta ku bombisa nhloko hi xibombiso lexinene,

Byi ta ku rhwexa harhi ya vuhosi yo kwetsima.”

₁₀Yingisa, n'wananga, u amukela marito ya mina,

Malembe ya ku hanya ka wena ma ta andzisiwa.

₁₁Hikuva ndzi ku dyondzisa ndlela ya vutlhari,

Ndzi ku fambisa emitileni ya ku lulama.

₁₂Loko u famba, u nga ka u nga kamiwi milenge,

Loko u tsutsuma, u nga ka u nga khunguvanyeki.

₁₃Khoma dyondzo, u nga yi tshiki,

U yi hlayisa; hikuva i vutomi bya wena.

₁₄U nga ngheni endleleni ya va nsele,

U nga kandziyi emitileni ya lavo homboloka;

₁₅Hundzuluka, u nga kongomi kona,

U hambuka, u tifambela;

₁₆Hikuva a va yi eku etleleni va nga si endla swo biha;

Va nga ka va nga kumi vurhongo loko va nga si wisa munhu.

₁₇Hikuva vuswa lebyi va byi dyaka, i swo biha,

Kambe tihanyi i vhinyo leyi va yi nwaka.

₁₈Ndlela ya lavo lulama yi kotisa ku vonakala,

Ku hatima ka kona ku engeteleka ku fikela nhlekanhi lowukulu.

₁₉Kambe ndlela ya vadyohi yi kotisa munyama,

A va tivi laha va welaka kona.

₂₀N'wananga, yingisisa marito ya mina,

U xiya timhaka ta mina.

₂₁Ti nga suki emahlweni ya wena,

U ti hlayisa embilwini ya wena;

₂₂Hikuva i vutomi eka hinkwavo lava ti kumaka,

I ku tsaka ka miri hinkwawo wa vona.

₂₃Hlayisa mbilu ya wena ku tlurisa leswi hlayisiwaka,

Hikuva i xihlovo xa vutomi.

₂₄U alela ririmi ro homboloka,

U hambana ni milomu yo kanganyisa.

₂₅Mahlo ya wena a ma langute ma lulamile,

Tinxiye ta wena a ti pfuleke hi ku lulama.

₂₆Anakanya ndlela ya nenge wa wena,

Tindlela ta wena hinkwato ti ta tiya.

₂₇U nga tshuki u hambukela exineneni kumbe eximatsini,

U tshineta nenge wa wena ekule ni leswo biha.