LUKA 18

₁Naswona, Yesu a va byela xifaniso ku kombisa leswaku vanhu va fanele ku khongela hi mikarhi hinkwayo, va nga tshuki va karhala.

₂A ku: “Emutini wun'wana a ku ri ni muavanyisi loyi ngi a nga chavi Xikwembu, ni vanhu a a nga vuri nchumu ha vona. ₃Kambe a ku ri ni wansati wa noni emutini wolowo la nga ta eka yena, a ku: ‘Ndzi avanyisela eka la ndzi tengisaka.’ ₄Kambe a ala hi masiku. Kambe ndzhaku a tianakanya, a ku: ‘Hambi ndzi nga chavi Xikwembu, ndzi nga vuri nchumu ha munhu; ₅hambiswiritano, leswi noni leyi yi ndzi karhataka, ndzi ta n'wi avanyisela, a nga ha tshuki a tshama a ndzi pandzisa nhloko.’ ” ₆Kutani hosi yi ku: “Yingisani lexi vuriwaka hi muavanyisi la nga lulamangiki. ₇Loko xi ri Xikwembu, xana xi nga ka xi nga avanyiseri vahlawuriwa va xona, lava vitanaka eka xona nhlekanhi ni vusiku, hambi xi hlwela ku va rihisela xana? ₈Ndzi ri eka n'wina, xi ta hatlisa xi va rihisela. Kambe, kutakuloko N'wana wa Munhu a ta, xana mi ehleketa leswaku u ta kuma ku pfumela ku ri kona emisaveni xana?”

₉A engeta a byela xifaniso lexi eka van'wana lava titshembaka leswaku va lulamile, kambe va sandza van'wana, a ku: ₁₀“Vanhu vambirhi va tlhandlukele etempeleni ku ya khongela. Un'wana a a ri Mufarisi, un'wana muluvisi. ₁₁Mufarisi a a yimile hitlhelo rin'wana a khongerisa sweswo, a ku: ‘Xikwembu, ndza ku khensa hikuva a ndzi fani na vanhu van'wana, va nga makhamba ni swidyohi ni vaoswi, ku kota munhu loyi wa muluvisi. ₁₂Ndzi titsona swakudya kambirhi hi vhiki rin'wana ni rin'wana, ndzi humesa ku avanyisa ka khume ka swilo hinkwaswo leswi ndzi swi fuweke.’ ₁₃Kambe muluvisi a a yime ekule, a chava ni ku tlakusela mahlo ya yena etilweni; kambe a tiba xifuva, a ku: ‘Xikwembu, ndzi twele vusiwana, mina ndzi nga mudyohi.’ ₁₄Ndzi ri eka n'wina: Yeloyi, u ngirimele endlwini ya yena, a hlayiwile la lulameke ku tlula mufarisi; hikuva un'wana ni un'wana la titlakusaka u ta tsongahatiwa, kambe la titsongahataka, u ta tlakusiwa.”

₁₅Kutani va n'wi tisela vana lavatsongo leswaku a va khumba; kambe vadyondzisiwa va yena, loko va swi vona, va va tshinya. ₁₆Kambe Yesu a va vita, a ku: “Tshikani vana va ta eka mina, mi nga tshuki mi va sivela, hikuva ku fuma ka Xikwembu ku va eka lava fanaka na vona. ₁₇Kunene ndzi ri eka n'wina, la nga amukeriki ku fuma ka Xikwembu kukotisa n'wana, a nga ka a nga ngheni kona.”

