TINHLAYO 29

₁“Hi n'hweti ya 7, hi siku ro rhanga ra n'hweti, mi nga va ni nhlengeletano leyi hlawuriweke; mi nga tshuki mi tirha ntirho ni wun'we lowo tika, ri ta va siku ra ku yimba tinanga eka n'wina. ₂Mi ta humesa holokosta ya risuna eka Yehovha, yi va nkunzi ni khuna, ni swinyimpfana swa 7 swa lembe, swi nga ri na xivati; ₃ni nyiko ya mapa layo saseka, lama pfuviweke hi mafurha: ku avanyisa ka vukhume loku hlayiwaka kanharhu ku va ka nkunzi ni ku avanyisa ka vukhume loku hlayiwaka kambirhi eka khuna, ₄ni ku avanyisa ka vukhume ka xinyimpfana xin'wana ni xin'wana. ₅Mi ta humesa ni xiphongo xa gandzelo ra vudyoho; mi tiphahlela mhamba ha xona. ₆Mi ta swi humesa ehenhla ka holokosta ya n'weti ni nyiko ya yona, ni le henhla ka holokosta leyi nga heriki ni nyiko ya yona, ni vucheleto bya swona, hi nawu wa swona; i gandzelo leri hisiwaka hi ndzilo, leri nga ni risuna leri nun'hwelaka eka Yehovha.

₇“Hi siku ra khume ra n'hweti leyi ya 7, mi ta va ni nhlengeletano leyi hlawuriweke, mi ta tsongahata mimoya ya n'wina, mi nga tshuki mi tirha ntirho ni wun'we; ₈mi ta humesela Yehovha holokosta ri va risuna; yi va nkunzi, ni khuna, ni swinyimpfana swa 7 swa lembe: mi swi teka swi nga ri na xivati. ₉Nyiko ya swona yi ta va ya mapa layo saseka, lama pfuviweke hi mafurha: ku avanyisa ka vukhume loku hlayiweke kanharhu ku va ka nkunzi; ₁₀ni ku avanyisa ka vukhume loku hlayiweke kambirhi eka khuna, ni ku avanyisa ka vukhume eka xinyimpfana xin'wana ni xin'wana xa swinyimpfana swa 7; ₁₁mi ta humesa ni xiphongo xa gandzelo ra vudyoho, ehandle ka gandzelo ra ku riha, ni holokosta ya masiku, ni nyiko ya yona, ni vucheleto bya swona.

₁₂“Hi siku ra 15 ra n'hweti ya 7, mi ta va ni nhlengeletano leyi hlawuriweke, mi nga tshuki mi tirha ntirho lowo tika, kambe hi masiku ya 7 mi ta endlela Yehovha nkhuvo. ₁₃Mi ta humesa holokosta, ri va gandzelo leri hisiwaka ni risuna eka Yehovha, tinkunzi ta 13, ni makhuna mambirhi, ni swinyimpfana swa 14 swa lembe, leswi nga riki na xivati. ₁₄Nyiko ya swona yi ta va ya mapa layo saseka lama pfuviweke hi mafurha: ku ri ku avanyisa ka vukhume loku hlayiweke kanharhu eka nkunzi yin'wana ni yin'wana ya tinkunzi leta 13, ni ku avanyisa ka vukhume loku hlayiweke kambirhi, eka khuna rin'wana ni rin'wana ra makhuna lamambirhi, ₁₅ni ku avanyisa ka vukhume ka xinyimpfana xin'wana ni xin'wana xa swinyimpfana swa 14; ₁₆mi ta humesa ni xiphongo xa gandzelo ra vudyoho ehandle ka holokosta ya masiku, ni nyiko ya yona, ni vucheleto bya yona.

₁₇“Hi siku ra vumbirhi mi ta humesa tinkunzi ta 12, ni makhuna mambirhi, ni swinyimpfana swa 14 swa lembe, leswi nga riki na xivati; ₁₈mi ta humesa ni tinyiko ni vucheleto, swi ri swa tinkunzi ni swa makhuna ni swa swinyimpfana hi ntsengo wa swona, ni nawu wa swona; ₁₉ni xiphongo xa gandzelo ra vudyoho, ehandle ka holokosta ya masiku, ni nyiko ya yona, ni vucheleto bya yona.

