MARKA 10

₁Yesu, kuteloko a sukile kwalaho, a ya etikweni ra Yudiya, entsungeni wa Yordani. Vunyingi byi vuya, byi hlengeletana eka yena, kutani a engeta a va dyondzisa, hilaha ingi a toloverile hakona.

₂Kutani Vafarisi va ta eka yena, va n'wi vutisa hi ku n'wi ringa, va ku: “Xana wanuna a nga pfumeleriwa ku tshika nsati wa yena-ke?” ₃A va hlamula, a ku: “Muxe u mi lerisile yini xana?” ₄Va ku: “Muxe u hi pfumelerile ku tsala papila ra ku tshika nsati, kutani hi n'wi hlongola.” ₅Yesu a va hlamula, a ku: “U mi tsalele ku lerisa loku hikwalaho ka ku nonon'hwa ka timbilu ta n'wina. ₆Kambe eku sunguleni, Xikwembu xi endlile wanuna ni wansati. ₇Hikwalaho munhu u ta sukela tata wa yena ni mana wa yena, a namarhela nsati wa yena, ₈kutani lavambirhi, vi ta va nyama yi ri yin'we. Loko swi ri tano, a va ha ri vambirhi kambe i nyama yin'we. ₉Hikwalaho, leswi Xikwembu xi swi hlanganiseke, swi nga ka swi nga avanyisiwi hi munhu.”

₁₀Kutani loko va ri endlwini, vadyondzisiwa va yena va tlhela va n'wi vutisa mhaka yoleyo. ₁₁A ku eka vona: “Un'wana ni un'wana la tshikaka nsati wa yena, kutani a teka un'wana, wa n'wi oswa. ₁₂Ni wansati, loko a tshika nuna wa yena, kutani a tekiwa hi un'wana, wa oswa.”

₁₃Kutani a tiseriwa vana leswaku a va khumba; kambe vadyondzisiwa va tshinya lava va tisaka. ₁₄Yesu, loko a swi vona, a kariha, a ku eka vona: “Tshikani vana va ta eka mina, mi nga tshuki mi va sivela, hikuva ku fuma ka Xikwembu i ka lava fanaka na vona. ₁₅Ndzi tiyisile, ndzi ri eka n'wina: Un'wana ni un'wana la nga amukeriki ku fuma ka Xikwembu tanihi n'wana, a nga ka a nga ngheni kona.” ₁₆Kuteloko a va vukarhile, a va tlhandleka mavoko ehenhla, a va katekisa.

₁₇Kuteloko a humele endleleni, un'wana a tsutsuma, a khinsama emahlweni ka yena, a n'wi vutisa, a ku: “Mufundhisi lonene, ndzi ta endla yini ku dya ndzhaka ya vutomi le byi nga heriki?” ₁₈Yesu a ku eka yena: “U ndzi vulela yini lonene? A ku na lonene loko a nga ri un'we, xi nga Xikwembu. ₁₉Wa yi tiva milawu leyi nge: ‘U nga tshuki u endla vuoswi, u nga dlayi, u ngi yivi, u nga lumbeti, u nga dyi swa un'wana, u va ni xichavo eka tata wa wena ni mana wa wena.’ ”

₂₀A hlamula, a ku eka yena: “Mufundhisi, hinkwaswo leswo ndzi swi hlayisile ku sukela evuhlangini bya mina.” ₂₁Kuteloko Yesu a n'wi langutile, a n'wi rhandza, kutani a ku eka yena: “U pfumala xilo xin'we: Famba, u ya xavisa hinkwaswo leswi u nga na swona, u nyika swisiwana, kutani u ta va ni xuma etilweni; kutani u ta, u ndzi landza.” ₂₂Kambe a tlhaviwa hi rito leri, a famba a hlunamile, hikuva a a ri munhu wa rifuwo lerikulu.

₂₃Kutani Yesu a rhalarhala, a ku eka vadyondzisiwa va yena: “Swi nonon'hwa ngopfu eka lava nga ni rifuwo ku nghena eku fumeni ka Xikwembu.” ₂₄Vadyondzisiwa va hlamala ngopfu hi marito lawa. Kambe Yesu a engeta a va byela, a ku: “Vana, swa nonon'hwa ngopfungopfu eka lava tshembaka rifuwo ku nghena eku fumeni ka Xikwembu. ₂₅Swi nga olova loko kamela yi nghena hi xuva ra neleta, ku tlula mufuwi ku nghena eku fumeni ka Xikwembu.” ₂₆Kutani ku hlamala ka vona ku engeteleleka, va vutisana, va ku: “Ku ta hlayiseka mani xana?” ₂₇Kutani Yesu a va languta, a ku: “Vona vanhu swi ngi va tsandza, kambe a swi tsandzi Xikwembu, hikuva Xikwembu a xi hluriwi hi nchumu.”

