SWIVURISO 31

₂“Swi lo yini, n'wananga?

Swi lo yini, n'wana wa khwiri ra mina?

Oho! Ndzi to yini, n'wana wa khwiri ra mina?

₃U nga nyiki vavasati matimba ya wena,

U nga landzeleli lava lovisaka tihosi.

₄A hi tihosi, wena Lemuwele,

A hi tihosi leti lulameleke ku nwa vhinyo,

Hambi ti ri tihosana,

eku navela byalwa lebyi pyopyisaka;

₅Loko va nwile va nga ta rivala milawu,

Va hoxela timhaka ta hinkwavo lava nga ekhombyeni.

₆Nyikani byalwa eka munhu loyi a faka,

Ni vhinyo eka munhu wa mbilu ya nhlomulo,

₇Leswaku a nwa, a rivala vusiwana bya yena,

A nga ta tshama a anakanya makhombo ya yena.

₈Nomu wa wena wu ahlamisela timbheveve,

U yimela timhaka ta hinkwavo lava tshikiweke.

₉Ahlamisa nomu, u avanyisa hi ku lulama,

U yingisa timhaka ta lowa khombo ni xisiwana.”

₁₀Wansati wa matimba, i mani la nga ta n'wi kuma?

U tlula kule nxavo wa risima wa tidayimani.

₁₁Mbilu ya nuna wa yena ya n'wi tshemba,

A nga ka a nga pfumari ndzalo.

₁₂A n'wi endla swinene, swi nga ri swo biha,

Hi masiku hinkwawo ya ku hanya ka yena.

₁₃A lava voya bya tinyimpfu ni ntsembyana,

A tirha hi mavoko ya ku tsaka.

₁₄U fana ni byatso bya muxavi,

U lava swakudya swa yena ekule.

₁₅U pfuka bya ha ri vusiku,

U avela va yindlu ya yena swakudya,

Ni malandza ya yena mitirho.

₁₆U anakanya nsimu, a ya xava;

Hi leswi a swi kumeke, u byala nsimu ya vhinya.

₁₇U tiboha xifungha hi matimba,

U tiyisa mavoko ya yena.

₁₈U tsakela ku bindzula ka yena;

Nivusiku, rivoningo ra yena a ri timeki.

₁₉Mavoko ya yena ma tamela nhonga ya ku luka,

Ni tintiho ta yena nhonga ya ku swula.

₂₀U pfulela vapfumari voko ra yena;

U ri tshambulutela loyi a pfumalaka.

₂₁A nga chavi gamboko hikwalaho ka va yindlu ya yena.

Hikuva va yindlu ya yena hinkwavo va funengele tinguvu ta crimson.

₂₂U tilukela masangu yo saseka,

Swiambalo swa yena i ntsembyana ni xivunguvungu.

₂₃Nuna wa yena u tiviwa ehubyeni ya muti,

Loko a tshamile exikarhi ka vavanuna lavakulu va tiko.

₂₄Nsati u endla tinguvu, a xavisa,

Ni mavamba, a xavisa eka vaxavi.

₂₅Matimba ni xichavo, i xifunengelo xa yena;

U hleka siku ra mundzuku.

₂₆U ahlamisa nomu wa yena hi vutlhari,

Milawu ya vunene yi le ririmini ra yena.

₂₇U risa yindlu ya yena,

A nga dyi vuswa bya vulolo.

₂₈Vana va yena va pfuka va n'wi vula mukateki;

Nuna wa yena wa n'wi dzunisa:

₂₉A ku: “Vana lavo tala va xisati a ti ri tinhenha,

Kambe wena u va tlula hinkwavo.”

₃₀Ku saseka ka kanganyisa, vumbhurhi i vusinge!

Wansati la chavaka Yehovha hi yena la nga ta dzunisiwa.

₃₁N'wi nyikeni mihandzu ya mavoko ya yena,

Mitirho ya yena yi n'wi dzunisa etihubyeni ta muti.