₂₀“Hi siku ra vunharhu, tinkunzi ta 11 ni makhuna mambirhi, ni swinyimpfana swa 14, swa lembe, leswi nga riki na xivati, ₂₁ni tinyiko ni vucheleto, swi ri swa tinkunzi, ni swa makhuna, ni swa swinyimpfana, hi ntsengo wa swona, ni nawu wa swona; ₂₂ni xiphongo xa gandzelo ra vudyoho, ehandle ka holokosta ya masiku ni nyiko ya yona, ni vucheleto bya vona.

₂₃“Siku ra vumune, tinkunzi ta khume, ni makhuna mambirhi ni swinyimpfana swa 14 swa lembe; ₂₄ni tinyiko ni vucheleto, swi ri swa tinkunzi ni swa makhuna, ni swa swinyimpfana, hi ntsengo wa swona, ni nawu wa swona, ₂₅ni xiphongo xa gandzelo ra vudyoho, ehandle ka holokosta ya masiku ni nyiko ya yona, ni vucheleto bya yona.

₂₆“Hi siku ra vuntlhanu, tinkunzi ta 9, ni makhuna mambirhi, ni swinyimpfana swa 14, swa lembe, leswi nga riki na xivati; ₂₇ni tinyiko ni vucheleto, swi ri swa tinkunzi, ni swa makhuna, ni swa swinyimpfana hi ntsengo wa swona, ni nawu wa swona; ₂₈ni xiphongo xa gandzelo ra vudyoho, ehandle ka holokosta ya masiku, ni nyiko ya yona, ni vucheleto bya yona.

₂₉“Hi siku ra ntlhanu na rin'we, tinkunzi ta 8, ni makhuna mambirhi, ni swinyimpfana swa 14, swa lembe, leswi nga riki na xivati; ₃₀ni tinyiko ni vucheleto, swi ri swa tinkunzi, ni swa makhuna, ni xa swinyimpfana, hi ntsengo wa xona, ni nawu wa swona; ₃₁ni xiphongo xa gandzelo ra vudyoho, ehandle ka holokosta ya masiku, ni nyiko ya yona, ni vucheleto bya yona.

₃₂“Hi siku ra ntlhanu na mambirhi, tinkunzi ta 7, ni makhuna mambirhi, ni swinyimpfana swa 14, swa lembe, leswi nga riki na xivati; ₃₃ni nyiko ni vucheleto, swi ri swa tinkunzi ni swa makhuna, ni swa swinyimpfana, hi ntsengo wa swona, ni nawu wa swona; ₃₄ni xiphongo xa gandzelo ra vudyoho, ehandle ka holokosta ya masiku ni nyiko ya yona, ni vucheleto bya yona.

₃₅“Hi siku ra ntlhanu na manharhu, mi ta va ni nhlengeletano leyi hlawuriweke, mi nga tshuki mi tirha ntirho ni wun'we lowo tika; ₃₆mi ta humesa holokosta, ri va gandzelo leri hisiwaka ra risuna eka Yehovha, nkunzi, ni khuna, ni swinyimpfana swa 7 swa lembe, leswi nga riki na xivati, ₃₇ni nyiko, ni vucheleto; swi ri swa nkunzi ni swa khuna ni swa swinyimpfana hi ntsengo wa swona, ni nawu wa swona, ₃₈ni xiphongo xa gandzelo ra vudyoho, ehandle ka holokosta ya masiku, ni nyiko ya yona, ni vucheleto bya yona.

₃₉“Hi swona leswi mi nga ta humesela Yehovha emikhubyeni ya n'wina, ehenhla ka magandzelo lawa mi ma humesaka ku tiyisa ku hlambanya ka n'wina, ni mihlengo ya ku tirhandzela ka n'wina, ti ri tiholokosta, ni tinyiko, ni vucheleto, ni magandzelo ya ku khensa.”