₂₈Kutani Petro a n'wi byela, a ku: “Vona, hina hi tshikile hinkwaswo, hi ku landza.” ₂₉Yesu a hlamula, a ku: “Ndzi tiyisile ndzi ri eka n'wina: Un'wana ni un'wana la tshikeke yindlu, kumbe vamakwavo, kumbe tata wa yena, hambi a ri mana wa yena, hambi nsati, kumbe vana, hambi ma ri masimu, hikwalaho ka mina ni ka Evhangeli, ₃₀emikarhini leyi, u ta nyikiwa ka dzana, tindlu, ni vamakwavo, ni vamanana, ni vana, ni masimu, swin'we ni ku xaniseka, kutani emikarhini leyi nga ta ta, u ta nyikiwa vutomi le byi nga heriki. ₃₁Kambe lavo tala va le ndzhaku va ta va lavo rhanga, kutani lavo rhanga, va ta va va le ndzhaku.”

₃₂Kakuloko va ha ri endleleni, va tlhandlukela eYerusalema, yena Yesu a ri karhi a va rhangela emahlweni; vona a va hlamala; na vona lava n'wi landzaka, a va chava; kutani a engeta a ya etlhelweni ni lava khume na vambirhi, a sungula ku va byela leswi nga ta n'wi humelela, ₃₃a ku: “Vonani, hi tlhandlukela eYerusalema, kutani N'wana wa Munhu u ta nyiketiwa vaprista lavakulu ni vatsari, va ta n'wi avanyisela rifu, va n'wi nyiketa vamatiko; ₃₄va n'wi sola, va n'wi ba, va n'wi tshwutela hi marhi, va n'wi dlaya; kambe u ta pfuka hi siku ra vunharhu.”

₃₅Kutani Yakobo na Yohane, vana va Zebediya, va ta eka yena, va ku: “Mufundhisi, hi rhandza leswaku u hi endlela leswi hi nga ta swi kombela.” ₃₆A ku eka vona: “Mi rhandza leswaku ndzi mi endlela yini xana?” ₃₇Va ku eka yena: “Hi nyike leswaku hi tshama eku kwetsimeni ka wena, un'wana evokweni ra wena ra xinene, un'wana eka le ra ximatsi.” ₃₈Kambe Yesu a ku eka vona: “A mi tivi lexi mi xi kombelaka. Xana mi nga swi kota ku nwa exinwelweni lexi ndzi nga ta nwa eka xona, ni ku khuvuriwa hi ku khuvula loku ndzi nga ta khuvuriwa hakona xana?” ₃₉Va ku eka yena: “Hi nga swi kota.” Kambe Yesu a ku eka vona: “Kunene mi ta nwa exinwelweni lexi ndzi nga ta nwa eka xona, mi ta khuvuriwa hi ku khuvula loku ndzi nga ta khuvuriwa hakona; ₄₀kambe loko ku ri ku tshama evokweni ra mina ra xinene, hambi ku ri eka le ra ximatsi, a hi mina ndzi nga nyikaka, kambe swi ta va swa lava lunghiseriweke swona.”

₄₁Kutani lava khume loko va twa mhaka leyi, va sungula ku hlunamela Yakobo na Yohane. ₄₂Kambe Yesu, kuteloko a va vitanele eka yena, a ku eka vona: “Ma tiva leswaku lava vuriwaka tihosi ta matiko va ma fuma, kutani vakulukumba va vona va va fuma hi ku nonon'hwa. ₄₃Swi nga tshuki swi va tano eka n'wina; kambe mani na mani la rhandzaka ku va lonkulu eka n'wina, u ta va nandza wa n'wina; ₄₄kutani mani na mani eka n'wana la rhandzaka ku va lowo rhanga, u ta va nandza wa hinkwavo; ₄₅hikuva, na yena N'wana wa Munhu, a nga telanga ku tirheriwa, kambe ku tirhela, ni ku nyiketa vutomi bya yena ku kutsula lavo tala.”

₄₆Kutani va fika eYeriko. Kakuloko Yesu a huma eYeriko ni vadyondzisiwa va yena, a ri ni vunyingi lebyikulu, Bartimiya, lowo fa mahlo, n'wana Timiya, a a tshamile endleleni, a kombela. ₄₇Kuteloko a twa leswaku i Yesu wa Nazareta, a sungula ku huwelela, a ku: “N'wana Davhida Yesu, ndzi twele vusiwana!” ₄₈Lavo tala va n'wi tshinya, va ku a miyela; kambe a engeta a huwelela, a ku: “N'wana Davhida, ndzi twele vusiwana!” ₄₉Kutani Yesu a yima, a ku: “N'wi viteni.” Kutani va vita lowo fa mahlo, va ku eka yena: “Tiyisa mbilu, suka u yima, wa ku vita.” ₅₀Kavaloko a cukumeta nguvu ya yena, a suka, a ta eka Yesu. ₅₁Kutani Yesu a n'wi hlamula, a ku: “U lava ndzi ku endlela yini xana?” Lowo fa mahlo a ku eka yena: “Rabuni, a ndzi tlhele ndzi vona.” ₅₂Yesu a ku eka yena: “Suka, u famba, ku pfumela ka wena ku ku hanyisile.” Kutani a vona kan'we, a vuya a landza Yesu endleleni.