MARKA 5

₁Kutani va fika entsungeni wa lwandle, etikweni ra Vagadara. ₂Kuteloko a ha ku huma ebyatsweni, munhu loyi ingi a ri ni moya wa thyaka, la humaka emasirheni, a hatlisa a hlangana na yena. ₃A a tshama emasirheni; kambe a ku nga ri na munhu la kotaka ku n'wi boha, hambi ku ri hi timpecana, ₄hikuva a bohiwile hakanyingi hi khotso ni timpecana, kambe a tshovile khotso, a tsemile timpecana, kutani a ku nga ri na munhu la swi kotaka ku n'wi hlula. ₅Hi masiku hinkwawo, vusiku ni nhlekanhi, a a tshama etintshaveni ni le masirheni, a ri karhi a huwelela, a tikhandla hi maribye. ₆Kuteloko a vonile Yesu, a ha ri ekule, a tsutsuma a ya n'wi khinsamela. ₇Kutani a huwelela hi rito lerikulu, a ku: “Mhaka ya wena na mina hi yihi Yesu, N'wana wa Xikwembu xa le henhla? Ndza ku hlambanyela hi Xikwembu leswaku u nga tshuki u ndzi xanisa.” ₈Hikuva Yesu a a te eka yena: “Huma eka munhu loyi, we moya wa thyaka.” ₉Kutani a vutisa, a ku: “Vito ra wena u mani?” Wu hlamula wu ku: “Vito ra mina ndzi Vandla, hikuva hi tele.” ₁₀Kutani a n'wi khongela ngopfu leswaku a nga tshuki a n'wi hlongolela ehandle ka tiko rero.

₁₁Kambe ntlhambi lowukulu wa tinguluve a wu ri kona kwalaho etintshaveni wu dya; ₁₂kutani mademona hinkwawo ma n'wi khongela, ma ku: “Wa nga hi rhumela etingulubyeni hi nghena eka tona.” ₁₃Yesu a hatlisa a ma pfumelela. Kavaloko mimoya yoleyo ya thyaka yi nghena etingulubyeni, kutani ntlhambi wu tsutsumela hi matimba eriweni, wu tihoxa elwandle; (ti lave ku va makume mambirhi ya madzana), kutani ti nwela elwandle. ₁₄Lava ngi va risa tinguluve va tsutsuma va ya byela va muti ni va le masin'wini, kutani volavo va huma, va ya vona leswi humeleleke. ₁₅Kuteloko va fikile eka Yesu, va vona loyi ingi a ri ni vandla ra mademona a tshamile, a ambele, a ri munhu, kutani va chava ngopfu. ₁₆Lava swi voneke va va byela leswi humeleleke eka munhu loyi ingi a ri ni mademona ni swa tinguluve. ₁₇Kutani va sungula ku khongela Yesu leswaku a suka etikweni ra vona.

₁₈Yesu loko a nghenile ebyatsweni munhu loyi ingi a ri ni mademona a n'wi khongela leswaku a n'wi pfumelela ku tshama na yena. ₁₉Kambe Yesu a nga n'wi pfumelelanga, ntsena a ku eka yena: “Famba eka rikwenu ni ka vamakwenu, u ya va tivisa hinkwaswo leswi Hosi yi ku endleleke swona, ni hilaha yi ku tweleke vusiwana hakona.” ₂₀Kavaloko a suka, a sungula ku twarisa etikweni ra Dekapolisi hinkwaswo leswi a swi endleriweke hi Yesu; kutani hinkwavo va hlamala.

₂₁Kuteloko Yesu a pelerile entsungeni hi byatso, ntshungu lowukulu wu hlengeletana eka yena; kambe a a ri ekusuhi ni lwandle. ₂₂Kutani ku fika munhu loyi a vuriwaka Yayiro, un'wana wa tihosi ta sinagoga; kakuloko a vona Yesu, a tiwisa emilengeni ya yena, ₂₃a n'wi khongela ngopfu, a ku: “N'wananga wa fa, wanga ta u n'wi tlhandleka mavoko ehenhla, a ta pfuniwa, a hanya.” ₂₄Yesu a ya na yena; kutani ntshungu lowukulu wu n'wi landzela, wu ko wu n'wi kamanyeta.

₂₅Kambe wansati loyi ingi a ri ni vuvabyi bya switlhandla hi malembe ya khume na mambirhi, ₂₆loyi ingi a xanisiwile emavokweni ya tin'anga leto tala, a hetile xuma xa yena hinkwaxo, kambe a nga pfuniwanga ha nchumu, vuvabyi byi engeteleka; ₂₇kakuloko a twa timhaka ta Yesu, a ya entshungwini, a nghena hi le ndzhaku, kutani a khumba nguvu ya yena, hikuva a ku: ₂₈“Hambi ndzi nga khumba nguvu ya yena ntsena, ndzi ta hanya.” ₂₉Kutani hi nomu lowu, ngati ya yena yi siveka, a titwa emirini wa yena leswaku vuvabyi bya yena byi herile. ₃₀Kambe Yesu u swi tivile leswaku matimba man'wana a ma humile eka yena, kutani a hundzulukela eka ntshungu, a ku: “I mani la khumbeke nguvu ya mina?” ₃₁Vadyondzisiwa va yena va ku eka yena: “A ku voni leswaku ntshungu wa ku kamanyeta, u vutisela yini leswaku ndzi khumbe hi mani xana?” ₃₂Yena a rhalarhala hinkwako ku vona loyi a swi endleke. ₃₃Kutani wansati a khomiwa hi ku chava, a ri karhi a rhurhumela hi ku tiva leswi endliweke emirini wa yena, kutani a ta, a n'wi khinsamela, a n'wi byela swinene hinkwaswo. ₃₄Yesu a ku eka yena: “N'wananga, ku pfumela ka wena ku ku hanyisile, famba hi ku tsaka, u hanyisiwile evuvabyini bya wena.”

₃₅A ku a ha vulavula, vanhu lava humaka eka hosana ya sinagoga va fika, va ku: “N'wanaku u file, wa ha karhatela yini mufundhisi?” ₃₆Kambe Yesu, kakuloko a twa leswi vuriwaka, a ku eka hosana ya sinagoga: “U nga chavi, pfumela ntsena.” ₃₇Kutani a nga pfumelelanga munhu ku n'wi landza, loko a nga ri Petro, na Yakobo, na Yohane, makwa Yakobo. ₃₈Kuteloko a fike endlwini ya hosana ya sinagoga, a vona pongo, ni lava rilaka, va bongosaka ngopfu. ₃₉Kuteloko a nghenile, a ku eka vona: “Mi endlela yini pongo leri, mi rilela yini? Nhwanyana loyi, a nga fanga, kambe u etlele.” ₄₀Kutani va n'wi hleka; kambe Yesu a va humesela ehandle hinkwavo, a teka tata wa nhwanyana ni mana wa yena, ni lava teke na yena, kutani a nghena laha nhwanyana a latiweke kona. ₄₁Kutani a khoma voko ra nhwanyana, a ku eka yena: “Talita, kumi!” hileswaku: “Nhwanyana, ndzi ri eka wena: Pfuka!” ₄₂Kutani nhwanyana a hatla a pfuka, a tifambela, hikuva malembe ya yena a ma ri khume na mambirhi kutani va hlamala ngopfu. ₄₃Kambe Yesu a va laya swinene leswaku swi nga tshuki swi tiviwa hi munhu; kutani a ku: “N'wi nyikeni swakudya.”