LUKA 17

₁Yesu a ku eka vadyondzisiwa va yena: “Loko ku ri ku khunguvanyeka, ku nga ka ku nga pfumaleki, kambe u ni khombo loyi ku khunguvanyeka ku humelelaka ha yena. ₂Swi nga va swinene loko a boheleriwa tamba enhan'wini, a hoxiwa elwandle, ku nga ri loko a khunguvanyisa un'wana wa lavatsongo. Tivoneleni hakona! ₃Kungakuloko makwenu a ku dyohele, n'wi tshinye; loko a tshika, n'wi rivalele. ₄Kungakuloko a ku dyohele kantlhanu na kambirhi hi siku rin'we, kutani a tlhelela eka wena ka ntlhanu na kambirhi, a ku: ‘Ndza tisola,’ n'wi rivalele.”

₅Kutani vaapostola va ku eka Hosi: “Hi engetele ku pfumela.” ₆Hosi yi ku: “Loko mi ri ni ku pfumela loku fanaka ni ndzhoho ya sinapi, hambi mi nga ku eka murhi lowa nkuwa: U tisimula, u ya tisimeke elwandle, ngi wu ta mi yingisa.

₇“Kambe i mani eka n'wina la nga ni nandza la rimaka, kumbe la risaka tihomu, a nga hatlisaka a ku eka yena loko a vuya emasin'wini: Tshinela, u tshama eswakudyeni. ₈Xana a nga ka a nga n'wi byeli: ‘Ndzi lunghisele xilalelo xa mina, tibohe xisuti u ndzi tirhela ndzi ko ndzi heta ku dya ni ku nwa, endzhaku, u ta dya, u nwa’? ₉Xana u ta khensa nandza loyi hikuva a endlile lexi a nga lerisiwa xona? ₁₀Hi mukhuva wolowo, na n'wina, kutakuloko mi hetile hinkwaswo leswi mi swi lerisiweke, vulani, mi ku: ‘Hi malandza lama nga pfuniki nchumu, hikuva hi endlile leswi hi faneleke ku swi endla.’ ”

₁₁Kakuloko a ri karhi a kongoma eYerusalema, a hundza endzilakaneni lowu nga xikarhi ka Samariya na Galeliya. ₁₂Kakuloko a nghena emutini wun'wana, va nhlokonho va khume va hlangana na yena, va yima ekulenyana. ₁₃Kutani va tlakusa rito, va ku: “Yesu, Hosi, hi twele vusiwana!” ₁₄Kuteloko a va vonile, a ku eka vona: “Fambani mi ya tikomba eka vaprista.” Kutani loko va ri karhi va famba, va basisiwa. ₁₅Kutani un'wana wa vona, loko a vona leswaku u hanyisiwile, a tlhela hi mitila ya yena, a dzunisa Xikwembu hi rito lerikulu. ₁₆Kutani a tiwisa emilengeni ya Yesu hi mombo, a n'wi tlangela. Kambe yeloyi a a ri Musamariya. ₁₇Kutani Yesu a vutisa, a ku: “Xana a va basisiwanga va ri khume xana? ₁₈Lava ntlhanu na mune va kwihi xana? A ku na un'wana la tlheleke ku ta dzunisa Xikwembu, loko a nga ri munhu loyi wa rixaka rimbe xana?” ₁₉Kutani a ku eka yena: “Suka, u tifambela, ku pfumela ka wena ku ku hanyisile.”

₂₀A vutisiwa hi Vafarisi leswaku ku fuma ka Xikwembu ku ta ta rini; kutani a va hlamula, a ku: “Ku fuma ka Xikwembu a ku ti hi ku twakala; ₂₁ku nga ka ku nga vuriwi leswaku: ‘Vonani, ku kona halenu,’ kumbe: ‘Vonani, ku lahaya,’ hikuva ku fuma ka Xikwembu ku le ndzeni ka n'wina.” ₂₂Kutani a ku eka vadyondzisiwa va yena: “Ku ta ta masiku lawa mi nga ta rhandza ku vona rin'wana ra masiku ya N'wana wa Munhu, kambe mi nga ka mi nga ri voni. ₂₃Va ta ku eka n'wina: ‘Vonani, u kona halenu,’ kumbe: ‘Vonani, u lahaya,’ kambe mi nga tshuki mi ya kona, mi nga tshuki mi va landza. ₂₄Hikuva kukota rihati loko ri hatima, ri hatima ku sungula tlhelo rin'wana ra tilo, ku yisa etlhelo rin'wana; N'wana wa Munhu u ta endlisa sweswo hi siku ra yena. ₂₅Kambe eku sunguleni, u fanele ku twisiwa ku vaviseka lokukulu, a cukumetiwa hi rixaka leri. ₂₆Kukotisa leswi humeleleke enguveni ya Nowa, swi ta va tano enguveni ya N'wana wa Munhu. ₂₇A va dya, a va nwa, a va hlomisa ni ku hlomisela, ku ko ku fika siku leri Nowa a nghenaka engalaveni, kutani ndhambi ya mati yi fika yi va dlaya hinkwavo. ₂₈Na swona swi humelele sweswo enguveni ya Lota: A va dya, va nwa, va xava, va xavisa, va rima, va aka tindlu; ₂₉kambe siku leri Lota a humaka eSodoma ha rona, ndzilo ni xivavula swi nisiwa hi tilo, swi va dlaya hinkwavo. ₃₀Swi ta va tano hi siku leri N'wana wa Munhu a nga ta humelela ha rona. ₃₁Hi siku lero, la nga ehenhla ka yindlu, nhundzu ya yena yi ri endlwini, a nga tshuki a xika, a ya yi teka; ni la nga emasin'wini, a nga ka a nga tlheleli endzhaku na yena. ₃₂Tsundzukani timhaka ta nsati wa Lota. ₃₃Un'wana ni un'wana la nga ta rhandza ku hlayisa vutomi bya yena, u ta lahlekela hi byona; kambe un'wana ni un'wana la lahlekelaka hi vutomi bya yena, u ta byi hlayisa. ₃₄Ndza mi byela, ndzi ri: Hi vusiku byebyi, eka lavambirhi lava etlelaka esangwini ri ri rin'we, ku ta tekiwa un'wana, un'wana a tshikiwa. ₃₅Eka vavasati vambirhi lava nga ta sila swin'we, un'wana u ta tekiwa, un'wana a tshikiwa. ₃₆Eka vambirhi lava nga emasin'wini, ku ta tekiwa un'wana, un'wana a tshikiwa.” ₃₇Kutani va hlamula, va ku eka yena: “Hosi, swi ta va kwihi xana?” A ku eka vona: “Laha ntsumbu wu nga kona, hilaha makoti ma nga ta hlengeletana kona.”