MATEWU 12

₁Enkarhini wolowo, Yesu a hundza exikarhi ka masimu hi siku ra Savata. Vadyondzisiwa va yena a va ri ni ndlala, kutani va sungula ku kha min'oko, va dya. ₂Vafarisi loko va swi vona, va ku eka yena: “Vona, vadyondzisiwa va wena va endla leswi nga lulamelangiki siku ra Savata.” ₃Kambe a ku eka vona: “Xana a mi hlayanga leswi endliweke hi Davhida siku a nga ni ndlala, yena ni lava ngi va ri na yena: ₄Leswi a tshamaka a nghena endlwini ya Xikwembu, a dya swinkwa swo xaxametiwa leswi nga lulamangiki ku dyiwa hi yena ni lava ngi a ri na vona, loko ku nga ri hi vaprista ntsena. ₅Kumbe a mi hlayanga enawini leswaku hi masiku ya Savata, vaprista va tlula nawu wa Savata etempeleni, va nga ri na nandzu xana? ₆Ndzi ri eka n'wina: U kona kwala lonkulu eka tempele. ₇Loko ngi mi tiva rito leri nge te: ‘Ndzi rhandza tintswalo ma nga ri magandzelo,’ ingi mi nga kanetanga lava nga riki na nandzu, ₈hikuva N'wana wa munhu i hosi ya Savata.”

₉Kuteloko a sukile kona a nghena esinagogeni ya vona. ₁₀Munhu a a ri kona kwalaho lowa voko ro khwanyala. Kutani va n'wi vutisa ku n'wi xiya, va ku: “Xana swa lulama ku hanyisa hi siku ra Savata xana?” A va lava laha va nga n'wi hehlaka hakona. ₁₁Kutani a ku eka vona: “Munhu hi wihi eka n'wina la nga ni nyimpfu yin'we, loko yi wela ekheleni hi Savata, a nga ka a nga yi khomi a yi humesa? ₁₂Kasi munhu a nga tluri ngopfu nyimpfu xana? Hikwalaho swi lulamile ku endla swinene hi siku ra Savata.” ₁₃Kutani a ku eka munhu yeloyi: “Tshambuluta voko ra wena.” A ri tshambuluta; kutani ri hanya kukota rin'wanyana. ₁₄Kutani Vafarisi loko va humile va ya kanela makungu ku tiva hilaha va nga n'wi dlayaka hakona. ₁₅Kambe Yesu loko a swi tiva, a suka kona.

Kutani mitshungu leyikulu yi n'wi landzelela, kutani a va hanyisa hinkwavo.

₁₆Kambe a va laya hi matimba leswaku va nga tshuki va n'wi vula, ₁₇hileswaku ku endliwa leswi nga vuriwa hi muprofeta Esaya, loko a te: ₁₈“Vonani nandza wa mina loyi ndzi tihlawuleleke yena, murhandziwa wa mina, yeloyi moya wa mina wu n'wi tsakelaka. Ndzi ta veka moya wa mina ehenhla ka yena, kutani u ta byela matiko leswaku ku avanyisa ku kona; ₁₉a nga ka a nga holovi, a nga ka a nga bi huwa; a ku na munhu la nga ta twa rito ra yena emitsendzeleni. ₂₀A nga ka a nga tshovi rihlanga leri khinyekeke, kambe a nga ka a nga timi rivoningonyana leri mpulukaka, a kondza a hlurisa ku avanyisa, ₂₁kutani vamatiko va ta tshemba vito ra yena.”

₂₂Kutani va n'wi tisela munhu la nga ni rihuhu, a file mahlo ni xifuva kutani a n'wi hanyisa; sweswo lowo fa mahlo ni xifuva a vulavula, a tlhela a vona. ₂₃Kutani ntshungu hinkwawo wu hloleriwa, va ku: “Xana loyi a hi n'wana Davhida-ke?” ₂₄Kambe Vafarisi loko va twa mhaka yoleyo, va ku: “Loyi a nga hlongoli mademona loko ku nga ri ha Belzebule ntsena, hosi ya mademona.” ₂₅Kasi Yesu hi ku tiva ku anakanya ka vona, a ku eka vona: “Ku fuma kun'wana ni kun'wana loku avanaka hi le xikarhi ka tilwisa, ku ta hundzuka mananga; ni muti wun'wana ni wun'wana, hambi yi ri yindlu leyi avanaka hi le xikarhi yi tilwisa, yi nga ka yi nga tiyi. ₂₆Loko Satana a hlongola Satana, u tiavile hi le xikarhi a tilwisa; xana ku fuma ka yena ku nga tiyisa ku yini? ₂₇Loko kunene ndzi hlongola mademona ha Belzebule, vana va n'wina vona, va va hlongola hi mani xana? Hikwalaho va ta va vaavanyisi va n'wina va ri vona. ₂₈Kambe loko ndzi hlongola mademona hi Moya wa Xikwembu, hakunene ku fuma ka Xikwembu ku tile eka n'wina. ₂₉Kumbe munhu a nga nghenisa ku yini endlwini ya munhu wa matimba ku teka xuma xa yena, loko a nga rhanganga a boha munhu yeloyi; ku va kona a phangaka yindlu ya yena. ₃₀Loyi a nga yimiki na mina, u lwa na mina; ni la nga hlengeletiki na mina, wa hangalasa.

