Ntsengo wa tinyimba ta 12 ta Israele.
1Yehovha a byela Muxe loko a ri emananga ya Sinayi, etabernakeleni ya nhlengeletano, hi siku ro rhanga ra n'hweti ya vumbirhi, hi lembe ra vumbirhi ra ku huma ka vona etikweni ra Egipta, a ku:
2“Hlayani vana hinkwavo va Israele, mi ya hi tindlu ta vona, ni swivongo swa vatata wa vona, mi hlaya mavito ya vavanuna hinkwavo hi tinhloko ta vona, 3ku sungula hi va malembe ya 20 ni lava tlulaka, mi hlaya, wanuna un'wana ni un'wana la hlomaka eIsraeleni; u ta hlaya ntsengo wa vona hi mavandla ya vona, u ri na Aroni; 4ku ta huma na n'wina wanuna wa nyimba yin'wana ni yin'wana, yi nga hosi ya yindlu ya vatata wa yena.”
5Hi wona mavito ya vavanuna lava nga ta mi pfuna:
Enyimbeni, ya Rhuveni, Elizuri, n'wana Xedewuru;
6ya Simiyoni, Xelumiele, n'wana Suri-Xadayi;
7ya Yuda, Nahaxoni, n'wana Aminadaba;
8ya Isakara, Netanele, n'wana Suwara;
9ya Zebuloni, Eliyabu, n'wana Heloni;
10ya vana va Yosefa: ya Efrayimi, Elixama n'wana Amihudi; ya Manase, Gamaliele, n'wana Pedasuru;
11ya Benjamini, Abidana, n'wana Gidiyoni;
12ya Dani, Ahiezere, n'wana Amixadayi;
13ya Asere, Pagiele, n'wana Okirani;
14ya Gadi, Eliyasafa, n'wana Duwele;
15ya Neftali, Ahira, n'wana Enana.
16Hi vona lava nga vitaniwa enhlengeletanweni, ti ri tihosi ta tinyimba ta vatata wa vona; hi tona tihosi ta madzanadzana ya Israele.
17Muxe na Aroni va teka vavanuna valavo lava hlayiweke hi mavito ya vona, 18kutani hi siku ro rhanga ra n'hweti ya vumbirhi, va hlengeleta nhlengeletano hinkwayo, va tsariwa hi tindlu ta vona ni tinyimba ta vona, va ri karhi va hlaya mavito hi tinhloko ku sungula hi va malembe ya 20 ni lava tlulaka, 19hilaha Yehovha a leriseke Muxe hakona; a va hlaya emananga ya Sinayi.
20Vana va Rhuveni, mativula ya Israele, vatukulu va vona hi tindlu ta vona, ni tinyimba ta vona, loko va hlaya mavito hi tinhloko, vavanuna hinkwavo, ku sungula hi va malembe ya 20, ni lava tlulaka, va ri vavanuna hinkwavo lava hlomaka: 21lava tsariweke va nyimba ya Rhuveni, a va ri 46 500.
22Vana va Simiyoni, vatukulu va vona hi tindlu ta vona, ni tinyimba ta tona, lava tsariweke hi ku hlaya mavito ya vavanuna hinkwavo hi tinhloko ta vona, ku sungula hi va malembe ya 20, ni lava tlulaka, va ri vavanuna hinkwavo lava hlomaka: 23lava tsariweke va nyimba ya Simiyoni, a va ri 59 300.
24Vana va Gadi, vatukulu va vona hi tindlu ta vona ni tinyimba ta vona, loko va hlaya mavito ya vavanuna hinkwavo lava hlomaka ku sungula hi va malembe ya 20 ni lava tlulaka, 25lava tsariweke va nyimba ya Gadi, a va ri 45 650.
26Vana va Yuda, vatukulu va vona hi tindlu ta vona, ni tinyimba ta vona, lava tsariweke hi ku hlaya mavito ya vavanuna hinkwavo lava hlomaka, ku sungula hi va malembe ya 20, ni lava tlulaka; 27lava tsariweke va nyimba ya Yuda a va ri 74 600.
28Vana va Isakara, vatukulu va vona hi tindlu ta vona, ni tinyimba ta vona, loko va hlaya mavito ya vavanuna hinkwavo lava hlomaka, ku sungula hi va malembe ya 20 ni lava tlulaka; 29lava tsariweke va nyimba ya Isakara a va ri 54 400.
