LUKA 15

₁Kutani valuvisi ni vadyohi va tshinelela eka yena ku n'wi yingisa. ₂Kambe Vafarisi ni vatsari va hleva ha swona, va ku: “Loyi, u amukela vadyohi, u dya na vona.” ₃Kutani a va byela xifaniso lexi, a ku: ₄“Hi wihi munhu exikarhi ka n'wina, loko a ri ni tinyimpfu ta dzana, loko ku lahleka yin'we ntsena, a nga ka a nga siyi leta ntlhanu wa makume, na mune wa makume, na ntlhanu na mune emananga, a ya lava leyi lahlekeke, u ko a yi kuma? ₅Kuteloko a yi kumile, a yi teka, a yi rhwala emakatleni, a tsakile. ₆Kuteloko a fika ekaya, a vita varikwavo, ni lava akeke na yena, a ku eka vona: ‘A hi tsakeni swin'we hikuva ndzi kumile nyimpfu ya mina leyi ngi yi lahlekile.’ ₇Ndzi ri eka n'wina: Ku tsaka ku ta va kona ematilweni hikwalaho ka mudyohi a ri un'we la hundzukaka, ku tlurisa ku tsaka loku nga ta va kona, hikwalaho ka lava lulameke va ntlhanu wa makume, na mune wa makume, na ntlhanu na mune, lava nga faneriki hi ku hundzuka.

₈“Kumbe wansati hi wihi la nga na khume ra macheleni, kungakuloko a lahlekeriwe hi yin'we ntsena, a nga ka a nga lumeki rivoni, a kukula yindlu, a langutisa a ko a yi kuma. ₉Kuteloko a yi kumile, a vita varikwavo, ni lava akeke na yena, a ku eka vona: ‘A hi tsakeni swin'we, hikuva ndzi kumile cheleni ya mina, yi ngi yi lahlekile.’ ₁₀Ndzi ri eka n'wina: Hi mukhuva wolowo, ku tsaka ku kona emahlweni ka tintsumi ta Xikwembu, hikwalaho ka mudyohi a ri un'we la hundzukaka.”

₁₁A engeta a ku: “Munhu un'wana a a ri ni vana va va vanuna vambirhi; lowa ndzisana a ku eka tata wa yena: ₁₂‘Tatana, ndzi avele xuma lexi nga ta va xa mina.’ Kutani tata wa vona a va avanyisela xuma xa yena. ₁₃Kuteloko ku hundzile masiku ma nga ri mangani, n'wana wa yena lowa ndzisana loko a hlengeletile hinkwaswo, a rhurhela etikweni leri nga ekule a hangalasa xuma xa yena hi vusopfa. ₁₄Loko a dyile hinkwaswo, ku wa ndlala leyikulu etikweni rero, kutani a sungula ku pfumala. ₁₅Kutani a ya a ya namarhela munhu wa tiko rero; yeloyi a n'wi rhuma enhoveni ku risa tinguluve. ₁₆Kutani a navela ku xurha hi makamba lama dyiwaka hi tinguluve, kambe a ku nga ri na munhu la n'wi nyikaka. ₁₇Ku va laha a tiehleketaka, a ku: ‘Malandza layo tala swonghasi ma kona eka tatana, ma ni vuswa lebyo tala; kasi mina halenu, ndza fa hi ndlala. ₁₈Ndzi ta pfuka, ndzi ya eka tatana, ndzi ta ku eka yena: “Tatana, ndzi dyohele tilo na wena, ₁₉a swi ndzi faneri ku tshama ndzi vuriwa n'wana wa wena; u ndzi endla kukota un'wana wa malandza ya wena.” ’ ₂₀Kwalaho a pfuka, a ya eka tata wa yena. Kakuloko a ha ri ekule, tata wa yena a n'wi vona, a n'wi twela vusiwana; kutani a tsutsuma, a wela enhan'wini ya yena, a n'wi ntswontswa. ₂₁Kutani n'wana a ku eka yena: ‘Tatana, ndzi dyohele tilo na wena, a ndzi fanelanga ku tshama ndzi vuriwa n'wana wa wena.’ ₂₂Kambe tata wa yena a ku eka malandza ya yena: ‘Tisani nguvu leyo saseka ngopfu, mi n'wi ambexa yona, mi n'wi nghenisa xingwavila eritihweni, ni tintanghu emilengeni. ₂₃Tisani rhole leri noneke, mi ri tlhava, hi dya, hi tsaka; ₂₄hikuva n'wana loyi wa mina a a file, kutani u hanyile; a a lahlekile kambe u kumiwile.’ Kutani va sungula ku tsaka.

₂₅“Kambe n'wana wa yena lonkulu a a ri emasin'wini; kuteloko a fikile ekusuhi ni yindlu, a twa ku yimbelela ni ku cina. ₂₆A vita un'wana wa malandza, a n'wi vutisa, a ku: ‘Swi lo yini?’ ₂₇Yeloyi a ku eka yena: ‘Ndzisana ya wena yi vuyile, kutani tata wa wena u tlhavile rhole leri noneke hikuva u n'wi vonile a ha hanya.’ ₂₈Kambe a kariha, a ala ku nghena. Tata wa yena a huma a n'wi khongotela leswaku a nghena. ₂₉Yena a hlamula a ku eka tata wa yena: ‘Vona, ndzi ku tirhele hi malembe layo tala, ndzi nga tluri ku lerisa ka wena, kambe a ku si ndzi nyika ni ximbutana leswaku ndzi tsaka ni vanakulorhi. ₃₀Kambe n'wana wa wena loyi, la dyeke xuma xa wena hinkwaxo a ri ni tinghwavava, kutani loko a vuya, u n'wi tlhavela rhole leri noneke!’ ₃₁Kambe tata wa yena a ku eka yena: ‘N'wananga, u tshama na mina hi masiku; hinkwaswo leswi nga swa mina, i swa wena; ₃₂kambe a hi fanele ku tsaka ni ku tlangela, hikuva makwenu loyi a a file, kambe u hanyile; a a lahlekile, kambe u kumiwile.’ ”