₃₁“Hilaha ndzi nge eka n'wina: vanhu va nga rivaleriwa ku dyoha kun'wana ni kun'wana, ni ku sandza kun'wana ni kun'wana, kambe xisandzu lexi sandzaka Moya, va nga ka va nga rivaleriwi. ₃₂Loko munhu a sandza N'wana wa Munhu, u ta rivaleriwa; kambe la sandzaka Moya lowo Kwetsima a nga ka a nga rivaleriwi, ni siku ni rin'we, hambi ku ri laha emisaveni hambi ku ri enkarhini lowu nga ta humelela. ₃₃Kumbe vulani leswaku murhi wunene, na vona vana va wona vanene; kumbe vulani leswaku murhi wu bihile, ni mihandzu ya wona yi bihile, hikuva murhi wu tiviwa hi vana va wona.

₃₄“Vana va timhiri, mi nga vurisa ku yini timhaka letinene, leswi mi nga ni nsele! Hikuva milomu yi vula leswi mbilu yi teleke swona. ₃₅Munhu wa mbilu leyinene u humesa swilo leswinene exumeni lexinene xa yena, kambe munhu wa nsele u humesa swilo leswo biha exumeni lexo biha xa yena. ₃₆Hikwalaho ndzi ri eka n'wina: Hi siku ra ku avanyisa, vanhu va ta hlamulela ku vulavula kun'wana ni kun'wana ka vuhava lebyi va byi vuleke; ₃₇hikuva u ta hlayiwa la lulameke hi ku vulavula ka wena; na kona, u ta biwa hi ku vulavula ka wena.”

₃₈Enkarhini wolowo vatsari ni Vafarisi van'wana va hlamula Yesu, va ku: “Mufundhisi, hi rhandza ku ku vona u endla mahlori.” ₃₉Kambe a va hlamula, a ku: “Rixaka leri ra mona, ra vuoswi, ri lava mahlori, kambe va nga ka va nga nyikiwi mahlori, loko ma nga ri ya muprofeta Yonasi. ₄₀Hikuva kukotisa loko Yonasi a tshame masiku manharhu, ni vusiku byinharhu ekhwirini ra nhlampfi leyikulu, N'wana wa Munhu, na yena, u ta va emarhumbyini ya misava masiku manharhu ni vusiku byinharhu. ₄₁Vavanuna va Ninivha va ta yima eku avanyiseni ni rixaka leri, va va kaneta, hikuva va hundzukile hi nkosi wa Yonasi; kasi lonkulu ka Yonasi, u kokwala. ₄₂Hosi ya wansati ya le dzongeni yi ta yima eku avanyiseni ni rixaka leri, yi ri kaneta, hikuva yi sukile makumu ya misava ku ta yingisela vutlhari bya Solomoni, kasi lonkulu ka Solomoni u kokwala.

₄₃“Loko moya lowo biha wu huma eka munhu, wu tiyela emitsungeni leyi tshweke, wu ya lava ku wisa, wu ya ku pfumala. ₄₄Hilaha wu nge: ndzi ta tlhelela endlwini ya mina, leyi ndzi nga huma eka yona; kutakuloko wu fika kona, wu yi kuma yi nga ri na wumbe, yi kukuriwile, yi bombisiwile. ₄₅Kutani wu tlhela wu ya vita mimoya yin'wana ya ntlhanu na mimbirhi leyi yi wu tlulaka hi ku biha, yi nghena, yi tshama kona; kutani timhaka ta makumu ta munhu loyi, ti tlula leto rhanga hi ku tshama ti bihile. Ku ta va sweswo eka rixaka leri ra mona.”

₄₆Kakuloko a ha vulavula ni ntshungu, ku fika mana wa yena ni vamakwavo, va yima ehandle va lava ku vulavula na yena. ₄₇Munhu a ku eka yena: “Mana wa wena ni vamakwenu hi lava la handle va lava ku vulavula na wena.” ₄₈Kambe Yesu a hlamula loyi a n'wi byelaka sweswo, a ku eka yena: “Manana ni vamakwerhu i vamani xana?” ₄₉Kutani a komba vadyondzisiwa va yena hi voko a ku: “Manana ni vamakwerhu, hi lava; ₅₀hikuva un'wana ni un'wana la nga ta endla ku rhandza ka Tatana la nga etilweni, hi yena la nga makwerhu, ni makwerhu wa xisati, na manana.”