Ta vakamberi va khume na vambirhi.
1Kutani Yehovha a byela Muxe, a ku: 2“Rhuma vanhu va ya kambela tiko ra Kanana, leri ndzi ri nyikaka vana va Israele. Mi ta rhuma wanuna hi nyimba yin'wana ni yin'wana ya vatata wa n'wina, hinkwavo va va vakulukumba exikarhi ka vona.” 3Kutani Muxe a va rhuma hi ku lerisa ka Yehovha, loko va ri emananga ya Parani; vanhu lava a va ri vakulukumba va vana va Israele. 4Mavito ya vona hi lawa:
Wa nyimba ya Rhuveni, Xamuwa n'wana Zakuru; 5wa nyimba ya Simiyoni, Xafati, n'wana Hori; 6wa nyimba ya Yuda, Kalebe, n'wana Yefune; 7wa nyimba ya Isakara, Yigala, n'wana Yosefa; 8wa nyimba ya Efrayimi, Hoxeya, n'wana Nuni; 9wa nyimba ya Benjamini, Palati, n'wana Rafu; 10wa nyimba ya Zebuloni, Gadiele, n'wana Sodi; 11wa nyimba ya Yosefa, hileswaku, wa nyimba ya Manase, Gadi n'wana Susi; 12wa nyimba ya Dani, Amiele, n'wana Gemali; 13wa nyimba ya Asere, Setura, n'wana Mikaele; 14wa nyimba ya Neftali, Nahabi n'wana Vhofosi; 15wa nyimba ya Gadi, Guwele, n'wana Maki.
16Hi wona mavito ya vavanuna lava Muxe a va rhumeke ku ya kamba tiko; kutani Muxe a thya Hoxeya, n'wana Nuni, vito ra Yoxuwa. 17Muxe a va rhuma ku ya kamba tiko ra Kanana, a ku eka vona: “Tlhandlukani kona hitlhelo ra dzonga, mi khandziya entshaveni, 18mi ta vona tshamela ra tiko; mi vona ni vanhu lava akeke kona xana va tiyile kumbe va tsanile xana va tele kumbe a va talangi; 19mi ta vona ni tiko leri va akeke eka rona, xana ri sasekile kumbe ri bihile, ni miti leyi va akeke eka yona, xana i mixaxa kumbe makhokholo; 20ni misava, mi ta vona xana yi nonile kumbe yi ondzile; ni mirhi yi kona xana, kumbe ku hava? Tiyani, mi ta teka ni mihandzu ya tiko.” Kambe a wu ri nkarhi wa swirhangana swa vhinya.
21Kutani va tlhandluka, va ya kamba tiko, va suka emananga ya Sini, va ya fika eRehobo, endleleni ya Hamata. 22Va tlhandluka edzongeni, va ya fika eHebroni, laha Ahimani, na Xexayi, na Talimayi, vatukulu va Anaka i ngi va ri kona. Muti wa Hebroni wu rhangele Sowani wa Egipta hi malembe ya ntlhanu na mambirhi ku akiwa. 23Va ya fika enkoveni wa Exikolo, kutani va tsema xidzumba xa vhinya, va xi rhwala va ri vambirhi hi mpingu; va teka ni magirenada ni makuwa. 24Va thya xivandla lexi nkova wa Exikolo, hikwalaho ka xidzumba lexi vana va Israele va xi tsemeke kona.
25Kuteloko ku hundzile masiku ya 40, va tlhela eku kambeleni ka tiko. 26Kutani va famba va ya fika eka Muxe na Aroni, ni nhlengeletano hinkwayo ya vana va Israele, emananga ya Parani, ekusuhi ni Kadexe. Kutani va va ambela timhaka ni ka nhlengeletano hinkwayo, va va kombisa mihandzu ya tiko. 27Va byela Muxe timhaka, va ku: “Hi yile etikweni leri u hi rhumeke eka rona; kunene i tiko leri pfelelaka hi ntswamba ni vulombe, mihandzu ya kona hi leyi. 28Ntsena vanhu lava akeke etikweni leri, va tiyile, miti ya vona yikulu ngopfu, yi ni makhokholo; kambe hi vonile kona vatukulu va Anaka. 29Vaamaleke va akile edzongeni; Vahiti, ni Vayebusi, ni Vaamori va akile etintshaveni, Vakanana va akile ekusuhi ni lwandle, ni le ribuwini ra Yordani.”
30Kutani Kalebe a miyeta tiko hikuva a ri karihela Muxe; kambe a ku: “A hi fambeni, hi ya teka tiko, hikuva kunene hi ta va hlula.” 31Kambe vavanuna lava yeke na yena, a va ku: “Hi nga ka hi nga swi koti ku ya hlasela tiko leri hikuva ra hi tlula hi matimba.” 32Kutani va sandza tiko leri va ri kambeleke emahlweni ka vana va Israele va ku: “Tiko leri hi ri tsemakanyeke ku ri kamba, i tiko leri dlayaka vaaki va rona: vanhu hinkwavo lava hi va voneke va lehile ngopfu; 33hi vonile kona swihontlovila, vana va Anaka, va rixaka ra va swinkontlonkontlo, kutani, loko hi ri hina, a hi tifanisa ni tinjiya; kambe emahlweni ka vona hi fana ni tinjiya.”
