TINHLAYO 33

₁Hi yona mimpfhuka ya vana va Israele lava humeke etikweni ra Egipta, hi mavandla ya vona, va ri karhi va fambisiwa hi Muxe na Aroni. ₂Muxe a tsala mimpfhuka ya vona, hi magovela ya vona, hi ku lerisa ka Yehovha; kutani hi leyi mimpfhuka ya vona hilaha va fambeke hakona.

₃Va suka eRamsese hi n'hweti yo sungula, hi siku ra 15 ra n'hweti yo sungula. Siku leri tlhandlamaka Paseka, vana va Israele va huma va hlomile emahlweni ka tiko ra Egipta hinkwaro. ₄Vaegipta a va ri karhi va lahla lava Yehovha a va dlayeke exikarhi ka vona, ma ri mativula hinkwawo; hikuva Yehovha a avanyisile na swona swikwembu swa vona.

₅Kutani vana va Israele va suka eRamsese, va ya gova eSukoti. ₆Va suka eSukoti, va ya gova eEtamu, lowu nga endzilakaneni wa mananga. ₇Va suka eEtamu, va tlhelela ePi-Hahiroto lowu langutaneke na Baala-Sefoni, va ya gova ekusuhi na Migidolo; ₈va suka emahlweni ka Hahiroto, va hundza exikarhi ka lwandle, tlhelo ra mananga, kutani va famba masiku manharhu emananga ya Etamu, va ya gova eMara.

₉Va suka eMara, va ya fika eElimi; a ku ri ni swihlovo swa 12 eElimi, ni mimpfun'wana ya 70, kutani va gova kona. ₁₀Va suka eElimi, va ya gova ekusuhi ni Lwandle ro Tshwuka. ₁₁Va suka eLwandle-ro-Tshwuka, va ya gova emananga ya Sina; ₁₂va suka emananga ya Sina, va ya gova eDofika; ₁₃va suka eDofika, va ya gova eAluxi; ₁₄va suka eAluxi, va ya gova eRefidimi, laha ku nga riki na mati ya ku nwisa tiko; ₁₅va suka eRefidimi, va ya gova emananga ya Sinayi.

₁₆Va suka emananga ya Sinayi, va ya gova eKibroti-Hatavha; ₁₇va suka eKibroti-Hatavha, va ya gova eHaseroti; ₁₈va suka eHaseroti, va ya gova eRitima; ₁₉va suka eRitima, va ya gova eRimoni-Perese, ₂₀va suka eRimoni-Perese, va ya gova eLibina; ₂₁va suka eLibina, va ya gova eRisa; ₂₂va suka eRisa, va ya gova eKehelata; ₂₃va suka eKehelata, va ya gova entshaveni ya Xefere; ₂₄va suka entshaveni ya Xefere, va ya gova eHarada, ₂₅va suka eHarada, va ya gova eMakeloto; ₂₆va suka eMakeloto, va ya gova eTahata; ₂₇va suka eTahata, va ya gova eTera; ₂₈va suka eTera, va ya gova eMiteka; ₂₉va suka eMiteka, va ya gova eHaximona; ₃₀va suka eHaximona, va ya gova eMaseroto; ₃₁va suka eMaseroto, va ya gova eBene-Yakani; ₃₂va suka eBene-Yakani, va ya gova ebakweni ra Gidigada; ₃₃va suka ebakweni ra Gidigada, va ya gova eYotibata; ₃₄va suka eYotibata, va ya gova eAbrona; ₃₅va suka eAbrona, va ya gova eEsiyoni-Gebere; ₃₆va suka eEsiyoni-Gebere, va ya gova emananga ya Sini (i Kadexe); ₃₇va suka eKadexe, va ya gova entshaveni ya Hori, endzilakaneni wa Edomu.

₃₈Kutani Aroni, muprista, a tlhandlukela entshaveni ya Hori, hi ku lerisa ka Yehovha, kutani a fa kona, hi lembe ra 40 ra ku huma ka vana va Israele etikweni ra Egipta, hi n'hweti ya vuntlhanu, hi siku ro sungula ra n'hweti. ₃₉Aroni a a ri ni malembe va 123, loko a fa entshaveni ya Hori.

₄₀Mukanana, hosi ya Aradi, la akeke edzongeni ka tiko ra Kanana, a twa leswaku vana va Israele va ta; ₄₁kutani va suka entshaveni ya Hori, va ya gova eSalimona, ₄₂va suka eSalimona, va ya gova ePunono; ₄₃va suka ePunono, va ya gova eOboto; ₄₄va suka eOboto, va ya gova erhumbini ra Abarimi, endzilakaneni wa Mowabu; ₄₅va suka erhumbini ra Abarimi, va ya gova eDiboni-Gadi; ₄₆va suka eDiboni-Gadi, va ya gova eAlimoni-Diblatayimi: ₄₇va suka eAlimoni-Diblatayimi, va ya gova etintshaveni ta Abarimi, va langutene na Nebo; ₄₈va suka etintshaveni ta Abarimi, va ya gova erivaleni ra Mowabu, kusuhi na Yordani na Yeriko: ₄₉va gova ekusuhi na Yordani, ku suka eBeta-Yeximoto ku fika eAvele-Xitimi, erivaleni ra Mowabu.

₅₀Kutani Yehovha a byela Muxe erivaleni ra Mowabu, ekusuhi na Yordani na Yeriko, a ku: ₅₁“Byela vana va Israele, u ku eka vona; kutakuloko mi nghenile etikweni ra Kanana, mi perile Yordani, ₅₂mi ta hlongola emahlweni ka n'wina vaaki hinkwavo va tiko, mi onha swifaniso hinkwaswo swa vona, mi heta swifaniso hinkwaswo swa vona leswi chuluriweke; mi hlanhla swivandla swa vona hinkwaswo leswi tlakukeke. ₅₃Mi ta teka tiko, mi aka kona, hikuva ndzi mi nyikile tiko ku ri fuma. ₅₄Mi ta avanyisa tiko hi vuhlolotwana, hi tinyimba ta n'wina: mi nyika ndzhaka leyikulu eka lava taleke; eka lava nga talangiki, mi va nyika ndzhaka leyitsongo. Un'wana ni un'wana u ta fuma lexi a nga ta averiwa xona hi vuhlolotwana, mi ta amukela ndzhaka ya n'wina hi tinyimba ta vatata wa n'wina. ₅₅Kambe loko mi nga hlongoli emahlweni ka n'wina vaaki va tiko, lava mi nga ta va tshika exikarhi ka n'wina, va ta va kukotisa mitwa emahlweni ya n'wina, ni risungunhu ematsheveni ya n'wina va ta mi endla valala va vona etikweni leri mi nga ta aka eka rona. ₅₆Kutani leswi ndzi tiyiseke ku swi endla eka vona, ndzi ta swi endla eka n'wina.”