Ta Vamidiyani loko va hluriwa.
1Yehovha a byela Muxe, a ku: 2“Rihisela vana va Israele eka Vamidiyani; kutani u ta rhurhela eka varikwenu.”
3Kutani Muxe a byela tiko, a ku: “Vavanuna exikarhi ka n'wina va ta hloma va huma nyimpi, va ya hlasela Midiyani ku rihisela Yehovha eka Vamidiyani. 4Mi ta rhuma enyimpini vavanuna va 1 000 hi nyimba yin'wana ni yin'wana ya Vaisraele, va ta huma etinyimbeni hinkwato.”
5Ku hume vanhu va 1 000, enyimbeni yin'wana ni yin'wana exikarhi ka magidi ya Israele va ri vavanuna va 12 000 lava hlomeke ku huma nyimpi. 6Muxe a va rhuma eku lweni, va ri na Finiyasi, n'wana Eliyazara, muprista, a tamele swibya leswi hlawuriweke, ni tinanga leto pfuma. 7Va ya lwa na Midiyani hilaha Yehovha a leriseke Muxe hakona; va dlaya vavanuna hinkwavo. 8Va dlaya ni tihosi ta Midiyani a ri Evhi, na Rekemu, na Suru, na Huru, na Reba, ti ri tihosi ta ntlhanu ta Midiyani; va dlaya hi tlhari na Balaama, n'wana Beyori. 9Vana va Israele va khoma vavasati va Midiyani ni swihlangi swa vona; va teka ni swifuwo swa vona hinkwaswo, ni mitlhambi ya vona hinkwayo, ni rifuwo ra vona hinkwaro. 10Kutani va hisa miti hinkwayo leyi va akeke eka yona, ni mixaxa hinkwayo ya vona. 11Va teka xuma ni hinkwaswo leswi va swi khomeke, hambi vanhu hambi swifuwo. 12Kutani va tisa eka Muxe ni ka Eliyazara muprista ni ka nhlengeletano hinkwayo ya vana va Israele, vakhomiwa, ni leswi va swi khomeke ni xuma, va swi tisa emixaxeni, erivaleni ra Mowabu, ekusuhi na Yordani na Yeriko.
13Muxe na Eliyazara, muprista ni tihosi hinkwato ta nhlengeletano va huma ku ya hlangana na vona ehandle ka mixaxa. 14Kavaloko Muxe a karihela tindhuna ta nyimpi ti ri tindhuna ta magidi ni tindhuna ta madzana leti vuyeke eku lweni. 15Muxe a ku eka vona: “Xana mi tshikile vavasati hinkwavo va hanya xana? 16Kasi hi vona loko va byeriwe i Balaama, lava susumeteke vana va Israele ku dyohela Yehovha emhakeni ya Peyori kutani ku humelele ntungu enhlengeletanweni ya Yehovha. 17Sweswi, dlayani wanuna un'wana ni un'wana exikarhi ka swihlangi, mi dlaya ni vavasati hinkwavo lava tivaneke ni vavanuna. 18Kambe vanhwanyana lava nga tivanangiki ni vavanuna mi va tshika va hanya, va ta va va n'wina. 19Loko mi ri n'wina, mi ta gova masiku ya 7 ehandle ka mixaxa, hinkwenu lava mi dlayeke munhu ni hinkwenu lava mi khumbeke mufi, mi ta tibasisa siku ra vunharhu, ni siku ra vu-7, mi ri n'wina ni vakhomiwa va n'wina. 20Mi ta basisa tinguvu hinkwato, ni madzovo hinkwawo, ni hinkwaswo leswi lukiweke hi mavoya ya timbuti, ni swibya hinkwaswo swa ku vatliwa.”
21Eliyazara, muprista, a ku eka vanhu va nyimpi lava humeke eku lweni: “Hi kona ku lerisa ka nawu lowu Yehovha a wu leriseke Muxe. 22Loko wu ri nsuku, ni silivhere, ni koporo, ni nhumbu, ni thini, ni ntsopfu, 23hinkwaswo leswi nga tshwiki endzilweni, mi ta swi nghenisa endzilweni, kutani swi ta va swi tengile; hambiswiritano swi ta basisiwa hi mati ya ku basisa. Hinkwaswo leswi nga tshwaka endzilweni, mi ta swi nghenisa ematini. 24Mi ta hlantswa tinguvu ta n'wina hi siku ra vu-7, kutani mi ta tenga; kavaloko mi ta nghena emixaxeni.”
