Ku dyoha ka Ninivha ku n'wi lovisile.
1Yo! Muti wa ngati! Wu tele ku xisa ni ku dlaya; kona, a ku tshikiwi ku phanga.
2Twanani mpfumawulo wa swimoko, ni pongo lerikulu ra masondzo ya tigolonyi, ni tihanci leti tsutsumaka, ni tigolonyi leti tlulaka! 3Vakhandziyi va nyiketa, savula ra hatima, fumu ra hatima, lava tlhaviweke hi lavanyingi — i tinyandzanyandza ta lava dlaweke, a ku na laha mitsumbu yi helaka kona — va khunguvanyeka hi mitsumbu leyi feke!
4Hikwalaho ka vuoswi lebyikulu bya muoswi, la teleke hi swo tsakisa, la tlhariheke hi vuloyi, la xavisaka matiko hi ku oswana ka yena, ni swivongo hi vuloyi bya yena. 5Vona, ndzi ta eka wena, ku vula Yehovha wa mavandla; ndzi ta ku funungula nguvu ya wena, ndzi yi vuyisela emahlweni ka wena, ndzi ta kombisa matiko vuxeti bya wena, ndzi kombisa ku fuma tingana ta wena; 6ndzi ta hoxa thyaka ehenhla ka wena, ndzi ku sandzisa, ndzi ku endla xilo lexi hlamarisaka; 7kutani ku ta endlakala leswaku hinkwavo lava ku vonaka va ta ku balekela, kutani va ta ku: Ninivha u onhiwile! La nga n'wi rilelaka i mani? Ndzi nga ku lavela vachaveleri kwihi?
8Xana u tlula No-Amoni, muti lowu ingi wu tshamise ehenhla ka milambu, ingi wu rhendzeriwe hi mati, lowu lwandle ingi xi ri xisirheleto xa wona, kutani rirhangu ra wona a ri huma elwandle? 9Vakuxi va matimba lamakulu, ni Vaegipta lava nga hlayiwiki, Vaputu ni Valibiya a va ri vatati va wona. 10Hambiswiritano, na wona, wu susiwile, wu ye evukhumbini; vana va wona va fayeteriwe emakun'wini hinkwawo ya mitsendzele va hlahluva timbhuri ta wona hi vuhlolotwana, ni vakulukumba va wona hinkwavo va bohiwa hi tiketana. 11Na wena, u ta pyopya, u va u tifihla; na wena, u ta va u lava xichavelo ku tisirheleta eka valala.
12Makhokholo ya wena hinkwawo i masimu ya mikuwa leyi vekeke swirhangana; kakuloko swi hlakahliwa swi wela enon'wini wa la swi dyaka. 13Vona, vanhu va wena lava nga eka wena i vavasati ntsena; tihuvo ta tiko ra wena ti tipfulele lava nga valala eka wena, swipfalo swa wena swi hisiwa hi ndzilo!
14Tikele mati, hikuva u ta siveleriwa; tiyisa makhokholo ya wena, nghena endzhopeni, u pfuva ndzhope, u aka hondo yo hisa switina. 15Kona ndzilo wu ta ku hisa, fumu ri ku lovisa; ri ta ku dya kukotisa tinjiya, hambi u tele ku fana ni tinjiya, u andza kukotisa swijajani.
16Vapindzuri va wena va andzile ku tlula tinyeleti ta matilo, i tinjiya leti yimisaka timpapa kutani ti haha! 17Swibombi swa wena swi kotisa tinjiya, ni vatlhavani va wena va kotisa tinjiya ta mavandla leti tshameke eswihlahleni, siku ku titimelaka; kakuloko dyambu ri tlhava, ti suka, kambe ku nga tiviwi laha ti yeke kona. 18Wena hosi ya Asiriya, varisi va wena va etlele; tinhenha ta wena ti sikamile; vanhu va wena va hangalake etintshaveni, a ku na loyi a va hlengeletaka! 19Mbanga ya wena a yi na ku kandziwa, matshimbi ya wena a ma na ku hola! Hinkwavo lava twaka ta wena, va ta ku phakatela hi mandla; hikuva vumbabva bya wena byi kayele mani eku humeleleni ka byona xana?