₁₈Kutani hosana yin'wana yi n'wi vutisa, yi ku: “Mufundhisi lonene, ndzi ta endla yini ku va ni ndzhaka ya vutomi lebyi nga heriki?” ₁₉Yesu a ku eka yena: “U ndzi vulela yini lonene? A ku na lonene loko a nga ri un'we ntsena, xi nga Xikwembu. ₂₀U tiva milawu leyi nge: ‘U nga tshuki u oswa; u nga dlayi, u nga yivi; u nga hembeli munhu, chava tata wa wena ni mana wa wena.’ ” ₂₁Yena a ku: “Ndzi hlayisile leswo hinkwaswo, ndza ha ri ntsongo.” ₂₂Kuteloko Yesu a twa sweswo, a ku eka yena: “Wa ha pfumala xilo xin'we: Xavisa hinkwaswo leswi u nga na swona, u avela swisiwana, hi kona u nga ta va ni xuma etilweni; kutani u ta, u ndzi landzela.” ₂₃Kambe yena, loko a twa timhaka teto, a khomiwa hi tingana ngopfu, hikuva a a ri munhu wa rifuwo lerikulu. ₂₄Kuteloko Yesu a vonile leswaku a ni tingana, a ku: “Swa nonon'hwa eka lava nga ni rifuwo ku nghena eku fumeni ka Xikwembu. ₂₅Swi nga olova leswaku kamela yi nghena hi xuva ra neleta, ku tlula loko mufuwi a nghena eku fumeni ka Xikwembu.” ₂₆Lava swi twaka va ku: “Ku nga hlayiseka mani xana?” ₂₇Kutani a ku: “Leswi hlulaka vanhu, a swi hluri Xikwembu.”

₂₈Kavaloko Petro a ku: “Waswivo, hi tshikile hinkwaswo, hi ku landzela.” ₂₉Kutani a ku eka vona: “Kunene, ndzi ri eka n'wina: A ku na munhu la tshikeke yindlu, ni loko a ri nsati, hambi vamakwavo, kumbe vaveleki va yena, kumbe vana, hikwalaho ka ku fuma ka Xikwembu, ₃₀la nga taka a nga kumi ku tlurisa leswi emikarhini leyi, kutani emikarhini leyi taka u ta nyikiwa vutomi lebyi nga heriki.”

₃₁Kutani a famba hitlhelo ni lava khume na vambirhi a va byela a ku: “Vonani, hi tlhandlukela eYerusalema, kutani hinkwaswo leswi tsariweke hi vaprofeta ehenhla ka N'wana wa Munhu swi ta hetiseka. ₃₂Hikuva u ta nyiketiwa vamatiko, va ta n'wi tseketsela, va n'wi sandza, va n'wi tshwutela hi marhi; ₃₃kutani, kutakuloko va n'wi bile hi mikhavi, va ta n'wi dlaya; kambe u ta pfuka hi siku ra vunharhu.” ₃₄Kambe, loko va ri vona, a va twisisanga nchumu etimhakeni teto; rito leri, a ri fihliwile eka vona, kutani a va ringanisanga leswi a swi vulaka.

₃₅Kakuloko a tshinelele eYeriko, munhu lowo fa mahlo a a tshamile endleleni a kombela. ₃₆Kuteloko a twa vunyingi byi hundza, a vutisa, a ku: “I yini?” ₃₇Va n'wi byela, va ku: “Yesu wa Nazareta la hundzaka.” ₃₈Kutani a huwelela, a ku: “Yesu, n'wana Davhida, ndzi twele vusiwana!” ₃₉Kutani lava rhangeke emahlweni va n'wi tshinya, va ku a miyela; kambe a engeta a huwelela hi matimba, a ku: “N'wana Davhida, ndzi twele vusiwana!” ₄₀Kutani Yesu a yima, a ku va n'wi tisa eka yena; kuteloko a ri ekusuhi, a n'wi vutisa, a ku: ₄₁“U rhandza leswaku ndzi ku endlela yini xana?” A hlamula, a ku: “Hosi, ndzi ri, ndzi hanyanya.” ₄₂Yesu a ku eka yena: “Hanyanya; ku pfumela ka wena ku ku hanyisile.” ₄₃Kutani a vona kan'wekan'we; a n'wi landza, a ri karhi a dzunisa Xikwembu. Na vona vanhu hinkwavo lava nga swi vona, va dzunisa Xikwembu.