25Yehovha a ku eka Muxe: 26“Hlaya leswi khomiweke, vanhu ni swifuwo, u swi hlaya u ri na Eliyazara, muprista, ni tihosi ta tindlu ta nhlengeletano. 27Kutani u ta avanyisa leswi khomiweke exikarhi ka lava hlomeke, lava humeke nyimpi, ni nhlengeletano hinkwayo. 28U ta pambulela Yehovha nhlengo eku averiweni ka lava hlomeke, lava humeke nyimpi, nhloko yin'we hi ntlhanu wa madzana, hambi vanhu, hambi tihomu, ni timbhongolo, ni swifuwo leswitsongo. 29Mi ta swi pambula ehenhla ka hafu ya leswi va swi kumeke, kutani u ta swi nyika Eliyazara, muprista, wu va nhlengo lowu pambuleriweke Yehovha. 30Eku avanyisiweni ka vana va Israele, u ta pambula nhloko yin'we eka ntlhanu wa makume, hambi vanhu, hambi tihomu, ni timbhongolo, ni swifuwo leswitsongo, ni leswi hanyaka hinkwaswo; u ta swi nyika Valevhi lava hlayisaka yindlu ya Yehovha.”
31Muxe na Eliyazara va endla hilaha Yehovha a leriseke Muxe hakona.
32Leswi khomiweke, swi ri leswi seleke swa xuma lexi vanhu va nyimpi va xi tekeke, a ti ri tinhloko ta swifuwo leswitsongo ta 675 000 ni tihomu ta 72 000, 33ni timbhongolo ta 61 000; 34ni vanhu, va nga vavasati lava nga tivanangiki na vavanuna, va 32 000. 35Hafu ya swona ku ve ku averiwa ka lava humeke nyimpi, 36a swi ri swifuwo leswitsongo swa 337 500; 37ni nhlengo wa Yehovha wa swifuwo leswitsongo a swi ri swa 675; 38hafu ya tihomu, ti ri ta 36 000, ni nhlengo wa Yehovha wa tihomu ti ri ta 72; 39hafu ya timbhongolo, ti ri ta 30 500, ni nhlengo wa Yehovha wa timbhongolo ti ri ta 61, 40hafu ya vanhu, va ri va 16 000, ni nhlengo wa Yehovha wa vanhu va ri va 32. 41Kutani Muxe a nyika Eliyazara muprista, nhlengo lowu pambuleriweke Yehovha, hi laha Yehovha a leriseke Muxe hakona.
42Loko yi ri hafu leyi averiweke vana va Israele, leyi Muxe a yi avanyiseke ni leyi ya vanhu va nyimpi, 43ku averiwa ka nhlengeletano a swi ri swifuwo leswitsongo swa 337 500; 44ri swifuwo leswikulu swa 36 000; 45ni timbhongolo ta 30 500; 46ni vanhu va 16 000. 47Eka hafu ya vana va Israele, Muxe a pambula nhloko yin'we eka tinhloko ta 50 ta vanhu ni ta swifuwo; kutani a ti nyika Valevhi lava hlayisaka yindlu ya Yehovha, hilaha Yehovha a leriseke Muxe hakona.
48Kavaloko tindhuna ta makume ya madzana ta nyimpi, ti ri tindhuna ta makume ya madzana ni ta madzana, ti ta ka Muxe, ti ku eka yena: 49“Hina, malandza ya wena, hi hlayile vanhu va nyimpi lava nga ehansi ka hina, kutani a ku pfumariwi munhu exikarhi ka hina. 50Kutani hi tisile nhlengo wa Yehovha, un'wana ni un'wana leswi a swi kumeke, swi ri swilo swa nsuku, tiketananyana, ni masindza, ni swingwavila ni swingwavila swa tindleve, ni tintlhama, hi ta tiphahlela ha swona mhamba emahlweni ka Yehovha.” 51Muxe na Eliyazara, muprista, va amukela eka vona nsuku lowu, swi ri hinkwaswo swa mitirho leyo saseka. 52Nsuku hinkwawo lowu pamburiweke lowu va wu humeseleke Yehovha, a wu ri wa tixikele ta 16 750, swi huma eka tindhuna ta makume ya madzana, ni ka tindhuna ta madzana. 53Vanhu va nyimpi va tihlayisele un'wana ni un'wana leswi a swi phangeke. 54Kavaloko Muxe na Eliyazara, muprista, va teka nsuku wa tindhuna ta makume ya madzana ni ta madzana, kutani va wu tisa etabernakeleni ya nhlengeletano, swi va xitsundzuxo xa vana va Israele emahlweni ka Yehovha.
