1Lowo biha u tsutsuma hambi a nga landziwi,
Kambe lowo lulama u tsakile kukota xinghalana.
2Loko tiko ri ngheniwile hi ku onhaka, tihosi ti tele,
Kambe ku fuma ku tiyisiwa hi wanuna wa ku twisisa ni wa vutivi.
3Munhu wo pfumala la tikerisaka swisiwana,
I xihuhuri lexi nga siyiki swakudya.
4Lava nga vuriki nchumu hi milawu va dzunisa lavo biha,
Kambe lava yi hlayisaka va lwa na vona.
5Lavo biha a va twisisi swo lulama,
Kambe lava lavaka Yehovha, va twisisa timhaka hinkwato.
6Xisiwana lexi fambaka hi ku lulama ka xona,
Xi tlula wa tindlela to homboloka hambi a fuwile.
7La hlayisaka milawu i n'wana wa ku twisisa,
Kambe la tolovelanaka ni swipombolo, u khomisa tata wa yena tingana.
8La andzisaka rifuwo ra yena hi bindzu leri tlulaka mpimo
U hlengeletela munhu la nga ta tsetselela swisiwana.
9La pfalaka tindleve leswaku a nga twi milawu,
Xikhongelo xa yena i manyala.
10La hambukisaka lavo lulama endleleni yo biha,
U ta wela erindzini leri a ri celeke;
Vona vo lulama va ta dya ndzhaka yo kateka.
11Mufuwi u tlharihile emahlweni ya yena,
Kambe u pimiwa hi xisiwana xa ku anakanya.
12Siku lavo lulama va hlulaka, ku twala lokukulu ku kona;
Kambe lavo biha loko va tlakuka, vanhu va tumbela.
13La fihlaka swidyoho swa yena, a nga ka a nga kateki,
Kambe la swi vulaka, a tshika, u ta kuma tintswalo.
14Ku katekile munhu la nga ni ripfalo hi masiku!
Kambe la tinonon'hwisaka mbilu u ta wela eku biheni.
15Hosi ya mona leyi fumaka tiko ra vapfumari,
I nghala leyi dzumadzumaka, ni bere leyi nga ni ndlala.
16Mufumi la kalaka miehleketo i muxanisi lonkulu,
Kambe la vengaka ku dya vanhu u ta engeteleriwa masiku ya yena.
17Munhu la tikeriwaka hi ngati ya vanhu,
U ta baleka ku fikela esirheni; a nga tshuki a yimisiwa.
18La fambaka eku lulameni u ta hlayiseka;
Kambe wa ku homboloka, wa tindlela timbirhi, u ta wa xikan'we.
19La rimaka nsimu ya yena u ta xurha swakudya,
Kambe la tolovelaka xihunguki u ta xurha vusiwana.
20Munhu la tshembekaka u fuwile mikateko,
Kambe la navelaka ku fuwa hi ku hatlisa, a nga ka a nga pfumali nandzu.
21Ku ya hi nghohe ya vanhu a swi sasekanga.
Hikwalaho ka xipandzwa xa vuswa munhu a nga tlula milawu.
22Munhu wa tihlo lero biha, u tsutsumela rifuwo,
Kasi a nga tivi leswaku ndlala yi ta n'wi wela ehenhla.
23La tshinyaka vanhu, endzhaku u ta kuma tintswalo
Ku tlula wa ririmi ra ku sasela van'wana.
24La yivelaka tata wa yena ni mana wa yena,
A ku: “A swi na nandzu!”
I warikwavo eka vadyohi.
25Moya lowu tikukumuxaka wu pfuxa mholovo,
Kambe la tshembaka Yehovha u ta xurha.
26La tshembaka mbilu ya yena i xihunguki,
Kambe la fambaka evutlharini u ta hlayiseka.
27La pfunaka vapfumari a nga ka a nga pfumali,
Loko a ri loyi a tipfalaka mahlo, u ta talela hi ku rhukaniwa.
28Loko ku tlakuka lavo biha, vanhu va tumbela;
Siku va lovaka, lavo lulama va tala.
