Pawulo a tshika hinkwaswo hikwalaho ka Kriste.
1Loko swi ri tano, vamakwerhu, titsakeleni eHosini, A ndzi karhali ku mi tsalela timhaka ti ri tin'we, hikuva mi tiyisiwa ha tona.
2Chavani timbyana; chavani vatirhi lavo biha; chavani ngoma ya vunwa. 3Hikuva hi hina hi nga ngoma leyinene, hina lava hi tirhelaka Xikwembu emoyeni, lava hi tidzunisaka ha Yesu Kriste, lava hi nga titshembiki enyameni.
4Swi nga ri leswaku a ndzi pfumala swa ku tidzunisa enyameni. Kungakuloko munhu a anakanya leswaku u ni nkarhi wa ku tidzunisa enyameni, ngopfungopfu hi mina yeloyi, 5ndzi nga yimbisiwa hi siku ra ntlhanu na manharhu, ndzi wa rixaka ra Israele, wa nyimba ya Benjamini, ndzi Muheveru, ntukulu wa Vaheveru; hitlhelo ra nawu, ndzi Mufarisi; 6loko ku ri ku chivirika, hi mina la xaniseke kereke, loko ku ri ku lulameni ka nawu, a ndzi na xisandzu. 7Kambe leswi ngi swi ri rifuwo eka mina, ndzi swi endle swahava hikwalaho ka Kriste. 8Kunene ndzi ringanisa leswaku hinkwaswo i swahava, loko swi nga fanisiwa ni vukulukumba bya ku tiva Yesu Kriste, Hosi ya mina, yeloyi ndzi cukumeteke hinkwaswo hikwalaho ka yena, ndzi swi ringanisa ni ntshuri leswaku ndzi fuwa Kriste, 9kutani ndzi kumiwa eka yena ndzi nga ri na ku lulama ka mina loku humaka eka nawu, kambe ndzi ri ni ku lulama loku humaka eku pfumeleni eka Kriste, ku ri ku lulama loku humaka eka Xikwembu hi ku pfumela; 10ndzi ta tiva Yesu Kriste, ni matimba ya ku pfuka ka yena, ni ku hlangana na yena emaxangwini ya yena, ndzi ta fana na yena eku feni ka yena, 11leswaku kumbe, na mina, ndzi ta kuma ku pfuka ka vafi.
12Swi nga ri leswaku ndzi tekile hakelo, kumbe swi ri leswaku ndzi hetisekile; kambe ndzi ri karhi ndzi tsutsuma leswaku ndzi yi khoma; kutani, hikwalaho ka swona, na mina ndzi khomiwile hi Kriste. 13Vamakwerhu, a ndzi tihlambanyisi leswaku ndzi tekile hakelo, kambe ndzi endla mhaka yin'we ntsena; 14ndzi rivala swa le ndzhaku, kutani ndzi navela swa le mahlweni, ndzi tsutsumela swa le mahlweni, leswaku ndzi kuma ku hakeriwa ka le henhla, loku hi nga vitaneriwa kona hi Xikwembu ha Yesu Kriste.
Ku anakanya kun'we ni ntila wun'we.
15Hikwalaho, hina lava hetisekeke, a hi anakanyeni sweswo; kutani loko mi ri ni ku anakanya kun'wana emhakeni yin'wana, Xikwembu xi ta mi pfuletela na yona. 16Ntsena loko ku ri laha hi nga fika kona, ndzi ri: Fambani hi nawu wun'we ni ku anakanya kun'we.
17Vamakwerhu, mi va vaetisi va mina, mi xiya lava fambaka hi mitila leyi mi yi vonaka eka hina.
18Hikuva lavo tala lava ndzi va vuleke ngopfu eka n'wina, ni sweswi, ndza ha va vula hi ku rila, volavo va famba va ri valala eka xihambano xa Kriste: 19Makumu ya vona i ku lova; valavo Xikwembu xa vona ri nga khwiri ra vona, va tidzunisa hi swa tingana ta vona, va anakanya swa misava ntsena. 20Kambe muti wa hina wu le matilweni laha hi langutelaka kona Mulondzovoti, a nga Hosi Yesu Kriste, 21la nga ta hundzuluxa miri wa hina lowu solekaka, a wu endla xivumbeko xin'we ni miri wa yena lowo kwetsima, hilaha a nga ni matimba ya ku tivekela hinkwaswo ehansi ka yena.