30Vana va Zebuloni, vatukulu va vona hi tindlu ta vona, ni tinyimba ta vona, loko va hlaya mavito ya vavanuna hinkwavo lava hlomaka, ku sungula hi va malembe ya 20, ni lava tlulaka; 31lava tsariweke va nyimba ya Zebuloni a va ri 57 400.
32Vana va Yosefa: vana va Efrayimi, vatukulu va vona hi tindlu ta vona, ni tinyimba ta vona, loko va hlaya mavito ya vavanuna hinkwato lava hlomaka, ku sungula hi va malembe ya 20, ni lava tlulaka; 33lava tsariweke va nyimba ya Efrayimi, a va ri 40 500.
34Vana va Manase, vatukulu va vona hi tindlu ta vona, ni tinyimba ta vona, loko va hlaya mavito ya vavanuna hinkwavo lava hlomaka ku sungula hi va malembe ya 20 ni lava tlulaka; 35lava tsariweke va nyimba ya Manase a va ri 32 200.
36Vana va Benjamini, vatukulu va vona hi tindlu ta vona ni tinyimba ta vona, loko va hlaya mavito ya vavanuna hinkwavo lava hlomaka ku sungula hi va malembe ya 20, ni lava tlulaka; 37lava tsariweke va nyimba ya Benjamini a va ri 35 400.
38Vana va Dani, vatukulu va vona hi tindlu ta vona, ni tinyimba ta vona, loko va hlaya mavito ya vavanuna hinkwavo lava hlomaka, ku sungula hi va malembe ya 20, ni lava tlulaka; 39lava tsariweke va nyimba ya Dani a va ri 62 700.
40Vana va Asere, vatukulu va vona hi tindlu ta vona, ni tinyimba ta vona, loko va hlaya mavito ya vavanuna hinkwavo lava hlomaka, ku sungula hi va malembe ya 20, ni lava tlulaka; 41lava tsariweke va nyimba ya Asere a va ri 41 500.
42Vana va Neftali, vatukulu va vona hi tindlu ta vona, ni tinyimba ta vona, loko va hlaya mavito ya vavanuna hinkwavo lava hlomaka, ku sungula hi va malembe ya 20, ni lava tlulaka; 43lava tsariweke va nyimba ya Neftali, a va ri 53 400.
44Hi vona lava tsariweke i Muxe na Aroni va ri ni vavanuna va 12 ti nga tihosi ta Israele; wanuna un'we wa nyimba yin'wana ni yin'wana ya vatata wa vona. 45Hinkwavo vana va Israele lava tsariweke hi tindlu ta vatata wa vona, ku sungula hi va malembe ya 20, ni lava tlulaka, va ri vavanuna hinkwavo lava hlomaka; 46ntsengo hinkwawo wa vona lava tsariweke a va ri 603 550.
47Loko va ri vana va Levhi, hi nyimba ya tata wa vona, a va tsariwanga na vona. 48Yehovha a byela Muxe, a ku: 49“Loko yi ri nyimba ya Levhi ntsena, u nga tsali tinhloko ta vona exikarhi ka vana va Israele. 50U ta veka emavokweni ya vana va Levhi yindlu ya vumbhoni ni swibya hinkwaswo swa yona, ni hinkwaswo swa yona. Va ta rhwala yindlu ni swingolongondzwana hinkwaswo swa yona; va ta tirha ntirho wa yona, kambe va ta gova ekusuhi ni yindlu hi ku yi rhendzela. 51Kutakuloko yindlu yi suka, Valevhi va ta yi hlanhla, ni loko yindlu yi yima, Valevhi va ta yi dzima; kambe wamatiko la nga ta yi tshinelela u ta dlawa.
52“Vana va Israele va ta gova un'wana ni un'wana exivandleni xa yena, ekusuhi ni mfungho wa yena hi mitlawa ya vona. 53Kambe Valevhi va ta gova ekusuhi ni yindlu ya vumbhoni, va yi rhendzela, leswaku vukari bya mina byi nga tshuki byi pfurhela nhlengeletano ya vana va Israele; kutani Valevhi va ta langutela yindlu ya vumbhoni.” 54Vana va Israele va endla hinkwaswo hilaha Yehovha a leriseke Muxe hakona; va endlisa sweswo.
