VAFILIPIYA 2

₁Hikwalaho, kungakuloko ku chavelela ku ri kona ka Kriste, ni loko rirhandzu ri ri kona leri tiyisaka timbilu, ni ku hlangana ka Moya, ni ku tsetselelana, ni tintswalo, ₂hetisani ku tsaka ka mina, mi va ni ku twanana lokunene, ni rirhandzu rin'we, ni Moya wun'we, ni ku anakanya kun'we. ₃Mi nga endli nchumu hi ku kanetana, hambi ku ri hi ku tidzunisa ka swahava, kambe un'wana ni un'wana hi ku titsongahata ka yena, a a anakanye leswaku van'wana va n'wi tlula hi vunene. ₄Un'wana ni un'wana a nga tshuki a hlayisa leswi nga swa yena ntsena, kambe a a hlayise ni swa van'wana. ₅Mi va ni ku anakanya loku ngi ku ri ka Yesu Kriste, ₆loyi hambi a ri ni xivumbeko xa Xikwembu, a nga anakanyanga ku tiyisa ku fana ka yena na Xikwembu; ₇kambe u tithangurile hi ku teka xiyimo xa nandza, a tiendla la fanaka ni vanhu; ₈kutani loko a kumiwe a fana ni munhu, a titsongahata, a va a tiendla la yingisaka ku yisa eku feni, ni le ku feni ka xihambano. ₉Hikwalaho, Xikwembu xi n'wi tlakusile hi ku tlurisa, xi n'wi nyikile vito leri nga ehenhla ka mavito hinkwawo, ₁₀leswaku hi vito ra Yesu, matsolo ya hinkwavo lava nga ematilweni ni la emisaveni ni le hansi ka misava, ma n'wi khinsamela, ₁₁kutani tindzimi hinkwato ti vula leswaku Yesu Kriste i Hosi, ku ve ku dzuniseni ka Xikwembu Tatana.

₁₂Varhandziwa va nga, kukotisa loko mi yingisile hi masiku, ku nga ri loko ndzi ri eka n'wina ntsena, kambe ngopfungopfu loko ndzi nga ri kona, tirhelani ku hlayiseka ka n'wina hi nchavo ni ku rhurhumela; ₁₃hikuva Xikwembu, hi xona lexi tirhaka eka n'wina ku rhandza ni ku endla hi ku tirhandzela ka xona.

₁₄Endlani hinkwaswo mi nga n'unun'uti ni ku kanetana, ₁₅leswaku mi pfumala xisandzu ni xivati, mi va vana va Xikwembu lava nga solekiki exikarhi ka rixaka leri onhakeke, lero homboloka, rolero mi nga va ni ku vangama exikarhi ka rona, kukotisa mavoningo emisaveni, mi ri karhi mi tamela rito ra vutomi; ₁₆ndzi ta tiva ku tidzunisa esikwini ra Kriste leswaku a ndzi tsutsumelanga swahava, ni ku tirhela mahala. ₁₇Swi nga tsandza ni loko ndzi endliwa mhamba hikwalaho ka ku gandzela ka n'wina, ni ku tirhela ku pfumela ka n'wina, kona ndzi nga tsaka, ndzi va ndzi tsakisisa na n'wina hinkwenu. ₁₈Na n'wina, tsakani hikwalaho, mi tsakisana na mina.

₁₉Ndzi tshembile Hosi Yesu leswaku ndzi ta hatla ndzi mi rhumela Timotiya, leswaku na mina ndzi tiyisiwa loko ndzi tiva timhaka ta n'wina. ₂₀Hikuva a ndzi na wumbe yeloyi mbilu ya yena yi kotisaka ya mina, hambi a ri loyi a xiyaka timhaka ta n'wina swinene; ₂₁hikuva hinkwavo va tilavela swa vona, swi nga ri swa Yesu Kriste. ₂₂Kambe ma swi tiva leswaku u ringiwile, hikuva u tirhele Evhangeli swin'we na mina, kukota n'wana loko a tirhela tata wa yena. ₂₃Kutani sweswi, ndza tshemba leswaku ndzi ta n'wi rhuma eka n'wina, loko ndzi vonile timhaka leti ndzi nga exikarhi ka tona. ₂₄Kambe ndzi tshembe Hosi leswaku na mina ndzi ta hatla ndzi ta eka n'wina.

₂₅Kambe ndzi anakanyile leswaku ndzi fanele ku mi rhumela Epafrodito makwerhu, ni nakulorhi emitirhweni ni le ku lweni; i murhumiwa wa n'wina ni loyi a nga ndzi pfuna evusiwaneni, ₂₆hikuva u naverile ngopfu ku mi vona hinkwenu, kutani a a vaviseka ngopfu hi leswi mi tweke ku vabya ka yena. ₂₇Hikuva kunene u vabyile, a a lavile ni ku fa; kambe Xikwembu xi n'wi tsetselerile, a nga ri yena ntsena, kambe na mina, leswaku ndzi nga tikeriwi hi mahlomulo lama tlhandlamaneke. ₂₈Ndzi hatlisile ndzi n'wi rhuma eka n'wina hikwalaho, leswaku loko mi tlhela mi n'wi vona, mi tsaka, na mina ndzi vevukeriwa enhlomulweni. ₂₉N'wi amukeleni eHosini hi ku tsaka hinkwako, mi va ni xichavo eka vanhu lavo tano, ₃₀hikuva u tshinelele rifu hikwalaho ka ntirho wa Kriste, u tshikile vutomi bya yena, a ta hetisa mitirho leyi mi tsandzekeke ku ndzi endlela yona.