TINHLAYO 10

₁Yehovha a byela Muxe, a ku: ₂“Tiendlele tinanga timbirhi ta silivhere u ti endla hi silivhere leyi furiweke. U ta tirha ha tona ku vitana nhlengeletano, ni ku simurisa mitsonga. ₃Kungakuloko va yimba tona, nhlengeletano hinkwayo yi ta ta eka wena enyangweni ya tabernakela ya nhlengeletano. ₄Kutakuloko va yimba nanga yin'we ntsena, ku ta hlengeletana eka wena tihosi leti nga tindhuna ta mavandla ya Israele.

₅“Kungakuloko mi yimba hi matimba, mixaxa leyi yimaka evuxeni yi ta suka. ₆Kungakuloko mi yimba hi matimba ra vumbirhi, mixaxa leyi yimaka edzongeni yi ta suka. Ku ta yimbiwa hi matimba eku sukeni. ₇Kutakuloko mi vitana nhlengeletano, mi ta yimba nanga, kambe ku nga ri hi matimba. ₈I vaprista, vana va Aroni lava nga ta yimba tinanga. Ku ta va ku lerisa loku nga heriki eka n'wina ni ka vatukulu va n'wina.

₉“Kutakuloko mi huma nyimpi etikweni ra n'wina ku ya lwa ni valala va n'wina, loko va mi pfuka mi ta yimba tinanga hi matimba kutani mi ta tsundzuxiwa emahlweni ka Yehovha, Xikwembu xa n'wina mi va mi ponisiwa emavokweni ya valala va n'wina. ₁₀Emasikwini ya ku tsaka ka n'wina, ni le mikhubyeni ya n'wina, ni le ku sunguleni ka tin'hweti, mi ta yimba tinanga mi ri karhi mi humesa tiholokosta, ni magandzelo ya n'wina ya ku khensa, swi ta va xitsundzuxo emahlweni ka Xikwembu xa n'wina. Hi mina Yehovha, Xikwembu xa n'wina.”

₁₁Kute hi lembe ra vumbirhi, hi n'hweti ya vumbirhi, hi siku ra 20 papa ri suka ehenhla ka Yindlu ya vumbhoni. ₁₂Kutani vana va Israele va suka emananga ya Sinayi, va famba hi mimpfhuka ya vona kutani papa ri ya yima emananga ya Parani. ₁₃Va suka leswo rhanga hi nomu wa Yehovha, hilaha a leriseke Muxe hakona.

₁₄Mfungho wa nxaxa wa Yuda wu suka eku sunguleni, va suka hi mavandla ya vona; vandla ra Yuda ri fambisiwa hi Nahaxoni, n'wana Aminadaba; ₁₅vandla ra nyimba ya vana va Isakara, hi Netanele, n'wana Suwara; ₁₆vandla ra nyimba ya vana va Zebuloni, hi Eliyabu, n'wana Heloni.

₁₇Yindlu yi hlanhliwa, kutani vana va Gerixoni, ni vana va Merari va suka, va rhwele yindlu. ₁₈Mfungho wa nxaxa wa Rhuveni wu suka hi mavandla ya vona: vandla ra Rhuveni ri fambisiwa hi Elizuri, n'wana Xedewuru; ₁₉vandla ra nyimba ya vana va Simiyoni hi Xelumiele, n'wana Suri-Xadayi; ₂₀vandla ra nyimba ya vana va Gadi, hi Eliyasafa, n'wana Duwele.

₂₁Kutani va Kohata, lava rhwalaka swilo leswi hlawuriweke va suka, kutani van'wana va yimisa Yindlu, va ko va fika.

₂₂Mfungho wa nxaxa wa vana va Efrayimi wu suka hi mavandla ya vona: vandla ra Efrayimi ri fambisiwa hi Elixama, n'wana Amihudi; ₂₃vandla ra nyimba ya vana va Manase hi Gamaliele, n'wana Pedasuru; ₂₄vandla ra nyimba ya vana va Benjamini hi Abidana, n'wana Gidiyoni.

₂₅Mfungho wa nxaxa wa vana va Dani wu suka, wu famba endzhaku ka mixaxa hinkwayo, hi mavandla ya vona: vandla ra Dani ri fambisiwa hi Ahiezere, n'wana Amixadayi; ₂₆vandla ra nyimba ya vana va Asere hi Pagiele, n'wana Okirani; ₂₇vandla ra nyimba ya vana va Neftali hi Ahira, n'wana Enana.

₂₈Hi wona mafambele ya vana va Israele hi tinyimba ta vona; kutani va suka.

₂₉Muxe a ku eka Hobabu, n'wana Rhuwele, wa Midiyani, mukon'wana wa Muxe: “Ho famba ku ya etikweni leri Yehovha a nga vula loko a te: ‘Ndzi ta mi nyika rona.’ Famba na hina, hi ta ku endlela swinene, hikuva Yehovha u hlayele Israele leswinene.” ₃₀Hobabu a ku eka yena: “Ndzi nga ka ndzi nga yi, kambe ndzi ta ya etikweni ra mina ni le ka varikwerhu.” ₃₁Muxe a ku: “U nga hi tshiki, ndza ku khongela, hikuva wa tiva mimpfhuka ya hina emananga, u ta va mahlo ya hina. ₃₂Kutakuloko u famba na hina, swinene leswi Yehovha a nga ta hi endlela swona, hi ta avelana na wena.”

₃₃Kavaloko va suka entshaveni ya Yehovha, va famba ndlela ya masiku manharhu, areka ya ntwanano wa Yehovha yi ri karhi yi famba emahlweni ka vona endlela ya masiku manharhu, yi ya va lavela xivandla xa ku wisa. ₃₄Papa ra Yehovha a ri ri ehenhla ka vona ninhlekanhi eku sukeni ka vona emixaxeni.

₃₅Eku sukeni ka areka, Muxe a a ku: “Pfuka, Yehovha! Valala va wena a va hangalasiwe, lava ku vengaka a va hlongorisiwe emahlweni ka wena.” ₃₆Ni le ku vekiweni ka yona, a a ku: “Vuya, Yehovha, eka madzana ya madzana ya Israele.”